විදේශ අමාත්‍ය විජිත හේරත් මෑතකදී ශ්‍රී ලංකාවේ ඉරාන තානාපතිවරයා හමුවී , ඊශ්‍රායලය සහ ඉරානය අතර යෝජිත සටන් විරාමය කෙරෙහි අවධානය යොමු කළ තීරණාත්මක සාකච්ඡාවක නිරත වී තිබේ.
මැදපෙරදිග කලාපයේ කල් පවතින සාමය සහ ස්ථාවරත්වය ළඟා කර ගැනීම සඳහා තිරසාර රාජ්‍ය තාන්ත්‍රික ප්‍රයත්නවල අතිශයින් වැදගත් බව සාකච්ඡා මගින් අවධාරණය කළ බවයි අමාත්‍ය හේරත් සිය නිල X ගිණුමේ සටහනක් තබමින් අවධාරණය කළේ. තවදුරටත් ගැටුම් උත්සන්න වීම කලාපයට සහ ශ්‍රී ලංකාවට සිදුකරන බලපෑම් පිළිබඳව මෙන්ම ඉරානයේ සිටින ශ්‍රී ලාංකිකයින්ගේ ආරක්ෂාව සම්බන්ධයෙන් ගෙන ඇති ක්‍රියාමාර්ග පිළිබඳව ද මෙහිදි සාකච්ඡා වු බව විජිත හේරත් අමාත්‍යවරයා සිය සටහන මඟින් දැනුම් දී ඇත.
මේ අතර ඊශ්‍රායලය සහ ඉරානය අතර ඉදිරි සතියේ සාකච්ඡා පැවැත්වීමට නියමිත බව අමෙරිකානු ජනාධිපති ඩොනල්ඩ් ට්‍රම්ප් ප්‍රකාශ කර තිබේ.
එම සාකච්ඡාචලින් අනතුරුව ගිවිසුමකට ද එළඹීමට හැකි වනු ඇති බව අමෙරිකානු ජනාධිපතිවරයා ප්‍රකාශ කර ඇත.
අමාත්‍ය හේරත් සහ ඉරාන තානාපතිවරයා අතර පැවති හමුව, ජාත්‍යන්තර ගැටුම්, මෙන්ම විශේෂයෙන් ගෝලීය බලපෑමක් ඇති කළ හැකි ගැටුම් සඳහා සාමකාමී විසඳුම් ලබා දීම සඳහා ශ්‍රී ලංකාවේ ක්‍රියාකාරී කාර්යභාරය පෙන්නුම් කරයි.
