ගොවීන් සඳහා පොහොර සහනාධාරය ඩිජිටල් ක්‍රමවේදයක් ඔස්සේ ක්‍රියාත්මක කිරීමට අමාත්‍ය මණ්ඩල අනුමැතිය හිමිව තිබෙනවා.
මෙම තීරණය ගනු ලැබුවේ, රජයෙන් ගොවීන්ට ලබා දෙන සහනාධාරය නිසි වේලාවට ලැබෙන බවත්, එම මුදල් සම්පූර්ණයෙන්ම පොහොර මිලදී ගැනීම සඳහාම යොදා ගන්නා බවත් තහවුරු කරගැනීමේ අරමුණින්. ඒ සඳහා QR කේතයක් හෝ ඊට සමාන ඩිජිටල් ක්‍රමවේදයක් භාවිත කිරීමට නියමිතයි.
මේ යටතේ, පොහොර සහනාධාර වැඩසටහන සඳහා සුදුසුකම් ලබන සියලු ගොවීන් කෘෂිකර්ම අමාත්‍යාංශයේ ප්‍රාදේශීය නිලධාරීන් මඟින් හඳුනාගැනෙනු ඇත. ඉන් පසු, එම ගොවීන්ට සහනාධාරය ලබා දීම සඳහා QR කේතය හෝ වෙනත් සුදුසු ඩිජිටල් යාන්ත්‍රණයක් සකස් කිරීමට නියමිතයි.
ජනාධිපතිවරයා සහ කෘෂිකර්ම, පශු සම්පත්, ඉඩම් සහ වාරිමාර්ග අමාත්‍යවරයා ඒකාබද්ධව ඉදිරිපත් කළ මෙම යෝජනාවට අමාත්‍ය මණ්ඩලයේ අනුමැතිය හිමිව තිබෙනවා.
