කාන්තා හා ළමා කටයුතු අමාත්‍යාංශය විසින් සියලු දිස්ත්‍රික් සහ ප්‍රාදේශීය සම්බන්ධීකරණ කමිටුවලට අනුබද්ධව ‘කාන්තා සහ ළමා අනුකමිටු’ පිහිටුවීමට පියවර ගෙන ඇත. ඒ අනුව, කළුතර දිස්ත්‍රික් සම්බන්ධීකරණ කමිටුවේ කාන්තා සහ ළමා අනුකමිටුව එහි සභාපතිනි ගරු පාර්ලිමේන්තු මන්ත්‍රිනී නිලන්ති කොට්ටහච්චි මහත්මියගේ ප්‍රධානත්වයෙන් පසුගියදා රැස් විය.
ළමා හා කාන්තා අයිතිවාසිකම් සුරැකීම සඳහා ඒකාබද්ධ ප්‍රවේශයක් ඇති කිරීම, කාන්තා හා ළමා ඒකක ‘ළමා මිතුරු’ ඒකක ලෙස සංවර්ධනය කිරීම, සහ පාසල් නොයන ළමුන් නැවත පාසල් පද්ධතියට එක් කිරීම සඳහා අරමුදලක් පිහිටුවීම ඇතුළු යෝජනා ගණනාවක් පිළිබඳව මෙහිදී අවධානය යොමු විය.
මේ සඳහා ළමා හා කාන්තා කටයුතු අමාත්‍යාංශය, ජාතික ළමාරක්ෂක අධිකාරිය, පළාත් පරිවාස දෙපාර්තමේන්තුව, සහ පොලිස් ළමා හා කාන්තා කාර්යාංශය වැනි විවිධ ආයතන නියෝජනය කරමින් නිලධාරීන් සහභාගී වී සිටියහ.
මීට අමතරව, පෙර පාසල් ගුරුවරුන් සඳහා වාර්ෂික අනිවාර්ය පුහුණු වැඩසටහන් පැවැත්වීම සහ වයස අවුරුදු 0-3 දක්වා දරුවන්ගේ මුල් ළමාවිය සංවර්ධනය සඳහා විධිමත් වැඩසටහන් ක්‍රියාත්මක කිරීම පිළිබඳවද දීර්ඝ ලෙස සාකච්ඡා කර ඇත.
කාන්තාවන් සහ ළමුන් මුහුණ දෙන අපරාධ, අපයෝජන, මත්ද්‍රව්‍ය භාවිතය සහ ළමා මව්වරුන් සම්බන්ධ සමාජ ගැටලු පිළිබඳවද මෙහිදී අවධානය යොමු විය.
ඉදිරියේදී, රජයේ නියාමනය සහිත කාන්තා සුරක්ෂා රැඳවුම් මධ්‍යස්ථානයක්, කාන්තා ව්‍යවසායකයන් සඳහා වෙළෙඳපොළක් සහ ආපන ශාලාවක් දිස්ත්‍රික්කයේ ස්ථාපිත කිරීමටද මෙම කමිටුවේදී තීරණය විය. මෙම යෝජනා ඉදිරි දිස්ත්‍රික් සම්බන්ධීකරණ කමිටුවේ අනුමැතිය සඳහා ඉදිරිපත් කිරීමට නියමිතය.
