වසර හයකට පසු අමෙරිකානු ජනාධිපති ඩොනල්ඩ් ට්‍රම්ප් සහ රුසියානු ජනාධිපති ව්ලැඩිමීර් පුටින් අමෙරිකාවේ ඇලස්කා ප්‍රාන්තයේ ඇන්කරේජ් හි එක්සත් ජනපද හමුදා කඳවුරකදී හමුවිය.
මෙරට වේලාවෙන් අද අලුයම පැය 3 කට ආසන්න කාලයක් පැවති සාකච්ඡා වලින් අනතුරුව ජනාධිපතිවරුන් දෙදෙනා ඒකාබද්ධ මාධ්‍ය හමුවක්ද පැවැත්වුවේය.
එහිදී අමෙරිකානු ජනාධිපතිවරයා පැවසුවේ, සාකච්ඡාවලදී ඔවුන් කිසිඳු ගිවිසුමක් අත්සන් නොකළ බවයි.
එහෙත්, සාකච්ඡා ඵලදායී බවත් එමගින් සාකච්ඡාවල ප්‍රගතියක් අත්කරගත් බව ද ඇමරිකානු ජනාධිපතිවරයා පවසා තිබේ.
යුක්‍රේන යුද්ධයේ සිට න්‍යෂ්ටික අවි ගිවිසුමක් දක්වා මාතෘකා පිළිබඳව සාකච්ඡා කර ඇති අතර ඒ පිළිබඳ කිසිඳු විස්තරයක් එම මාධ්‍ය හමුවේදී ප්‍රකාශ කර නොමැත.
යුක්‍රේන ජනාධිපති වොලොඩිමියර් සෙලෙන්ස්කි සහ නේටෝ නායකයින්ට මේ බව දැනුම් දෙන බව ද අමෙරිකානු ජනාධිපතිවරයා පවසා තිබේ.
එම මාධ්‍ය හමුවේදී රුසියානු ජනාධිපතිවරයා පවසා ඇත්තේ යුක්‍රේනියානුවන් සහ යුරෝපීයයන් සාම ක්‍රියාවලියට බාධා නොකරනු ඇතැයි තමන් බලාපොරොත්තු වන බවයි.
රුසියාවට තමන්ගේම අවශ්‍යතා ඇති බව ට්‍රම්ප් තේරුම් ගත් බවද රුසියානු ජනාධිපතිවරයා පවසා තිබේ.
