දේශබන්දු තෙන්නකෝන් පොලිස්පති ලෙස පත් කිරීමට අභියෝග කරමින් ගොනු කර ඇති මූලික අයිතිවාසිකම් පෙත්සම් නවයක් සැප්තැම්බර් 8 වැනිදා විභාගය සඳහා ශ්‍රේෂ්ඨාධිකරණය විසින් අද දින (මැයි 28) නියම කරන ලදී.
මෙම පෙත්සම් අද දින ජනක් ද සිල්වා, සෝභිත රාජකරුණා සහ විනිසුරු සම්පත් විජේරත්න යන විනිසුරුවරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල හමුවේ කැඳවූ අවස්ථාවේදී සැප්තැම්බර් 8 වැනිදා සඳහා විභාගයට නියම කෙරිණි.
මෙම පෙත්සම් ඊළඟ විභාගයේදී පංච පුද්ගල ශ්‍රේෂ්ඨාධිකරණ විනිසුරු මඩුල්ලක් හමුවේ විභාග කිරීමට නියමිතය.
දේශබන්දු තෙන්නකෝන්ට පොලිස්පති ධුරයේ බලතල, කාර්යයන් සහ වගකීම් ක්‍රියාත්මක කිරීම වළක්වාලමින් ශ්‍රේෂ්ඨාධිකරණය දැනටමත් අතුරු තහනම් නියෝගයක් නිකුත් කර ඇත.
ආණ්ඩුක්‍රම ව්‍යවස්ථාවේ අදාළ විධිවිධානවලට පටහැනිව මෙම පත්වීම සිදුකර ඇති බවට පෙත්සම්කරුවන් ප්‍රබල මූලික නඩුවක් ගොඩනගා ඇති බව ශ්‍රේෂ්ඨාධිකරණය වැඩිදුරටත් තීන්දු කළේය. පොලිස්පති ලෙස ඔහුගේ පත්වීමට අභියෝග කරමින් ගොනු කර ඇති මූලික අයිතිවාසිකම් පෙත්සම් නවයේ අවසන් තීන්දුව ලබා දෙන තෙක් මෙම නියෝගය බලාත්මක වේ.
මහාචාර්ය සවිත්‍රි ගුණසේකර, නිරෝෂන් පාදුක්ක, ආචාර්ය පාක්‍යසෝති සරවනමුත්තු, මැල්කම් කාදිනල් රංජිත්, තරිඳු ඉරංග ජයවර්ධන, හිරුණිකා ප්‍රේමචන්ද්‍ර, ආතම් ලෙබ්බේ ආසාත්, එස්.කේ. ප්‍රියංග සහ ඒ.එන්.එස්. සෝයිසා යන අය විසින් මෙම පෙත්සම් ගොනු කර ඇති අතර, ජනාධිපතිවරයා නියෝජනය කරමින් නීතිපතිවරයා, ආණ්ඩුක්‍රම ව්‍යවස්ථා සභාවේ සභාපතිවරයා, කථානායකවරයා, ආණ්ඩුක්‍රම ව්‍යවස්ථා සභාවේ සාමාජිකයින්, නීතිපතිවරයා සහ තවත් කිහිප දෙනෙකු වගඋත්තරකරුවන් ලෙස නම් කර ඇත.
