ඉංජිනේරු මහාචාර්ය කේ.ටී.එම්.යූ. හේමපාල ලංකා විදුලිබල මණ්ඩලයේ (CEB) නව සභාපතිවරයා ලෙස පත් කර තිබේ. ලංකා විදුලිබල මණ්ඩලයේ ලිපි ශීර්ෂය යටතේ නිකුත් කළ ලිපියකින් මේ බව තහවුරු කර ඇති අතර, මහාචාර්ය හේමපාල මීට පෙර බලශක්ති අමාත්‍යාංශයේ හිටපු ලේකම්වරයෙකු ලෙස ද කටයුතු කර තිබෙන බව සඳහන් වේ.
මෙම පත්වීමත් සමග, මෙතෙක් ලංවිම සභාපති ධුරය දැරූ ඉංජිනේරු ආචාර්ය තිලක් සියඹලාපිටියගේ ඉල්ලා අස්වීම වහාම ක්‍රියාත්මක වන පරිදි අනුමත කර ඇති බව ද අදාළ ලිපියේ වැඩිදුරටත් සඳහන් වේ.
සති කිහිපයකට පෙර, සංශෝධිත විදුලි ගාස්තු පිළිබඳ සාකච්ඡා මධ්‍යයේ තිලක් සියඹලාපිටිය බලශක්ති අමාත්‍යවරයාට සිය ඉල්ලා අස්වීමේ ලිපිය භාර දී තිබිණ. ඒ අවස්ථාවේ මාධ්‍ය වාර්තා කළේ, දේශපාලන අධිකාරියේ සහ මහජන උපයෝගිතා කොමිසමේ අනවශ්‍ය මැදිහත්වීම් හේතුවෙන් මෙම ඉල්ලා අස්වීම සිදුවූ බවයි. කෙසේ වෙතත්, රජය පාර්ශවයෙන් එවකට සඳහන් කර තිබුණේ ආචාර්ය සියඹලාපිටිය සේවයෙන් නිවාඩු ලබාගෙන ඇති බව පමණකි.
නව සභාපතිවරයෙකු පත්කිරීමත් සමඟ, සියඹලාපිටියගේ ඉල්ලා අස්වීම නිල වශයෙන් තහවුරු වී තිබේ.
