කැනේඩියානු අගමැති මාර්ක් කාර්නිගේ නව කැබිනට් මණ්ඩලයේ මහජන ආරක්ෂක අමාත්‍යවරයා ලෙස දෙමළ කැනේඩියානු පාර්ලිමේන්තු මන්ත්‍රී ගැරී ආනන්දසංගරී පත් කරනු ලැබ තිබේ.
ඔහු ද්‍රවිඩ එක්සත් විමුක්ති පෙරමුණේ නායක, හිටපු පාර්ලිමේන්තු මන්ත්‍රී වී. ආනන්දසංගරීගේ පුත්‍රයා ය.
ගැරී ආනන්දසංගරී කැනඩාවේ ජාතික ආරක්ෂාව සඳහා වගකිව යුතු කැනඩා දේශසීමා සේවා ඒජන්සිය, රාජකීය කැනේඩියානු අශ්වාරෝහක පොලිසිය සහ කැනේඩියානු ආරක්ෂක බුද්ධි තොරතුරු සේවය ඇතුළු ප්‍රධාන ආයතන අධීක්ෂණය කරනු ඇත.
ඔහු මීට පෙර 2024 මාර්තු මාසයේදී කාර්නිගේ පළමු කැබිනට් මණ්ඩලය යටතේ අධිකරණ අමාත්‍යවරයා සහ නීතිපතිවරයා ලෙස සේවය කළේය. හිටපු අගමැති ජස්ටින් ටෲඩෝගේ අවසන් කැබිනට් මණ්ඩලය යටතේ 2024 දෙසැම්බර් මාසයේදී ඔහු පත් කරන ලද රාජකීය-ස්වදේශික සබඳතා සහ උතුරු ප්‍රදේශය භාර අමාත්‍යවරයාගේ භූමිකාව ඔහු විසින් දරා තිබේ.
ගැරී ආනන්දසංගරී අප්‍රේල් මාසයේ පැවති ෆෙඩරල් මැතිවරණයේදී සිය ප්‍රාදේශීය ආසනය අති විශාල බහුතරයකින් නැවත තේරී පත් වූ අතර, 2015 සිට ස්කාර්බරෝ-ගිල්ඩ්වුඩ්-රූජ් පාර්ක් (මීට පෙර ස්කාර්බරෝ-රූජ් පාර්ක්) හි පාර්ලිමේන්තු මන්ත්‍රීවරයෙකු ලෙස සිය තනතුර දිගටම පවත්වාගෙන යයි.
වී. ආනන්ද සංගරී හිටපු මන්ත්‍රීවරයා එල්.ටී.ටී.ඊයේ මරණීය තර්ජනයට ලක් වූ සුප්‍රසිද්ධ දේශපාලකයෙකු වන අතර, ඔහුගේ පුත්‍ර ගැරී ආනන්ද සංගරී එල්.ටී.ටී.ඊ හිතවාදියෙකු ලෙස ප්‍රකට ය.
කැනඩාවේ වෙසෙන දෙමළ ජාතිකයින් පිරිසක් එරට බ්‍රැම්ප්ටන් නගරයේ ඉදිකළ, LTTE ත්‍රස්තවාදී සංවිධානයේ ඊළාම් සිතියම ඇතුළත් දෙමළ ජනසංහාර ස්මාරකයක් විවෘත කර ඇති බවට වන වීඩියෝවක් සමාජ මාධ්‍ය ඔස්සේ හුවමාරු වූ අතර, සමාජ මාධ්‍ය ඔස්සේ පළ කළ සටහන් මගින් ඔවුන් සඳහන් කර ඇත්තේ, 2021දී යාපනය විශ්වවිද්‍යාලයේ ඉදිකළ අනුස්මරණ ස්මාරකය විනාශ කිරීමට ලක්රජය කටයුතු කිරීමට ප්‍රතිචාර වශයෙන් මෙම ස්මාරකය ඉදිකළ බවය.
කැනේඩියානු දෙමළ ජාතික කවුන්සිලය ඇතුළු කැනඩාවේ සිටින දෙමළ සංවිධානවල අනුග්‍රහයෙන් ඉදිකර ඇති මෙම ස්මාරකය, LTTE සංවිධානය නිර්මාණය කළ බවට පැවසෙන දෙමළ ඊළාම් සිතියම ද ඇතුළත් කරමින් ස්ථාපනය කර ඇති අයුරු දැකගත හැකිවුණි.
කැනේඩියානු අධිකරණ අමාත්‍ය ධුරයේ කටයුතු ගැරී ආනන්දසංගරී ස්මාරකය ආරක්ෂා කරමින් සමාජ මාධ්‍ය ඔස්සේ ප්‍රකාශ කළේ එය “අහිංසක ජීවිත දහස් ගණනකට” ගෞරව කරන බවත් “ගෝලීය දෙමළ ප්‍රජාවන්ගේ ඔරොත්තු දීමේ හැකියාව” සමරන බවත්ය.
