ලොව රටවල් 147ක් අතරින් සතුටින්ම සිටින ජනතාව සහිත රටවල් අතර ශ්‍රී ලංකාව 133 වන ස්ථානයට පත්වීම, පාලකයන්ගේ දුර්වල දැක්මක් නොමැතිකම හේතුවෙන් සිදුවූ ඛේදවාචකයක් බව ෆීල්ඩ් මාර්ෂල් සරත් ෆොන්සේකා අවධාරණය කරයි. කළුතරදී පැවති ප්‍රජාතන්ත්‍රවාදය, ජාතික ආරක්ෂාව, සැමට එක නීතියක්, දූෂණයට හා වංචාවට එරෙහි වූ ව්‍යාපාරය ජන හමුව අමතමින් ඔහු මෙම ආන්දෝලනාත්මක ප්‍රකාශ සිදු කළේය.
නිදහස ලැබූ දා සිට රට පාලනය කළ කිසිදු නායකයෙකුට රට ඉදිරියට ගෙන යෑමට සැබෑ දැක්මක් නොතිබූ බවට ෆොන්සේකා මහතා චෝදනා කරයි. “රට පාලනය කරන්නේ රටට පොහොර, තෙල්, ඖෂධ, ගල් අඟුරු ගෙන ඒම තීරණය කරන දූෂිත වළල්ලක්,” ඔහු දැඩි ස්වරයෙන් ප්‍රකාශ කළේය. මෙම දූෂිත ජාලයේ නිර්මාතෘවරුන් ලෙස ෆොන්සේකා මහතා පැහැදිලිවම රාජපක්ෂ පවුල සහ ඔවුන්ගේ සල්ලිකාර මිත්‍රයන් නම් කළේය. මෙය ශ්‍රී ලංකා දේශපාලනයේ ප්‍රබල ආන්දෝලනයක් ඇති කළ හැකි ප්‍රකාශයකි.
කෙසේ වෙතත්, මේ මොහොතේ කලකිරීමක් පැවතියද, වත්මන් ආණ්ඩුව කිසිසේත් විවේචනය නොකළ යුතු බවට ෆොන්සේකා මහතා අමුතුම ඉල්ලීමක් කරයි. ඊට හේතුව ලෙස ඔහු පෙන්වා දෙන්නේ, එහි වාසිය යන්නේ පැරණි දූෂිත වළල්ලටම බවයි. “පළමුව කළ යුත්තේ යළි හිස එසවීමට උත්සාහ කරන පැරණි දූෂිත දේශපාලන කල්ලි අතුගා දැමීමයි,” ඔහු අවධාරණය කළේය. “ආණ්ඩුවේ දුර්වලතා ඇත්නම් විවේචනය කළ යුත්තේ අනතුරුවයි.”
