ශ්‍රී ලංකා පොලිස් සේවයේ ජ්‍යෙෂ්ඨතම සහ කීර්තිමත් නිලධාරියෙකු ලෙස සැලකෙන ශානි අබේසේකර මහතා අධ්‍යක්ෂ ධූරය දරන මධ්‍යම පළාත් විමර්ශන කාර්යාලයේ නියෝජ්‍ය පොලිස්පති තනතුරේ වැඩ ආවරණය කිරීම සඳහා මතභේදාත්මක පත්කිරීමක් සිදුව තිබෙ. ඒ සඳහා මාණ්ඩලික නියෝජ්‍ය පොලිස්පති ලෙස කටයුතු කළ රොෂාන් ඩයස් මහතා පත් කර ඇති බව වාර්තා වේ. මෙම පත්වීම සම්බන්ධයෙන් මේ වන විට විවිධ විවේචනයන් එල්ල වෙමින් පවතී.
නියෝජ්‍ය පොලිස්පති රොෂාන් ඩයස් මීට පෙර කොළඹ මධ්‍යම කොට්ඨාස භාර ජ්‍යෙෂ්ඨ පොලිස් අධිකාරී ලෙස කටයුතු කළ කාලය තුළ කොළඹ පැවති සාමකාමී උද්ඝෝෂණවලට පහරදීම සහ උද්ඝෝෂණ මර්දනය කිරීම සම්බන්ධයෙන් ඔහුට දැඩි චෝදනා එල්ල වී තිබේ. ඊට අදාළව ඔහු වගඋත්තරකරුවෙකු කරමින් මානව හිමිකම් කොමිසමට පැමිණිලි ගණනාවක් මේ වන විට ලැබී තිබෙන අතර, එම පැමිණිලිවල විභාග ද තවමත් අවසන් වී නොමැත.
එපමණක් නොව, නීති වෘත්තිකයන් සහ ජනමාධ්‍ය වෘත්තිකයන් විසින් පොලිසියට දැනුම් දී සිදුකළ සාමකාමී විරෝධතාවයක් අවසන් වී ආපසු යනවිට, පාර හරස් කිරීම සම්බන්ධයෙන් මෙම නිලධාරියාට එරෙහිව පෞද්ගලික නඩුවක් ද ගොනු වී තිබුණි. එම පෞද්ගලික නඩුවෙන් එක් වගඋත්තරකරුවෙකු ලෙස රොෂාන් ඩයස් නම් කර ඇති අතර, තාක්ෂණික හේතුවක් මත එම නඩුව මේවන විට ප්‍රතික්ෂේප වී තිබේ.
ශ්‍රී ලංකා පොලිසියේ ජ්‍යෙෂ්ඨතම සහ කීර්තිමත් නිලධාරියෙකු වන ශානි අබේසේකර මහතාට ඉහළින්, මෙවැනි චෝදනා එල්ල වී ඇති නිලධාරියෙකු පත් කිරීම සම්බන්ධයෙන් බොහෝ දෙනා ප්‍රශ්න කරති.
මීට අමතරව, මධ්‍යම පළාත් විමර්ශන කාර්යාංශ දිසාවේ නියෝජ්‍ය පොලිස්පති ලෙස කටයුතු කළ වැඩබලන පොලිස්පති නිහාල් තල්දූව මහතා මොණරාගල දිසාව භාර නියෝජ්‍ය පොලිස්පති ලෙස පත් කර ඇත.
