“පැලවත්ත අතැඟිලි” රජයේ කටයුතුවලට අත පෙවීමෙන් ආතතියක්..!

ආරක්ෂක නියෝජ්‍ය අමාත්‍ය, මේජර් ජෙනරාල් (විශ්‍රාමික) අරුණ ජයසේකරගේ ක්‍රියාකලාපය නිසා ආරක්ෂක අමාත්‍යාංශය තුළ යම් ගැටලුකාරී තත්ත්වයක් මතුව ඇති බවට විශ්වාසදායක ආරංචි මාර්ග වාර්තා කරයි. දේශපාලන පක්ෂයක් විසින් ගත යුතු පියවර අමාත්‍යාංශය විසින් ගැනීමට උත්සාහ කිරීම මෙයට හේතුව වී ඇති බව සඳහන් වේ.

LTTE හිතවාදී ගීත වීඩියෝවක් සම්බන්ධ සිද්ධිය

මෑතකදී වාර්තා වූ සිදුවීමක් ලෙස යාපනයේ ජාතික ජන බලවේගයේ මන්ත්‍රීවරයකු විසින් නිපදවා යූ ටියුබ් අවකාශයට මුදා හරින ලද LTTE හිතවාදී ගීත වීඩියෝවක් පිළිබඳව අවධානය යොමු වී තිබේ. මෙම වීඩියෝ සම්බන්ධයෙන් පළ වූ මාධ්‍ය වාර්තා ප්‍රතික්ෂේප කරමින් නිවේදනයක් නිකුත් කරන ලෙස නියෝජ්‍ය අමාත්‍ය අරුණ ජයසේකර විසින් ආරක්ෂක අමාත්‍යාංශයේ ලේකම්, එයාර් වයිස් මාර්ෂල් (විශ්‍රාමික) සම්පත් තුයියකොන්තාට දැනුම් දී ඇති බව වාර්තා වේ.

කෙසේ වෙතත්, ලේකම්වරයා ප්‍රකාශ කර ඇත්තේ මෙය දේශපාලන පක්ෂයකට අදාළ කාරණයක් බැවින් එය ආරක්ෂක අමාත්‍යාංශයේ කාර්යයක් නොවන බවයි. ආරක්ෂක අමාත්‍යාංශයේ මාධ්‍ය අධ්‍යක්ෂවරයා ද එම අදහසම දරන බව දැනගන්නට ලැබී තිබේ. දේශපාලන බලපෑම් හමුවේ මාධ්‍ය අධ්‍යක්ෂවරයා ද දුෂ්කර තත්ත්වයකට පත්ව ඇති බවත්, ඔහු ඉල්ලා අස්වීමට ඉඩ ඇති බවත් වාර්තා වේ.

වෙනත් අමාත්‍යාංශ සහ ආයතනවල ගැටලු

පැලවත්ත පක්ෂ කාර්යාලයෙන් ආණ්ඩුවේ කටයුතු පාලනය කිරීමට උත්සාහ කිරීම නිසා තවත් අමාත්‍යාංශ සහ ආයතන ගණනාවකම අවුල් සහගත තත්ත්වයක් ඇති වී ඇති බවට තවදුරටත් වාර්තා වේ.

• ලේක්හවුස් ආයතනය: පාඩු ලබන ලේක්හවුස් ආයතනයේ සිළුමිණ පුවත්පතට කර්තෘ වශයෙන් පත් කර සිටින උදේනි සමන් කුමාර විසින් ගන්නා ලද තීරණයක් පසුදා ශ්‍රේෂ්ඨාධිකරණය විසින් ආපසු හරවනු ලැබිණ. ඔහු විසින් “සිළුමිණ” සාහිත්‍ය අතිරේකය භාරව සිටි සුමුදු චතුරානි නම් මාධ්‍යවේදිනිය රැකියාවෙන් පහ කරනු ලැබුවේ පැලවත්ත තීරණයක් අනුව බව සඳහන්. දැන් ශ්‍රේෂ්ඨාධිකරණය නියෝග කර ඇත්තේ ජූනි 15දාට පෙර ඇය නැවත සේවයේ පිහිටුවන ලෙසයි.

