අඩු ආදායම්ලාභීන්ට රඳවා ගැනීමේ බදු සහනයක්
කැබිනට් මණ්ඩලය විසින් රඳවා ගැනීමේ බදු අනුපාතය වැඩි කිරීමෙන් පීඩාවට පත් වූ අඩු ආදායම්ලාභී පුද්ගලයන්ට සහන සැලසීමේ යෝජනාවකට අනුමැතිය ලබා දී තිබේ. 2025 අප්‍රේල් 01 වනදා සිට ක්‍රියාත්මක වන පරිදි 2025 අංක 2 දරන දේශීය ආදායම් (සංශෝධන) පනත යටතේ මෙම බද්ද 5% සිට 10% දක්වා ඉහළ නැංවූ අතර, මෙය අඩු ආදායම්ලාභීන්ට සැලකිය යුතු මූල්‍ය බරක් වී තිබිණ.
මෙම බදු වැඩිවීම හේතුවෙන් වාර්ෂිකව රුපියල් මිලියන 1.8 ක බදු රහිත ආදායම් සීමාවට වඩා අඩුවෙන් උපයන පුද්ගලයන්ට පවා රඳවා ගැනීමේ බද්ද පැනවීමත් සමඟ ඔවුන්ගේ පොලී ආදායම් සඳහා බදු අයවීම සිදු විය. මෙය අඩු ආදායම්ලාභීන්ට සහ කුඩා පරිමාණ තැන්පත්කරුවන්ට දැඩි මූල්‍ය දුෂ්කරතා ඇති කළේ ය.
මෙම ගැටලුවට විසඳුමක් ලෙස, මුදල්, ප්‍රතිපත්ති සැලසුම් සහ ආර්ථික සංවර්ධන අමාත්‍යවරයා වශයෙන් ජනාධිපති අනුර කුමාර දිසානායක විසින් ස්වයං ප්‍රකාශන යාන්ත්‍රණයක් හඳුන්වා දීමට යෝජනා කර තිබේ. මෙම නව ක්‍රමය මඟින් බදු රහිත ආදායම් සීමාවට වඩා අඩුවෙන් උපයන පුද්ගලයන්ට තම ආදායම ප්‍රකාශ කිරීමටත්, එමඟින් පොලී ආදායම මත වැඩි කළ රඳවා ගැනීමේ බද්දෙන් නිදහස් වීමටත් හැකි වනු ඇත.
බැංකු ගිණුම් සඳහා TIN අනිවාර්ය කෙරේ
ඊට අමතරව, 2017 අංක 24 දරන දේශීය ආදායම් පනතට සංශෝධන කිරීමට ද කැබිනට් මණ්ඩලය අනුමැතිය ලබා දී තිබේ. මෙම සංශෝධන මඟින් ඕනෑම ආකාරයක බැංකු ගිණුමක් විවෘත කිරීමේදී බදු හඳුනාගැනීමේ අංකයක් (TIN) ලබා දීම අනිවාර්ය වනු ඇත.
