2025 පළමු කාර්තුවේදී මෙරට රැකියා විරහිත පුද්ගලයන් 322,331ක් වාර්තා වී ඇති අතර, එම කාර්තුවේදී අවුරුදු 15–24ත් අතර තරුණ විරැකියා අනුපාතය 19.7%ක් බවත්, එය සියලු වයස් කාණ්ඩ අතර වාර්තා වී ඇති ඉහළම විරැකියා අනුපාතය බවත් ජනලේඛන හා සංඛ්‍යාලේඛන දෙපාර්තමේන්තුව පවසයි.
මෙරට සියලු වයස් කාණ්ඩවල සහ සමස්ත අධ්‍යාපන මට්ටම්වල කාන්තාවන් අතර විරැකියාව පිරිමින්ට වඩා ඉහළ මට්ටමක පවතින බවත්, රටේ සමස්ත විරැකියාවට තරුණ හා කාන්තා විරැකියාව වැඩි දායකත්වයක් සපයන බවත් ජනලේඛන හා සංඛ්‍යාලේඛන දෙපාර්තමේන්තුවේ 2025 වසරේ පළමු කාර්තුවට අදාළ ශ්‍රම බලකා සංඛ්‍යාලේඛන මඟින් හෙළි වේ.
2025 පළමු කාර්තුවේදී මෙරට ආර්ථික වශයෙන් ක්‍රියාකාරි ජනගහනයෙන් 65.4%ක් පිරිමින් වන අතර, 34.6%ක් කාන්තාවෝය. ආර්ථික වශයෙන් අක්‍රිය ජනගහනයෙන් 27.6%ක් පිරිමින් වන අතර, 72.4%ක් කාන්තාවෝය.
