වෙන්නප්පුව පොලිසිය ආසන්නයේ පිහිටි වැව පාර ප්‍රදේශයේදී අද (අගෝස්තු 31) පෙරවරු 10:30ට පමණ වෙඩි තැබීමක් සිදුව තිබේ. මෙම සිදුවීමෙන් එක් පුද්ගලයෙකු ජීවිතක්ෂයට පත් වූ අතර, තවත් අයෙකු තුවාල ලබා පළා ගොස් ඇත.
පොලිස් වාර්තා අනුව, මොටර් රථයකින් පැමිණි පිරිසක් යතුරුපැදියකින් ගමන් කරමින් සිටි පුද්ගලයන් දෙදෙනෙකුගේ යතුරුපැදිය අනතුරට පත් කර ඇත. අනතුරෙන් පසු ඔවුන්ට තියුණු ආයුධවලින් පහර දී, රිවෝල්වර වර්ගයේ ගිනි අවියකින් වෙඩි තබා ඇති බව සඳහන් වේ.
මියගිය පුද්ගලයා මහාධිකරණයේ නඩුවකට අදාළව වෙන්නප්පුව පොලිසියේ අත්සන් කිරීමට පැමිණ ආපසු යමින් සිටියදී මෙම ඝාතනයට ලක්ව තිබේ. ඔහුගේ නඩුව සම්බන්ධයෙන් අධිකරණ තීන්දුව සැප්තැම්බර් 9 වන දින ලැබීමට නියමිතව තිබූ බවද පොලිසිය වැඩිදුරටත් සඳහන් කරයි.
සිද්ධිය සම්බන්ධයෙන් වැඩිදුර විමර්ශන කටයුතු මේ වන විට සිදු කෙරේ.
