ඉන්ධන ලීටරයකින් අය කරන රුපියල් 50ක අමතර බද්දක් වහාම ඉවත් කරන බවට පසුගිය ජනාධිපතිවරණ සමයේදී දුන් පොරොන්දුව ඉටු කිරීමට නොහැකිවීම සම්බන්ධයෙන් බලශක්ති අමාත්‍ය කුමාර ජයකොඩි මහතා, දෙරණ නාලිකාවේ පැවති සාකච්ඡාවකදී සිය අදහස් පළ කළා.
ජනාධිපතිවරයා මැතිවරණ වේදිකාවේදී ප්‍රකාශ කළේ ඉන්ධන ලීටරයකට රුපියල් 50ක විශේෂ බද්දක් (Special Levy) සහ ඊට අමතරව තවත් බදු වර්ග අධික සංඛ්‍යාවක් පවතින බවයි. මෙම බද්ද අය කරනු ලබන්නේ ශ්‍රී ලංකා ඛනිජ තෙල් නීතිගත සංස්ථාව (CPC) සතු රුපියල් බිලියන 884ක ණය මුදලක් භාණ්ඩාගාරය විසින් පවරාගෙන ඇති බැවිනි. එම ණය පියවීම සඳහා භාණ්ඩාගාරය විසින් සෑම පෙට්‍රල් සහ ඩීසල් ලීටරයකින්ම මෙම රුපියල් 50ක බද්ද අය කරනු ලබයි. ජනාධිපතිවරයා එම ක්‍රියාවලිය “මරු වැඩක්” ලෙස හඳුන්වමින්, කෙටි කාලයක් තුළ මෙම බද්ද අඩු කර ජනතාවට සහනයක් ලබා දෙන බවට පොරොන්දු විය.
මාධ්‍යවේදී කරුණාරත්න මහතා, ජනාධිපතිවරයාගේ “මරු වැඩේ” කෙටි කලකින් නැවැත්වීමට නොහැකි වූයේ මන්දැයි ප්‍රශ්න කළ විට, අමාත්‍ය කුමාර ජයකොඩි මහතා පැහැදිලි කළේ, එම රුපියල් බිලියන 884ක ණය මුදල සම්පූර්ණයෙන්ම ගෙවා අවසන් වනතුරු මෙම රුපියල් 50ක බද්ද අඩු කළ නොහැකි බවයි.
අමාත්‍යවරයා වැඩිදුරටත් සඳහන් කළේ, දැනට එම ණය මුදලින් 30%ත් 40%ත් අතර ප්‍රමාණයක් ගෙවා අවසන් කර ඇති බවට තමා අනුමාන කරන බවයි. මාධ්‍යවේදියා විසින් ජනාධිපතිවරයා “කෙටි කාලයක්” යන්නෙන් අදහස් කළද, මේ වන විට මාස 11-12ක පමණ කාලයක් ගත වී ඇති බව පෙන්වා දුන් විට, අමාත්‍යවරයා පිළිගත්තේ මෙම තත්ත්වය වත්මන් ආණ්ඩුව විසින් ඇති කළ එකක් නොවන නමුත්, එය මැතිවරණ වේදිකාවේදී විවේචනයට ලක් වූ බවයි. ණය සම්පූර්ණයෙන් ගෙවා අවසන් වනතුරු මෙම බද්ද අය කිරීමට සිදුවන බව ඔහු නැවත තහවුරු කළේය.
