සමගි ජන බලවේගයේ මැයි දින රැලිය පසුගිය (01) වන දින තලවැලේ ලිදුල නගර සභා ක්‍රීඩාංගණයේදී පැවැත්විණි. කෙසේ වෙතත්, ඊට සහභාගී වූ ආධාරකරුවන් විසින් ක්‍රීඩාංගණය පුරා විවිධ අපද්‍රව්‍ය බැහැර කර තිබූ අතර, නගර සභා කම්කරුවන් විසින් ඒවා ඉවත් කළද, එය නිසි ලෙස සිදු කර නොමැති බව (02) වන දින එම ක්‍රීඩාංගණයට ගිය අයෙකුට දැකගත හැකි විය.
මීට අමතරව, පසුගිය දිනවල පැවති අධික වර්ෂාව හේතුවෙන් නගර සභා ක්‍රීඩාංගණය මඩ වගුරක් බවට ද පත්ව තිබුණි. එම නිසා ක්‍රීඩාංගණය භාවිතා කරන ක්‍රීඩක ක්‍රීඩිකාවන්ට දැඩි අපහසුතාවන්ට මුහුණ දීමට සිදුව ඇත.
මෙම තත්ත්වය සම්බන්ධයෙන් ප්‍රදේශවාසීන්ගේ අවධානය යොමු වී ඇති අතර, ක්‍රීඩාංගණය ඉක්මනින් පිරිසිදු කර ක්‍රීඩා කටයුතු සඳහා සුදුසු තත්ත්වයට පත් කරන ලෙස ඔවුහු බලධාරීන්ගෙන් ඉල්ලා සිටිති.
