විෂමාචාර චෝදනා එල්ල වී සිටින තිලින ගමගේ මහේස්ත්‍රාත්වරයා සමග ළඟින්ම සබඳතා පැවැත්වූ හිටපු ජ්‍යේෂ්ඨ අමාත්‍යවරයකුගේ පුත්‍රයෙක් වන නීතීඥයකු සහ තවත් නමගිය නීතීඥයින් පිරිසක් පසුපස අධිකරණ කොමිසමේ විමර්ශකයින් ඉව අල්ලමින් සිටින බව ආරංචිවේ.
මේ අතරම තමන් තිලින ගමගේගේ නීතීඥයා වශයෙන් තැන තැන කියමින් ගිය අයෙක් මෙන්ම නමට ගමගේ කොටසක් ඇති අයෙකු ද සිටින බවත් රාවයක් පවතී.
ලංකාවේ ප්‍රසිද්ධ ව්‍යාපාරිකයින් දෙදෙනෙකු විසින් මෙම නීතීඥවරුන්ට එරෙහිව ලැබී ඇති පැමිණිලි දෙකක් ඉදිරිපත් කර ඇති අතර ඔවුන් පැමිණිලි කර ඇත්තේ මුදල් ලබාගැනීමේ සිද්ධි සම්බන්ධයෙන් බවත් ආරංචිමාර්ග වැඩිදුරටත් අනාවරණය කරයි.
නීතිවිරෝධී ලෙස අලි පැටවකු ළඟ තබාගැනීමේ සිද්ධියට අදාළව විෂමාචාර චෝදනා ඇතුළත් චෝදනා පත්‍රයක් තිලින ගමගේ මහතාට අධිකරණ සේවා කොමිෂන් සභාව විසින් පසුගිය ජුනි මාසයේදී යොමුකර තිබුණු අතර ඔහුව සේවයෙන් පහකිරීමට පසුගියදා අධිකරණ සේවා කොමිසම කටයුතු කර තිබිණ.
