ඇමෙරිකා එක්සත් ජනපදය විසින් පනවා ඇති නව තීරු බදු සම්බන්ධයෙන් සාකච්ඡා කිරීම සඳහා ශ්රී ලංකා නියෝජිත කණ්ඩායමක් දෙවන වතාවටද ඇමෙරිකාවට ගොස් තිබෙන අතර මෙම සාකච්ඡාව වොෂින්ටන්හිදී එක්සත් ජනපද නියෝජිත කාර්යාලයේදී සිදු විය.
එම සාකච්ඡාව සඳහා මුදල් නියෝජ්‍ය අමාත්‍ය හර්ෂණ සූරියපෙරුම, මහ බැංකු අධිපති නන්දලාල් වීරසිංහ ඇතුළු පිරිසක් සහභාගී වීමට පිටත්ව ගිය අතර ඇමරිකාවේදී එම දූත පිරිසට එහි සිටින ඇමරිකාවේ ශ්රී ලංකා තානාපති මහින්ද සමරසිංහද එක්ව තිබේ.
දෙරට අතර ද්විපාර්ශ්වික වෙළෙඳ සබඳතා ශක්තිමත් කිරීම සඳහා වූ අඛණ්ඩ උත්සාහය අරමුණු කරගත් මෙම සාකච්ඡාවේ මහින්ද සමරසිංහ ශ්රී ලංකා දුත කණ්ඩායමේ යම් ප්‍රමුඛ කාර්‍යයක නිරතවන බවක් සාකච්චා මේසයේ පිලිවෙල අනුව පෙනේ.
මහින්ද සමරසිංහ දීර්ඝ කාලයක් ශ්රී ලංකා රජය නියෝජනය කරමින් ඇමරිකාවේ වාසය කරන අතර ආණ්ඩු බලය වෙනස් වුවද ඇමෙරිකාවේ ශ්රී ලංකා තානාපති තනතුරේ තව දුරටත් තබා ගැනීමට රජය ගත් තීරණය නිසා ජාතික ජන බලවේග නව පාලන යටතේ ද ඒ ඔහු තවදුරටත් එම කටයුත්තේම යෙදී සිටී.
කෙසේවෙතත් ජාතික ජන බලවේග ආණ්ඩුව බලයට පත් වන විට ඔවුන්ගේ ප්‍රධාන ප්‍රතිපත්තියක් ලෙස සඳහන් කළේ පසුගිය 76 වසර සාපයක් බව ය. දූෂිත බව ය. කිසිදු යහපත් දෙයක් සිදු නොවූ කාල සීමාවක් බව ය. එම 76 වසරක වංචාකාරී ආණ්ඩු කාල සීමාව තුළ සිටි සියලු ම දේශපාලකයන්, රාජ්‍ය සේවකයන් තබා විදේශ සේවයේ නිරත වූවන් පවා දූෂිතයන් බව ය. රට පාලනය කළ ආණ්ඩුවල සියලු දෙනා හොරු, වංචාකරුවන් යැයි පවසන ජාතික ජන බලවේග ආණ්ඩුවම පසුගිය සියලු ම ආණ්ඩුවල පාහේ අමාත්‍ය ධුර දැරූ, විදේශ සේවයේ නිරත වූ ‘මහින්ද බුද්ධදාස සමරසිංහ’ පමණක් නිවැරදි පුද්ගලයෙකු ලෙස සැලකීම පුදුම සහගත ය.
මෙම සාකච්ඡාව සඳහා ආණ්ඩුව පාර්ශවයෙන් සහභාගී වූ පුද්ගලයින් දෙස බැලීමේ දී මීට සුදුසු පුද්ගලයින් ජාතික ජන බලවේගය තුළ නොමැති බව පැහැදිලි ය. එසේම මෙම සාකච්ඡාව සඳහා සහභාගී වූ සියලු දෙනාගේ නම් ජනධිපති මාධ්‍ය අංශය සඳහන් කල තිබුණ ද එහි මහින්ද සමරසිංහගේ නම ඇතුළත් වී නොතිබීම ද අවදානය යොමු කල යුතු කරුණකි.
