රුපියල් ලක්ෂ 40ක මහා පරිමාණ සාවද්‍ය පරිහරණයක චෝදනාවට වරදකරු වී, අනුරාධපුර මහ අධිකරණයෙන් බරපතළ වැඩ සහිතව මාස හයක සිර දඬුවම් නියමවූ අපරාධකරුවෙකුට, වෙසක් පොහෝ දින ජනාධිපති සමාව හිමි වී ඇති බවට ‘මොනරා’ පුවත්පත වාර්තා කරයි.
මෙම “මොනරා” පුවත්පතේ හෙළිදරව්ව අනුව, මෙලෙස ජනාධිපති සමාව ලැබී ඇත්තේ, සීබීබී මූල්‍යාතනයේ අනුරාධපුර දිස්ත්‍රික් හිටපු මූල්‍ය කළමනාකරු වන ඩබ්.එම්. අතුල තිලකරත්න නම් පුද්ගලයාටයි. ඔහුට මෙම සිරදඬුවම නියම වී ඇත්තේ වෙසක් පොහොයට දින 10කටත් පෙර, එනම් මැයි 02 වනදාය. මෙවැනි කෙටි කලකින්, දින දහයක් වැනි සුළු කාලයකින් බරපතළ වරදකට වරදකරු වූ අයෙකුට ජනාධිපති සමාව හිමිවීම පිටුපස ඇති සැඟවුණු හස්තය” පිළිබඳව මේ වන විට දැඩි කතාබහක් රට තුළ නිර්මාණය වී ඇත.
එම පුවත්පත වැඩිදුරටත් වාර්තා කරන්නේ, මෙම පුද්ගලයාට එරෙහිව අනුරාධපුර දිස්ත්‍රික් අධිකරණයේ සහ මහ අධිකරණයේ නඩු විස්සකට අධික ප්‍රමාණයක් පවතින බවයි. එපමණක් නොව, මොහු මීට පෙරද මූල්‍ය අපරාධ චෝදනාවලට වැරදිකරු වී සිරදඬුවම් ලැබූ අපරාධකරුවෙකු බව ද හෙළිදරව් වී තිබේ. එසේනම්, මෙවැනි බරපතළ මූල්‍ය වංචාවලට සම්බන්ධ, දිගින් දිගටම අපරාධවල නිරත වූ පුද්ගලයෙකුට ජනාධිපති සමාව ලැබීම තුළින් “ජනාධිපති සමාව” පිළිබඳ සංකල්පයටම නිග්‍රහයක් සිදුවී ඇති බවට සමාජයේ දැඩි විරෝධයක් මතුව තිබේ.
“අනුරගේ ඥාති සංග්‍රහය – ගමේ හොරුන්ට, ඥාති හොරුන්ට ජනපති සමාව” යනුවෙන් පළවන මෙම චෝදනාවන්, රටේ අධිකරණ පද්ධතියේ ස්වාධීනත්වයට සහ යුක්තියට එල්ල වූ බරපතළ පහරක් ලෙස බොහෝ දෙනා අර්ථකථනය කරති.
