අල්ලස් හෝ දූෂණ විමර්ශන කොමිෂන් සභාවේ නිලධාරීන් විසින් අද (මැයි 24) උදෑසන නාරාහේන්පිට පිහිටි මෝටර් රථ ප්‍රවාහන දෙපාර්තමේන්තුවේ ප්‍රධාන කාර්යාලයේ සිදුකළ හදිසි වැටලීමකදී, රුපියල් 4,117,340 ක මුදලක් සොයාගෙන තිබේ. මෙම මුදල කාර් පැවරුම් අංශයේ නියෝජ්‍ය කොමසාරිස්වරයාගේ කාර්යාලයේ තිබී සොයාගෙන ඇති අතර, එය අල්ලස් වශයෙන් ලබාගත් මුදලක් බවට කොමිෂන් සභාව විශ්වාස කරයි.
අල්ලස් හෝ දූෂණ කොමිසමේ අධ්‍යක්ෂ ජනරාල් රංග දිසානායක මාධ්‍ය වෙත අදහස් දක්වමින් කියා සිටියේ, මෙම වැටලීම සිදුකරනු ලැබුවේ දූෂණ විරෝධී පනතේ 45 වැනි වගන්තිය ප්‍රකාරව ලබාගත් සෝදිසි වරෙන්තුවක් මත බවයි. රහසිගත තොරතුරක් මත මෙම වැටලීම සිදුකර ඇති අතර, රජයේ ඇතැම් ආයතනවල මහා පරිමාණයෙන් සහ සාමූහිකව අල්ලස් ගැනීම් සිදුවන බවට තොරතුරු ලැබී ඇති බව ද ඔහු සඳහන් කළේය. සොයාගත් මුදල් අදාළ නිලධාරීන් අතර බෙදාගැනීමට සූදානම් කර තිබූ බවට තොරතුරු ලැබී ඇත.
මෙම සිද්ධිය සම්බන්ධයෙන් විජේසුන්දර ලේකම්ලාගේ ඩිලන්ත නුවන් කුමාර (නියෝජ්‍ය කොමසාරිස්), කින්නන් කුඩා රාළලාගේ ප්‍රදීප් නිශාන්ත පෙරේරා (කළමනාකරණ නිලධාරී) සහ දවටගේ සමන්ත පෙරේරා (කළමනාකරණ සහකාර) යන නිලධාරීන් තිදෙනා අත්අඩංගුවට ගෙන තිබේ. දූෂණ විරෝධී පනතේ 109 වැනි වගන්තිය ප්‍රකාරව මෙම පුද්ගලයන්ට මුදල් සම්බන්ධයෙන් පැහැදිලි කිරීමක් කිරීමට නොහැකි වී ඇති බැවින්, ඒවා අල්ලස් මුදල් ලෙස සලකනු ලබයි.
අධ්‍යක්ෂ ජනරාල් රංග දිසානායක වැඩිදුරටත් කියා සිටියේ, මෙය මෙවැනි රාජ්‍ය ආයතනවල සිදුවන එකම අල්ලස් සිද්ධිය නොවන බවත්, තවත් බොහෝ ආයතනවල දූෂණය ව්‍යාප්තව පවතින බවට තොරතුරු ලැබී ඇති බවත්ය. මෙම වැටලීමේ අරමුණ වන්නේ වැරදිකරුවන්ට දඬුවම් දීමට අමතරව, මෙරට දූෂණයේ සහ අල්ලසෙහි බරපතල ස්වභාවය පිළිබඳව මහජනතාව දැනුවත් කිරීම බව ද හෙතෙම සඳහන් කළේය.
අල්ලස් හෝ දූෂණ කොමිසම විසින් රාජ්‍ය නිලධාරීන් පිළිබඳ මින් ඉදිරියට දැඩි අවධානයෙන් පසුවන බවත්, වහාම මෙවැනි ක්‍රියාවන් නැවැත්විය යුතු බවටත් ඔවුනට අවවාද කරමින්; අල්ලස් දීම සහ ගැනීම යන දෙකම වරදක් බව පෙන්වා දුන් කොමිසමේ අධ්‍යක්ෂ ජෙනරාල්වරයා, අල්ලස් ලබාදෙන මහජනතාව ද මේ පිළිබඳව සැලකිලිමත් විය යුතු බව අවධාරණය කළේය.
අත්අඩංගුවට ගත් නිලධාරීන් තිදෙනා අද දිනයේම අධිකරණයට ඉදිරිපත් කිරීමට නියමිතය.
