ශ්‍රී ලංකා විදේශ සේවා නියුක්ති කාර්යාංශයේ (SLBFE) අතිරේක සාමාන්‍යාධිකාරීවරයෙකු ඇතුළු නිලධාරීන් හය දෙනෙකුගේ සේවය ඊයේ (5) සිට ක්‍රියාත්මක වන පරිදි වහාම අත්හිටුවා තිබේ. රුපියල් මිලියන 250 කට ආසන්න මූල්‍ය වංචාවක් සම්බන්ධයෙන් මෙම පියවර ගෙන ඇති බව වාර්තා වේ.
පළමු විදේශ රැකියාව සඳහා යන කාන්තාවන් සඳහා අනිවාර්ය වන රැකියා පුහුණුව සම්පූර්ණ නොකර ඔවුන් විදේශගත කිරීම මෙම වංචාවට සම්බන්ධ බව ද කියැවේ.
විදේශ සේවා නියුක්ති කාර්යාංශය විසින් සිදු කරන ලද විමර්ශනවලින් හෙළි වී ඇත්තේ 2022 වර්ෂයේ සිට 2024 අගෝස්තු මාසය දක්වා කාන්තාවන් 35,000 ක් පමණ වංචනික ලෙස අනිවාර්ය පුහුණුවෙන් නිදහස් කර ඇති බවයි.
මීට පෙර විදේශයන්හි සේවය කර නොමැති නමුත්, පෙර විදේශ සේවා පළපුරුද්දක් ඇතැයි ව්‍යාජ ලේඛන ඉදිරිපත් කළ කාන්තාවන් විසින් මෙම මහා පරිමාණ මූල්‍ය වංචාව සිදු කර ඇති බව මූලාශ්‍ර පෙන්වා දෙයි. මෙම නිදහස් කිරීම සඳහා එක් අයෙකුගෙන් රුපියල් 100,000 සිට 140,000 දක්වා මුදලක් අය කර ඇති බව ද අනාවරණය වී ඇත.
මෙම වංචාව සම්බන්ධයෙන් ලැබී ඇති තොරතුරුවලට අනුව, පුහුණුව නොමැතිකම හේතුවෙන් මෙම කාන්තාවන් ඔවුන්ගේ සේවා ස්ථානවලදී දැඩි අවදානම් සහගත තත්වයන්ට මුහුණ දී ඇති බවට වාර්තා වේ. පුහුණුවක් නොමැති ගෘහ සේවිකාවන් විදේශ රටවලදී විවිධ ආකාරයේ ප්‍රචණ්ඩත්වයට හා අපයෝජනයන්ට ලක්ව ඇති බවට ද තොරතුරු ලැබී ඇතැයි මූලාශ්‍ර වැඩිදුරටත් පැවසීය.
