රුපියල් ලක්ෂ 59ක මූල්‍ය වංචාවකට අදාළව, හල්දුම්මුල්ල ප්‍රාදේශීය සභාවට මෙවර තේරී පත්වූ ‘මාලිමා’ පක්ෂයේ මන්ත්‍රීවරයෙකු පෙරේදා (20) අත්අඩංගුවට ගෙන රක්ෂිත බන්ධනාගාරගත කර ඇති බව බණ්ඩාරවෙල පොලිසිය සඳහන් කරයි.
පැමිණිල්ල සහ සිද්ධියේ පසුබිම
පැමිණිලිකරු ද මෙවර පළාත් පාලන මැතිවරණයේදී හල්දුම්මුල්ල ප්‍රාදේශීය සභාවට තරග කර පරාජයට පත්වූ ‘මාලිමා’ අපේක්ෂකයෙකු බව පොලිසිය වැඩිදුරටත් පවසයි.
අත්අඩංගුවට ගත් මන්ත්‍රීවරයා සහ පැමිණිලිකරු අතර ගම්මිරිස් ව්‍යාපාරයක් සම්බන්ධයෙන් කාලයක සිට ආරවුලක් පැවති තිබේ. රක්ෂිත බන්ධනාගාරගත කර සිටින මන්ත්‍රීවරයාගෙන් ලැබිය යුතු මුදල් නොලැබීම හේතුවෙන් පැමිණිලිකරු බණ්ඩාරවෙල කොට්ඨාස මූල්‍ය අපරාධ කොට්ඨාසයට පැමිණිල්ලක් ඉදිරිපත් කර ඇත.
අත්අඩංගුවට ගැනීම සහ රිමාන්ඩ් කිරීම
ඒ අනුව, මූල්‍ය අපරාධ කොට්ඨාසය විසින් සැකකාර මන්ත්‍රීවරයාව අත්අඩංගුවට ගෙන බණ්ඩාරවෙල මහෙස්ත්‍රාත් පීටර් පෝල් මහතා වෙත ඉදිරිපත් කිරීමෙන් පසු, ඔහු අද (21) දක්වා රක්ෂිත බන්ධනාගාරගත කරන ලදී.
