පළාත් පාලන මැතිවරණ ප්‍රතිඵලවලින් පසු බලය පිහිටුවීමේදී විපක්ෂය ක්‍රියා කළ ආකාරය පිළිබඳව හිටපු අමාත්‍ය රවි කරුණානායක මහතා ප්‍රසිද්ධියේ සිය අදහස් පළ කළේය. ඔහු පෙන්වා දුන්නේ, විපක්ෂය අධික ලෙස ආත්ම විශ්වාසයකින් කටයුතු කිරීම හේතුවෙන් බොහෝ පළාත් පාලන ආයතනවල බලය ලබා ගැනීමේ අවස්ථාව අහිමි වූ බවයි. මාධ්‍ය හමුවකදී අදහස් දක්වමින් කරුණානායක අවධාරණය කළේ, නිවැරදි ලෙස සාකච්ඡා මාර්ගවලට පිවිසියේ නම්, පළාත් පාලන ආයතන රැසක බලය තහවුරු කර ගැනීමට විපක්ෂයට අවස්ථාව හිමිවනු ඇති බවයි.
වැඩිදුරටත් අදහස් දක්වමින් හෙතෙම මෙසේද පැවැසීය.
”පක්ෂ එකතුවෙලා සාකච්ඡා කරපුවගේ කෙරුම් අපිට පෙනුනානේ. ඔවුන් එක පැත්තකින් කතා කරනවා තව පැත්තකින් පාටි දානවා. මේ අවස්ථාවේ මොළේ ඇතිව කටයුතු කළා නම් මේ වැඩේ වෙනවා. හැබැයි මේකෙදි වුනේ යම් අය අධි තක්සේරුවෙන් කටයුතු කළා. ඒක නිසා තමයි අපි එදා ඉඳන් කීවේ. අපි මේ ගැන බැරිවෙලාවත් කට ඇරියා නම් කියයි කට ඇරපු නිසා මෙහෙම වුනා කියලා. නමුත් ඔවුන්ගේ කෙරුම් නිසා අපිට දැන් කතා කරන්න අවස්ථාව ඇවිල්ලා තියෙන්නේ. ඒ වගේමයි ඇතැම් අවස්ථාවල බලය පිහිටුවීමේදී නීත්‍යනුකූලව කොහොමද වුණේ නැත්තේ කියලා ප්‍රශ්නයක් තියෙනවා. ඒ සම්බන්ධයෙන් අපිත් නීත්‍යනුකූලව කටයුතු කරගෙන යනවා. නමුත් මීට වඩා පෙර සූදානමින් වෙන්න තිබුණා. අවදානම ගැන බලාගෙන කටයුතු කරන්න විපක්ෂයට තිබුණා.
මුලින්ම ජනතා විමුක්ති පෙරමුණ කිවේ අපි කාත් එක්කවත් අත්වැල් බැඳගන්නේ නෑ කියලා. හැබැයි මේ වෙද්දි අතක් අල්ලලා නැති පක්ෂයක් නෑ. එතකොට එදා කීව එකයි අද එකයි ඔක්කොම එකතුවෙලා වැඩේ කරලා තියෙනවා. නැවත පුරුදු දේශපාලනයට ඇවිල්ලා තියෙන්නේ. සාමාන්‍ය සුපුරුදු දේශපාලන ගමන ඔවුනුත් යනවා. ඒ නිසා මේක ඡන්ද කාලෙදී වේදිකාවල සීමා වෙන දෙයක් .මේක නාමිකව එකතුවීමක් නෙවෙයි ප්‍රායෝගිකව එකතුවීමක්. විපක්ෂය හිතනවා ඔවුන් හිතන විදිහටම වෙයි කියලා. ඔවුන් එහෙම අධි තක්සේරුවෙන් කටයුතු කරපු නිසායි අද මෙහෙම වුණේ.”
