සෞඛ්‍ය අමාත්‍යාංශයේ වාහන පිරිසුදු කිරීමට රියැදුරන්ට මාසිකව ලබාදෙන වාහන සේදුම් කාරක, සබන් ඇතුළු පැකේජය වියදම් අවම කිරීම සඳහා දැනට මාස හයක සිට නතර කර ඇතැයි තොරතුරු අනාවරණය වේ.
සවරින් බාර් කැට දෙකක්, සේදුම් කාරක බෝතල් දෙකක්, සුවඳ සබන් කැට දෙකක්, ලේන්සුවක් ආදී වශයෙන් පැකේජයක් මාසිකව රියැදුරන්ට ලබා දුන්නේය.
මාස හයක් තිස්සේ මෙම ද්‍රව්‍ය නොලැබීම නිසා අමාත්‍යාංශයේ රියැදුරන්ට සිය පෞද්ගලික මුදලින් වාහන පිරිසුදු කිරීමට සිදුවී ඇතැයි පැවසේ.
වාහන පිරිසුදු කරන සේදුම් කාරක ඇතුළු දෑ මෙමස 31 වැනිදා වනවිට ලබාදීමට කටයුතු නොකළහොත්, ලබන සැප්තැම්බර් මාසයේ සිට වාහන පිරිසුදු නොකර ධාවනය කිරීමට සිදුවන බවද සෞඛ්‍ය අමාත්‍යාංශයේ රියැදුරෝ කියා සිටිති.
සෞඛ්‍ය අමාත්‍යාංශයට අමතරව, මධ්‍යම රජය යටතේ පාලනය වන ඇතැම් රෝහල්වලද ගිලන් රථ ඇතුළු වාහන සඳහා රියැදුරන්ට ලබාදෙන මෙම පැකේජය අත්හිටුවා ඇතැයිද අමාත්‍යාංශයේ රියැදුරෝ පවසති.
වාහන පිරිසුදු කරන සේදුම් කාරක ඇතුළු දෑ ලබාදීමට කඩිනමින් කටයුතු කරන ලෙස ඉල්ලා සෞඛ්‍ය අමාත්‍යාංශයේ ගිලන් රථ රියැදුරන්ගේ සංගමය එම අමාත්‍යාංශයේ බලධාරීන්ගෙන් ඉල්ලීමක්ද කර ඇත.
