අල්ලස් කොමිසම විසින් හිටපු අමාත්‍ය චන්ද්‍රාණි බණ්ඩාරට එරෙහිව කොළඹ මහාධිකරණය හමුවේ අධිචෝදනා ගොනු කර තිබේ, මෙම චෝදනා එල්ල වී ඇත්තේ ඇය කාන්තා හා ළමා කටයුතු සහ වියළි කලාප සංවර්ධන අමාත්‍යවරිය ලෙස කටයුතු කළ සමයේදී සිදු වූ බව කියන දූෂණ ක්‍රියාවන්ට අදාළව ය.
ඇයට එල්ල වී ඇති ප්‍රධාන චෝදනාව වන්නේ, නිසි ක්‍රියාපටිපාටිය අනුගමනය නොකර එච්.එම්. චන්ද්‍රවංශ නමැත්තා වියළි කලාප සංවර්ධන අමාත්‍යාංශයේ ව්‍යාපෘති අධ්‍යක්ෂ ධූරයට පත් කිරීම ය. මීට අමතරව, තම හිතවතුන් කිහිප දෙනෙකු නීත්‍යානුකූල නොවන ආකාරයට විවිධ තනතුරුවලට පත් කිරීම සඳහා බලපෑම් කිරීම සම්බන්ධයෙන්ද ඇයට චෝදනා එල්ල වී තිබේ.
මෙම සිදුවීම් 2019 ජනවාරි 14 වැනිදා සහ 2019 ජනවාරි 31 අතර කාලසීමාව තුළ සිදු වූ බව අල්ලස් කොමිසම සඳහන් කරයි. මෙම ක්‍රියාවන් අල්ලස් පනත යටතේ “දූෂණය” නැමැති වරද ලෙස සලකා, එක් චෝදනාවක් යටතේ මෙම නඩුව ගොනු කර තිබේ.
මෙම නඩුව සඳහා සාක්ෂිකරුවන් 8 දෙනෙකු නම් කර ඇති අතර, නඩු භාණ්ඩ ලෙස ලේඛන 25ක්ද ඉදිරිපත් කර ඇති බව වාර්තා වේ.