  පසුගිය සති කිහිපය තුළ උදේනි සමන් කුමාර ලිපි ලියමින් සමාජගත කිරීමට උත්සාහ කළ කරුණු කිහිපයක් මෙසේය:

  • විජය කුමාරතුංග මහතා මරා දමන ලද්දේ ජනාධිපති වූ රණසිංහ ප්‍රේමදාස විසිනි.
  • අමාත්‍ය ජෙයරාජ් ප්‍රනාන්දු ඝාතනයට මහින්ද රාජපක්ෂ සම්බන්ධය.
  • අමාත්‍ය ලක්ෂ්මන් කදිරගාමර් ඝාතනයට ද මහින්ද රාජපක්ෂ සම්බන්ධ විය හැකිය.

• ජාතික රූපවාහිනිය: ජාතික රූපවාහිනියට ජාතික ජන බලවේගයේ ආණ්ඩුව විසින් පත් කරන ලද නිලධාරීන් දෙදෙනෙකු සේවක පිරිස් විසින් හූ කියා පන්නා දැමීම තවත් එවැනි නිදසුනකි.

සමාන්තර පක්ෂ යාන්ත්‍රණයක්?

ආණ්ඩුවේ නිල යාන්ත්‍රණයට සමාන්තරව සිය පක්ෂයේ යාන්ත්‍රණයක් ගොඩනගන බවට ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා විසින් කරන ලද ප්‍රකාශය දැන් සැබෑ වී ඇති බවට විවිධ වාර්තා ලැබෙමින් තිබේ.

• පොලිස් බුද්ධි අංශය: වැලිගම W 5 හෝටලයට දේශබන්දුගේ කණ්ඩායමක් ප්‍රහාරයක් එල්ල කිරීමට පෙර, එම හෝටලයේ වීඩියෝ දර්ශනයක් දේශබන්දු වෙත යැවූ පොලිස් බුද්ධි අංශ ප්‍රධානී, නියෝජ්‍ය පොලිස්පති නිශාන්ත සොයිසා අත්අඩංගුවට ගැනීම වැළැක්වීමට පැලවත්ත ප්‍රධානියකු උත්සාහ කර ඇති බව සඳහන්. ඔවුන් දෙදෙනා පාසල් මිතුරන් බවත්, ඔහු එම වීඩියෝව යවා ඇත්තේ ප්‍රහාරයට දින තුනකට පෙර බවත් කියැවේ.

• ජාතික ප්‍රවාහණ කොමිෂන් සභාව: ජාතික ප්‍රවාහණ කොමිසමේ සභාපති වූ ආචාර්ය දිලීප විතාරණ ඉල්ලා අස්වීමට බලපෑවේද පැලවත්ත දේශපාලන බලපෑම් බව තතුදත් ආරංචි මාර්ග දක්වයි. ඔහු ජාතික ජන බලවේගයේ විධායක කමිටු සාමාජිකයෙකි.

ඉල්ලා අස්වීම් සහ පක්ෂ පාලනය

මේ වන විට ජාතික ජන බලවේගයේ ආණ්ඩුව විසින් පත් කරන ලද, ඉන්පසු ඉල්ලා අස් වූ පිරිස දුසිමකට වැඩිය. ඉන් වැඩිම පිරිසක් ඉවත්ව ඇත්තේ බිමල් රත්නායකගේ අමාත්‍යාංශයෙනි.

පාර්ලිමේන්තු මැතිවරණය දක්වා ක්‍රියාකාරී වූ ජාතික ජන බලවේගයේ කමිටු දැන් 88-89 අවධියේ JVP ක්‍රියාකාරීන් විසින් පාලනය කරන්නට පටන් ගෙන තිබෙන බව ප්‍රදේශ ගණනාවකින්ම වාර්තා වේ. පාර්ලිමේන්තුව තුළද ජාතික ජන බලවේගයේ මන්ත්‍රීවරුන් සහ මන්ත්‍රීවරියන් දෙවැනි තැනට දමා දෘඩ JVP මැති ඇමතිවරුන් සහ වරියන් ඉදිරියට ගනිමින් සිටීම මෙම මූලෝපායේ කොටසක් ලෙස පෙනී යයි.

ජාතික ජන බලවේගය සහ ජනතා විමුක්ති පෙරමුණ අතර වර්ධනය වන විරසකය සමනය කර ගැනීමට නොහැකි වුවහොත් මෙම තත්ත්වය වර්ධනය වී පැලවත්ත පාලනය, පාර්ලිමේන්තු පාලනය ඉක්මවා යනු ඇතැයි දේශපාලන අංශ බිය පළ කරති.