ප්‍රේම කීර්ති ද අල්විස් ගේ බිරිඳ නිර්මලා ද අල්විස් පෙරේදා (22) අභාවප්‍රාප්ත වූවාය . ෆ්‍රේම් නොවූ ප්‍රේම් හට ජීවත්ව සිටි කාලයේ ප්‍රාණසම බිරිඳක් වූ ඇය කලක් ගිලන්ව රෝහල්ගතව ප්‍රතිකාර ලබමින් සිටියාය .
නිර්මලාගේ පුතණුවන් වන පූර්ණ ද අල්විස් විසින් නිර්මලාගේ දේහයේ පින්තූරයක් සමග තැබූ සටහනකට ජවිපේ පැරණිතම සාමාජිකයෙකු වන නන්දන ගුණතිලක මෙසේ සටහනක් එක් කොට තිබේ .
” සමස්ත ව්‍යාපාරය වෙනුවෙන් – කිසි විටෙක දිය නොහැකි සමාව නිර්මලා මා ඔබෙන් ඉල්ලා සිටිමි.
එම සිදුවීමට අංශු මාත්‍රයකිනුදු මා පෞද්ගලිකව සම්බන්ධ නැත.
එහෙත් එදා ඒ අමනෝඳ තීරණ ගත් එම ව්‍යාපාරයේ සක්‍රීය සාමාජිකයන්ව අප කටයුතු කළෙමු .
එය එසේ වූ බව ඔබේ පුත්‍රයා මගින් ඔබට ඒත්තු ගන්වන්නට මා කෙතෙක් උත්සාහ දැරුවත් අවාසනාවකට ඔබ නික්ම ගියේ ඒ වසන් කල සත්‍යය තේරුම් ගත නොහැකිවය .
වරක් කිඳෙල්පිටිය විහාරයේ පැවති සමරුවකට ඔබේ පුත්‍රයාගෙන් මට ද ආරාධනා ලැබුණු විට මා එහි ආවේ මැඩගත නොහැකි වරදකාරී හැඟීමක් සහිතව බව සිහිපත් වේ ..
ඔබව අවසන්වර දැකගන්නට ගෞරවය දක්වන්නට ඔබේ දෙන අසලට පැමිණෙන්නට මගේ දෙපා පැකිලේ ..
බලහත්කාරයෙන් ජීවිතය පැහැරගනු ලැබූ ස්වාමිපුරුශයකුගේ ආදරයද , වියෝ දුකද , බර ද උහුලමින් පූර්ණට යහපතම කියාදුන් මවක ලෙස ඔබ මේ වන විටද මුළුමහත් සමාජයේම ගෞරවය දිනා අවසන් ය .. !!!
ඔබ වැනි මව්වරුන් දසදහස් ගණනක් උතුරේද දකුණේද තම පවුල්වල සුරක්ෂිතභාවය වෙනුවෙන් පොරබැදූ බව , අඛණ්ඩව පොරබදිමින් ඉන්නා බව මේ මොහොතේ ඔබටද ඔවුනටද ගෞරවයක් ලෙස සටහන් කරමි ..
දැන් කල හැකි කිසිවක්ම නැත ..
ඔබට ඔබ පැතූ අරමුණු ඉටු වේවා ..!!! ”
ඇතැම් විට මේ නිර්මලා සුවසේ නිදන්නේ සිය සැමියාගේ ඝාතකයන් තවමත් නිදැල්ලේ නිදහසේ හුස්ම ගනිමින් හිඳින අවකාශයක විය හැක . සත්‍ය යටගැසූ දේශපාලන ද්‍රෝහීන් මුලු රටක බලය අල්ලාගත් අවස්ථාවක විය හැක . සැබවින්ම නිර්මලා මේ නිදන්නේ ප්‍රේම්ගේ ඝාතකයින් ඇයව දේශපාලන වේදිකාවක සුබසාධනය උදෙසා අමු අමුවේ අවභාවිතා කළ කාලාන්තරයකට පසුවය . නිර්මලා පැතූ ප්‍රේමය අහිමි වී ගිය යුග ගණනකට පසු නැවත ඈ හට ප්‍රේමයේ කීර්තිය සොයාගන්නට හැකි වේවා යි පතමු !
