පාර්ලිමේන්තු මන්ත්‍රී අර්චුනා රාමනාදන් අද (ජුනි 05) පාර්ලිමේන්තුවේදී ආන්දෝලනාත්මක ප්‍රකාශයක් සිදු කළේ ය. පරීක්ෂාවකින් තොරව මෙරටට ඇතුළු කළ කන්ටේනර් බහාලුම්වල ඇත්තේ එල්.ටී.ටී.ඊ. නායක වේලුපිල්ලේ ප්‍රභාකරන්ට අයත් අවි ආයුධ බවයි මන්ත්‍රීවරයා ප්‍රකාශ කළේ.
ඔහු තවදුරටත් කියා සිටියේ, 2009 යුද්ධය පැවති සමයේදී මෙරටට ගෙන්වා ගැනීමට නොහැකිව තායිලන්තයේ සිර වී තිබූ අවි ආයුධ තොගයක් මෙලෙස කන්ටේනර් මගින් රට තුළට මුදා හැර ඇති බව ය.
මීට අමතරව, ජනාධිපති අනුර කුමාර දිසානායක මහතා බලයට පත්වීමට පෙර ජර්මනියේ සිටින ඩයස්පෝරා සාමාජිකයින් සමඟ සාකච්ඡා පැවැත්වූ බවත්, මෙරට තුළ සිදු කළ නොහැකි ඇතැම් ක්‍රියා සිදු කරන බවට ජනාධිපතිවරයා පොරොන්දු වී ඇති බවත් තමා දන්නා ඩයස්පෝරා සාමාජිකයින් තමන්ට දැනුම් දුන් බවත් අර්චුනා රාමනාදන් සඳහන් කළේ ය. මේ පිළිබඳ සමාජයේ කතාබහක් නිර්මාණය වී ඇති බවද ඔහු පවසයි.
තම ප්‍රකාශයන් වගකීමෙන් යුතුව සිදු කරන බව මන්ත්‍රීවරයා අවධාරණය කළේ ය.
