ජනාධිපති අනුර කුමාර දිසානායක අද (02) දෙවන දිනටත් උතුරු පළාතේ සංචාරයකට එක්වෙමින් සංවර්ධන ව්‍යාපෘති කිහිපයක් ආරම්භ කළේය.
ලෝක පොල් දින සැමරුමට සමගාමීව “රටම සරු කරයි නිරතුරු – කප්තුරු සවිය” වැඩසටහන පුදුකුඩුඉරිප්පු නගරයේදී ජනාධිපතිවරයාගේ ප්‍රධානත්වයෙන් ආරම්භ විය. මේ යටතේ 2025 වසරේදී උතුරු පළාතේ පොල් වගා කරන ප්‍රමාණය අක්කර 16,000 දක්වා ඉහළ නැංවීමටත්, 2027 වන විට එය අක්කර 50,000 දක්වා වැඩි කිරීමටත් සැලසුම් කර ඇත.
මේ හා සමගාමීව, උතුරේ පළමු බීජ පොල් නිෂ්පාදන ඒකකය පලෙයි නගරයේදී විවෘත කිරීම සහ පොල් සංවර්ධන අධිකාරිය මගින් පැවැත්වෙන පොල් ආශ්‍රිත ප්‍රදර්ශනය විවෘත කිරීමද ජනාධිපතිවරයා අතින් සිදු කෙරිණි.
මුලතිව් දිස්ත්‍රික්කයේ පිහිටි වට්ටුවාකල් පාලමේ ඉදිකිරීම් කටයුතු ද අද දින ජනාධිපතිවරයා විසින් ආරම්භ කරන ලදී. පරන්තන් – කරච්චි – මුලතිව් මාර්ගයේ පිහිටි මෙම පාලම දිනකට වාහන 3,000කට අධික සංඛ්‍යාවක් භාවිතා කරන අතර, එය දීර්ඝ කාලයක් තිස්සේ අලුත්වැඩියා නොකිරීම හේතුවෙන් දැඩි අවදානම් තත්ත්වයක පැවතුණි.
රුපියල් බිලියන 1.4ක මුදලක් වැය කරමින් මාර්ග සංවර්ධන අධිකාරිය යටතේ මෙම පාලම මංතීරු දෙකකින් යුත් නව පාලමක් ලෙස ඉදිකිරීමට නියමිතය.
