කොළඹ මහා නගර සභාවේ සමාරම්භක රැස්වීම 2025 ජූනි 16 වන දිනට නිල වශයෙන් නියම කර ඇති බව රජයේ ගැසට් නිවේදනයක් මගින් තහවුරු කර තිබේ.
මැයි 6 වන දින පැවති පළාත් පාලන මැතිවරණයෙන් පසුව, අලුතින් තේරී පත් වූ කොළඹ මහ නගර සභාවේ මංගල රැස්වීම එළඹෙන ජූනි මස 16 වන දින පැවැත්වීමට නියමිත බව ඊට අදාළ ගැසට් නිවේදනය මගින් තහවුරු කෙරිණ.
මේ අතර, බස්නාහිර පළාත් පාලන දෙපාර්තමේන්තුවේ කොමසාරිස්වරයා විසින් නිකුත් කරන ලද ගැසට් පත්‍රයට අනුව, තවත් පළාත් පාලන ආයතන 20ක මංගල රැස්වීම් ද ජුනි මාසයේදී ආරම්භ වීමට නියමිත බව සඳහන් වේ. මෙම ගැසට් නිවේදන නිකුත් කර ඇත්තේ බස්නාහිර පළාත් පාලන කොමසාරිස් සාරංගිකා කල්හාරි විසිනි.
මේ අනුව, කළුතර මහ නගර සභාවේ සහ මිල්ලනිය ප්‍රාදේශීය සභාවේ මංගල සැසිවාරය ද මෙම මස 23 වනදා පැවැත්වෙන බව අදාළ ගැසට් නිවේදනවල දැක්වේ. මීට අමතරව, බස්නාහිර පළාතේ තවත් ප්‍රාදේශීය සභා 8ක සහ එක් නගර සභාවක මංගල රැස්වීම් ආරම්භ වන දින සම්බන්ධයෙන් ද අදාළ ගැසට් නිවේදනවල සඳහන් කර ඇත.
