කුප්‍රකට පාතාල අපරාධකරුවෙකු ලෙස සැලකෙන කෝරලගමගේ මන්දිනු පද්මසිරි නොහොත් ‘කෙහෙල්බද්දර පද්මේ’ වෙනුවෙන් ව්‍යාජ තොරතුරු සපයා විදේශ ගමන් බලපත්‍ර දෙකක් සාදවා දීම සම්බන්ධයෙන් පුද්ගලයන් දෙදෙනෙකු අත්අඩංගුවට ගෙන ලබන මැයි 29 දක්වා රක්ෂිත බන්ධනාගාර ගත කර තිබේ.
අත්අඩංගුවට ගත් 32 සහ 51 හැවිරිදි සැකකරුවන්, ‘කෙහෙල්බද්දර පද්මේ’ ගේ ඡායාරූපයක් WhatsApp ඔස්සේ ලබාගෙන එය සංස්කරණය කර, ආගමන විගමන දෙපාර්තමේන්තුවට වංචනික ලෙස ලබා දී ඇති බව පොලිසිය ප්‍රකාශ කළේය.
මෙම සැකකරුවන් බත්තරමුල්ල සහ කොහුවල ප්‍රදේශවල පිහිටි ඡායාරූපශාලාවල හිමිකරුවන් වන අතර, ඔවුන් ඇහැලියගොඩ සහ මාලිගාවත්ත ප්‍රදේශවල පදිංචිකරුවන් බව වාර්තා වේ.
‘කෙහෙල්බද්දර පද්මේ’ 2014 දී නිකුත් කරන ලද විදේශ ගමන් බලපත්‍රයක් භාවිතා කර 2021 වසරේදී රටින් පිටව ගොස් ඇති අතර, ඔහුගේ එම විදේශ ගමන් බලපත්‍රය 2024 දී කල් ඉකුත් වී ඇත. කෙසේ වෙතත්, ඔහු විදේශගතව සිටියදීම 2024 වසරේදී වංචනික ලෙස සිය ඡායාරූපය සහ තොරතුරු සපයා නව විදේශ ගමන් බලපත්‍රයක් ලබාගෙන ඇති බවට විමර්ශනවලින් අනාවරණය වී තිබේ.
එසේම, ඔහු 2025 වසරේදී තවත් නම් දෙකකින්, ඔහුගේම ඡායාරූප සහිතව, තවත් විදේශ ගමන් බලපත්‍ර දෙකක්ද ලබාගෙන ඇති බව අනාවරණය වී ඇත.
අත්අඩංගුවට ගත් සැකකරුවන් කොළඹ ප්‍රධාන මහේස්ත්‍රාත් අධිකරණයට ඉදිරිපත් කිරීමෙන් පසු රක්ෂිත බන්ධනාගාර ගත කරනු ලැබීය.
