ප්‍රධාන පෙළේ මත්ද්‍රව්‍ය ජාවාරම්කරුවකු සහ සංවිධානාත්මක අපරාධ කල්ලි නායකයෙක් වන නඳුන් චින්තක වික්‍රමරත්න හෙවත් හරක් කටාට එරෙහිව නීතිපතිවරයා විසින් පනවා ඇති නඩුවක වැඩිදුර නඩු සාක්ෂි විභාගය ලබන 07 වන මස 15 වනදා දක්වා කල් තැබීමට කොළඹ මහාධිකරණය අද (19) නියම කළේ ය.
එම නඩුවේ සාක්ෂි විභාගය අද දිනයේ පැවැත්වීමට නියමිතව තිබුණත් මෙසේ සාක්ෂි විමසීම කල් තැබීමට මහාධිකරණ විනිසුරුවරයා නියෝග කර සිටියේ පැමිණිල්ල මෙහෙයවන නියෝජ්‍ය සොලිසිටර් ජෙනරාල් සුදර්ශන ද සිල්වා අද දිනයේ අධිකරණය හමුවේ පෙනී නොසිටීම හේතුවෙනි.
එමෙන්ම පැමිණිල්ල වෙනුවෙන් සක්ෂි ලබාදීම සඳහා අද දින අධිකරණය හමුවේ පෙනී සිටි ඉන්ද්‍රානි ඩයස් නැමැති පැමිණිල්ලේ සාක්ෂිකාරියට ඉදිරි නඩු දිනයේ දී අධිකරණය හමුවේ පෙනී සිටින ලෙස ද නියෝග කෙරිණ.
2015-06-10 වැනිදා මුල්ලේරියාව ප්‍රදේශයේ පිහිටි නිවසකට කඩා වැදී සිදුකළ කොල්ලකෑමක් සම්බන්ධයෙන් හරක් කටාට එරෙහිව මෙම නඩුව ගොනුකර තිබෙනවා.
මේ අතර අද දිනයේ නඳුන් චින්තක වික්‍රමරත්න හෙවත් හරක් කටා අධිකරණය වෙත රැගෙන එන අවස්ථාවේ ඔහුගේ ඡායාරූප ගැනීමට හෝ වීඩියෝ ගත කිරීමට නොහැකි වන ආකාරයට ආවරණය කිරීමට ත්‍රස්ත විමර්ශන කොට්ඨාසයේ නිලධාරීන් කටයුතු කර තිබිණ.
