2025 වර්ෂය සඳහා ලියාපදිංචි කිරීමට ඉල්ලීම් කර ඇති නව දේශපාලන පක්ෂවල සම්මුඛ පරීක්ෂණ මේ වන විට ආරම්භ කර ඇති බව මැතිවරණ කොමිෂන් සභාව පවසයි.
එහි කොමසාරිස් ජනරාල් සමන් ශ්‍රී රත්නායක මහතා සඳහන් කළේ, දේශපාලන පක්ෂ 47ක් මූලික සම්මුඛ පරීක්ෂණ සඳහා තෝරාගෙන ඇති බවය.
මේ වසර සඳහා දේශපාලන පක්ෂ ලියාපදිංචි කිරීමට පසුගිය පෙබරවාරි මාසයේ ඉල්ලුම්පත් කැඳවීම සිදුකළ අතර එහිදී ඉල්ලුම්පත් 83ක් ඉදිරිපත්වී තිබුණි.
එම ඉල්ලුම්පත් 83 අතුරින් ඉල්ලුම්පත් 36ක් මූලික කරුණු පවා සපුරා නොතිබීම හේතුවෙන් ප්‍රතික්ෂේප කළ බව මැතිවරණ කොමසාරිස් ජනාරාල් සමන් ශ්‍රී රත්නායක මහතා සඳහන් කළේය.
ඒ අනුව ඉල්ලුම්පත් 47ක් සම්බන්ධයෙන් මූලික සම්මුඛ පරීක්ෂණ කටයුතු මේ දිනවල සිදුවන අතර එම සම්මුඛ පරීක්ෂණවලින් තෝරාගන්නා පක්ෂ සඳහා දෙවන වටයේ සම්මුඛ පරීක්ෂණවලට යොමුකිරීමට නියමිතය.
එම සම්මුඛ පරීක්ෂණවලින් අනතුරුව තෝරා ගන්නා පක්ෂ 2025 වර්ෂය සඳහා නව දේශපාලන පක්ෂ ලෙස ලියාපදිංචි කිරීම සිදුකරන බව මැතිවරණ කොමිෂන් සභාව සඳහන් කළේය.
මේ වන විට දේශපාලන පක්ෂ 86ක් පිළිගත් දේශපාලන පක්ෂ ලෙස පවතී.
