ඇමරිකා එක්සත් ජනපදයේ කොලරාඩෝ ප්‍රාන්තයේ හාවුන් අතර නව වෛරසයක් පැතිර යමින් සිටින බව විදෙස් මාධ්‍ය වාර්තා කරයි.
“ෂොපේ පැපිලෝමා” නමින් හැඳින්වෙන මෙම වෛරසය සහිත හාවුන්ගේ මුහුණුවලින් ‘අං’ මෙන් නෙරාඑන ඉන්නන් වර්ගයක් වර්ධනය වීමෙන් වසංගත තත්ත්වය හට ගෙන ඇතැයි වාර්තා වේ.
‘ෆ්‍රැන්කන්ස්ටයින් බනීස්’ (Frankenstein bunnies), යක්ෂ හාවන් (demon rabbits) සහ “සොම්බි හාවන් (zombie) යනුවෙන් අන්වර්ථ නාම් රැසකින් මෙම සතුන් හඳුන්වනු ලබන බව විදෙස් මාධ්‍ය වාර්තා කරයි.
මෙම සත්වයින් බොහෝමයක් ප්‍රසිද්ධියට පත්ව ඇත්තේ ඩෙන්වර් සිට සැතපුම් 65ක් උතුරින් පිහිටි ෆෝර්ට් කොලින්ස් ප්‍රදේශයේ පදිංචිකරුවන් විසින් ඡායාරූප පළ කිරීම නිසාවෙනි.
කොලරාඩෝ උද්‍යාන සහ වනජීවී ප්‍රකාශිකාවක් වන කාරා වැන් හූස් පවසා ඇත්තේ, මෙම වෛරසය ප්‍රධාන වශයෙන් මැක්කන් සහ කිනිතුල්ලන්ගෙන් පැතිර යන බවත්, එය මිනිසුන්ට හෝ ගෘහස්ථ සුරතල් සතුන්ට ආසාදනය නොවන බවත්ය.
මෙම වෛරසය ඉන්නන්ට සමාන නමුත් ඒවා දිගු වුවහොත් ‘අං’ මෙන් දර්ශනය වන බව ද කාරා වැන් හූස් පවසා තිබේ.
විද්‍යාඥයින්ගේ විස්තර අනුව, මෙය බිය විය යුතු මරණාන්ත රෝගයක් නොව, ලොම් සහිත සතුන් අතර සාමාන්‍යයෙන් මතුවන පොදු වෛරසයක් වෙයි.
