අල්ලස් හෝ දූෂණ චෝදනා විමර්ශන කොමිෂන් සභාවේ සභාපතිවරයා ලෙස රංග දිසානායක මහතා ආණ්ඩුක්‍රම ව්‍යවස්ථා සභාව විසින් පත් කිරීම මේ වන විට බරපතල ප්‍රශ්න ගණනාවක් මතු කර තිබෙනවා. සාමාන්‍යයෙන් මෙවැනි වැදගත් තනතුරු සඳහා පත්කිරීම් සිදුවන්නේ ජනාධිපතිවරයා විසින් යෝජනා කරන නමක් මතයි. කෙසේ වෙතත්, මෙම පත්වීම සම්බන්ධයෙන් නෛතික විනිවිදභාවය සහ සාධාරණත්වය පිළිබඳව බරපතල සැකයක් පවතින බව පෙනී යනවා.
වැඩිම ලකුණු ලැබූ තැනැත්තා පත් නොකිරීම
වාර්තාවන්ට අනුව, මෙම තනතුර සඳහා රජය විසින් පවත්වන ලද ලිඛිත පරීක්ෂණයෙන් සහ සම්මුඛ පරීක්ෂණයෙන් වැඩිම ලකුණු ලබාගෙන ඇත්තේ නීතිපති දෙපාර්තමේන්තුවේ සේවය කළ මාධව තෙන්නකෝන් මහතායි. නමුත් ව්‍යවස්ථාදායක සභාව විසින් පත් කර ඇත්තේ ඒ මහතා නොව, රංග දිසානායක මහතායි. මෙම තීරණයට හේතු වී ඇත්තේ කුමක්දැයි යන්න මේ වන තෙක් පැහැදිලි නැහැ. මෙම තත්වය මගින් පත්වීමේ ක්‍රියාවලියේ විනිවිදභාවය පිළිබඳව බරපතල ප්‍රශ්නයක් මතු කරනවා. තවදුරටත්, රටේ නීතිය හා සාමය සුරැකීමට වගකිව යුතු ආයතනයක ප්‍රධානියා පත් කිරීමේදී මෙවැනි දේශපාලන මැදිහත්වීම් සිදුවීම බරපතල තත්ත්වයක්.
දේශපාලන හිතවත්කම් මත සිදුවූ පත්වීමක්ද?
තොරතුරුවලට අනුව, රංග දිසානායක මහතා අධ්‍යක්ෂ ධූරයට පත්වීමට පෙර බලපිටිය මහාධිකරණයේ විනිසුරුවරයකු ලෙස කටයුතු කළා. ඔහු අනුර දිසානායක මහතා ජනාධිපති වීමට පෙර සිටම ජනතා විමුක්ති පෙරමුණේ හිතවතකු ලෙස කටයුතු කළ බවට චෝදනා එල්ල වනවා. එවැනි සමීප දේශපාලන සබඳතා හේතුවෙන් මෙවැනි තනතුරක් ලැබීම සාධාරණද යන්න පිළිබඳව සමාජයේ විවිධ පාර්ශ්වයන් තුළ දැඩි විවේචනයක් පවතිනවා. මේ ආකාරයෙන් දේශපාලන පත්වීම් සිදු කිරීම රටේ අධිකරණයේ ස්වාධීනත්වයට සහ රාජ්‍ය ආයතනවල විනිවිදභාවයට දැඩි හානියක් සිදුකළ හැකියි.
අධිකරණයේ මැදිහත්වීම
මේ සම්බන්ධයෙන්, එක්තරා ස්වාමීන් වහන්සේ නමක් විසින් ශ්‍රේෂ්ඨාධිකරණයේ මූලික අයිතිවාසිකම් නඩුවක් ගොනු කර තිබෙනවා (නඩු අංක: SC FR 29/2025 – 23 September). මෙම නඩුව මගින් රංග දිසානායක මහතාගේ පත්වීම නීත්‍යානුකූල නොවන බවට ප්‍රශ්න කර ඇති අතර, අගමැති සහ නීතිපති ඇතුළු පිරිසකට නොතීසි නිකුත් කිරීමට අධිකරණය කටයුතු කර තිබෙනවා. මෙය මෙම පත්වීම තවමත් නීත්‍යානුකූල අභියෝගයකට ලක් වී ඇති බවට තවත් සාක්ෂියක්.
මෙවැනි තීරණාත්මක සිදුවීම් සම්බන්ධයෙන් ප්‍රධාන ධාරාවේ මාධ්‍ය නිහඬව සිටීම මහජනතාවට ඇති තොරතුරු දැනගැනීමේ අයිතියට විශාල අසාධාරණයක්. මෙම පත්වීම සම්බන්ධයෙන් ඇතිවන නෛතික සහ සදාචාරාත්මක ගැටලු පිළිබඳව විවෘත සහ විනිවිදභාවයෙන් යුතුව සාකච්ඡා කිරීම සමාජයක ප්‍රජාතන්ත්‍රවාදී අයිතිවාසිකම්වලට ඉතා වැදගත්. මෙවැනි තීරණාත්මක සිදුවීම් සම්බන්ධයෙන් වැඩිදුරටත් අවධානය යොමු කිරීම ද ඒ හා සමානව ම වැදගත්කමක් දරනවා.
විශේෂ ලියුම්කරුවෙක් විසිනි
