නාගරික සංවර්ධන, ඉදිකිරීම් සහ නිවාස අමාත්‍යාංශයේ ප්‍රගතිය මේ වසරේ (2025) දී සියයට 12ක් වැනි ඉතා දුර්වල මට්ටමක පවතින බව මුදල් අමාත්‍යාංශයේ රාජ්‍ය ආයෝජන අධීක්ෂණ හා ඇගයීමේ කමිටුව සඳහන් කරයි. මෙම අමාත්‍යාංශය සඳහා රුපියල් බිලියන 100ක ප්‍රාග්ධනයක් වෙන් කර තිබුණත්, ජූනි මස 30 වන විට වැය කර ඇත්තේ රුපියල් මිලියන 12,452 ක් පමණක් බවද එම කමිටුව තහවුරු කරයි.
රාජ්‍ය ආයෝජන මත ක්‍රියාත්මක වන සංවර්ධන ව්‍යාපෘතිවල ගැටලු සහ ප්‍රමාදයන් වළක්වා ගනිමින් අපේක්ෂිත ප්‍රතිඵල මහජනතාවට ළඟා කර දීම මෙම කමිටුවේ අරමුණයි.
ඒ අනුව, අමාත්‍යාංශයේ කටයුතු දුර්වල බැවින් ඉදිරි මාසවල වියදම් පුරෝකථනයක් ඉදිරිපත් කරන ලෙස කමිටුව අමාත්‍යාංශ ලේකම්වරයාට දැනුම් දී ඇත.
මෙම කමිටුවේ සම සභාපතිවරුන් ලෙස උසස් අධ්‍යාපන, අධ්‍යාපන හා වෘත්තීය අධ්‍යාපන අමාත්‍යාංශයේ ලේකම් නාලක කලුවැව සහ ජනාධිපති ලේකම් කාර්යාලයේ ජ්‍යෙෂ්ඨ අතිරේක ලේකම් ජී.එම්.ආර්.ඩී.අපෝන්සු කටයුතු කරති.
