බදුල්ල දිස්ත්‍රික් පාර්ලිමේන්තු මන්ත්‍රී චාමර සම්පත් දසනායකට බදුල්ල මහෙස්ත්‍රාත් අධිකරණය විසින් අද (19) ඇප නියම කර තිබේ. රුපියල් ලක්ෂ 10 බැගින් වූ ඇප දෙකක් මත ඔහු නිදහස් කිරීමට මහෙස්ත්‍රාත් නුජිත් ද සිල්වා නියෝග කළේය.
පොදු දේපල පණත යටතේ පවරා ඇති නඩුවක් හේතුවෙන් රක්ෂිත බන්ධනාගාර ගතකර සිටි මන්ත්‍රීවරයා අද උදෑසන බදුල්ල මහෙස්ත්‍රාත් අධිකරණයට ඉදිරිපත් කරනු ලැබීය.
අපරාධ පරීක්ෂණ දෙපාර්තමේන්තුව විසින් මෙම නඩුව පවරා ඇත්තේ, 2016 වර්ෂයේ ඌව පළාත් මහ ඇමැති ලෙස කටයුතු කරමින් සිටියදී, පෙර පාසල් ළමුන් සඳහා පාසල් පොත් බෑග් ලබාදීමට රාජ්‍ය බැංකුවක් විසින් ලබාදුන් රුපියල් ලක්ෂ දහයක මුදලක් සාවද්‍ය පරිහරණය කළ බවට එල්ල වී ඇති චෝදනාවක් සම්බන්ධයෙනි.
