හිටපු අමාත්‍ය සිවනේසතුරෙයි චන්ද්‍රකාන්තන් නොහොත් පිල්ලෙයාන් ඝාතන සිද්ධීන් පහකට සම්බන්ධ ද යන්න පිළිබඳව අපරාධ පරීක්ෂණ දෙපාර්තමේන්තුව (CID) පුළුල් විමර්ශනයක් අරඹා ඇත. මෙම සිද්ධීන් අතර පොලිස් නිලධාරියෙකු ඝාතනය කිරීමේ සිද්ධියක්ද ඇතුළත් වන බවට විමර්ශනවලදී තොරතුරු අනාවරණය වී තිබේ. මෙම බරපතල චෝදනා සම්බන්ධයෙන් මේ වන විටත් CID කණ්ඩායම් කිහිපයක් විමර්ශන ආරම්භ කර ඇති බවද වාර්තා වේ.
මෙම විමර්ශන ආරම්භ වී ඇත්තේ නැගෙනහිර විශ්වවිද්‍යාලයේ හිටපු කුලපති මහාචාර්ය සිවසුබ්‍රමනියම් රවින්ද්‍රනාත් පැහැරගෙන ගොස් අතුරුදහන් කිරීමේ සිද්ධිය සම්බන්ධයෙන් CID විසින් සිදුකරන ලද පරීක්ෂණවලදීය. මහාචාර්ය රවින්ද්‍රනාත් අතුරුදහන් කිරීමේ සිද්ධිය සම්බන්ධයෙන් සිවනේසතුරෙයි චන්ද්‍රකාන්තන් මීට පෙර අත්අඩංගුවට ගෙන ඇති අතර, ඔහු මේ වන විට රැඳවුම් නියෝග මත අපරාධ පරීක්ෂණ දෙපාර්තමේන්තුව භාරයේ පසුවෙයි.
නැගෙනහිර විශ්වවිද්‍යාලයේ හිටපු උපකුලපතිවරයා අතුරුදහන් කිරීමේ සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුවේ විශේෂ කණ්ඩායම් කිහිපයක් මඩකළපුව ප්‍රදේශයට යවා ඇති අතර, ඔවුන් සැකකරුවන් කඳවුරු පවත්වාගෙන ගිය ස්ථාන නිරීක්ෂණය කර ඇත. එමෙන්ම, මේ වන විටත් පුද්ගලයන් කිහිපදෙනෙකුගෙන් ප්‍රකාශ සටහන් කරගෙන ඇති බව පොලිසිය පවසයි. අපරාධ පරීක්ෂණ හා මූල්‍ය අපරාධ කොට්ඨාසය භාර ජ්‍යෙෂ්ඨ නියෝජ්‍ය පොලිස්පති අසංග කරවිටගේ උපදෙස් පරිදි, අපරාධ පරීක්ෂණ දෙපාර්තමේන්තුවේ නිලධාරීන් මෙම බරපතල සිද්ධීන් පිළිබඳව වැඩිදුර විමර්ශන පවත්වයි. මෙම විමර්ශන මගින් ඝාතනවලට සම්බන්ධ සත්‍ය තොරතුරු නිරාවරණය කර ගැනීමට අපේක්ෂා කෙරේ.
