‘සීගිරියේ අතුරුදහන්’ නමින් හදුන්වන ප්‍රසිද්ධ මත්ද්‍රව්‍ය ජාවාරම්කරුවෙකු රුපියල් ලක්ෂ 30කට වැඩි වටිනාකමකින් යුත් අයිස් සහ කුෂ් මත්ද්‍රව්‍ය සමග අත්අඩංගුවට ගෙන තිබේ.
ඊයේ (4) පස්වරුවේ සීගිරිය පොලීසියට අනියුක්තව සේවය කරන උපපොලිස් පරීක්ෂකවරියක් සහ පොලිස් කොස්තාපල්වරියක් ඇතුළු කණ්ඩායමක් සිදු කළ හදිසි මෙහෙයුමකදී මෙම අත්අඩංගුවට ගැනීම සිදු කර ඇත.
අත්අඩංගුවට ගත් සැකකරු සීගිරිය රන්ගිරිගම ප්‍රදේශයේ පදිංචිකරුවෙක් වන අතර, ඔහු සන්තකයේ තිබී, කුෂ් ග්‍රෑම් 100යි මිලිග්‍රෑම් 280ක්, අයිස් ග්‍රෑම් 50යි මිලිග්‍රෑම් 11ක්, රු. 23,000ක් පමණ මුදලක්, ජංගම දුරකථන 2ක්ද සොයා ගෙන ඇත.
පොලීසිය පවසන්නේ, මෙම සැකකරු මීට පෙර ද ගංජා සමග අත්අඩංගුවට පත් වී නිදහස් වූ පුද්ගලයෙකු බවය.
සිද්ධිය සම්බන්ධයෙන් සීගිරිය පොලීසිය විසින් වැඩිදුර විමර්ශන සිදු කරමින් පවතින බව සඳහන්ය.
