ලිඳුල-තලවකැලේ නගර සභාවේ හිටපු සභාපති අශෝක සේපාල අල්ලස් හෝ දූෂණ චෝදනා විමර්ශන කොමිෂන් සභාව විසින් අත්අඩංගුවට ගෙන තිබේ.
හිටපු සභාපතිවරයා රජයට රුපියල් මිලියන 2.38 ක මූල්‍ය අලාභයක් සිදු කළ බවට චෝදනා කෙරෙන සිද්ධියක් සම්බන්ධයෙන් මෙම අත්අඩංගුවට ගැනීම සිදු කර ඇත.
අල්ලස් කොමිෂන් සභාවට අනුව, ඔහු නගර සභාවේ සභාපති ලෙස කටයුතු කළ කාලය තුළ සිදුවූ අක්‍රමිකතා සහ දුර්වල කළමනාකරණය හේතුවෙන් මෙම පාඩුව සිදුවී තිබේ. මහජන මුදල් අවභාවිත කර ඇති බවට විමර්ශන මගින් අනාවරණය වී ඇති අතර, ඒ අනුව නීතිමය ක්‍රියාමාර්ග ගෙන ඇත.
පසුගියදා අශෝක සේපාල සමගි ජන බලවේගයෙන් ඉවත් වී නැවතත් දින කිහිපයකින් සජබය හා එක් වීමට කටයුතු කළ සංවිධායකවරුන්ගෙන් කෙනෙකි.
මුල් කාලයේ ශ්‍රී ලංකා පොදුජන පෙරමුණේ සාමාජිකයෙකුව සිට ඉන් නාමයෝජනා නොලැබීම හේතුවෙන් ස්වාධීනව තරග කර, ලිඳුල-තලවකැලේ ප්‍රාදේශීය සභාවේ සභාපතිවරයා වශයෙන් පත් වූ පුද්ගලයෙකු වන ඔහු ඉන්පසු ඔහු එක්සත් ජාතික පක්ෂයටත් එකතු වූ අතර, පසුව සමගි ජන බලවේගයේ සාමාජිකයෙකු බවට පත් විය.
