ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී නාමල් රාජපක්ෂ අද (ජූලි 09) විශේෂ ප්‍රකාශයක් සිදු කරමින් කියා සිටියේ, හිටපු විධායක ජනාධිපතිවරයෙකු ධුරයෙන් ඉවත් වූ දිනයක් ලෙස අද දිනය කිසිදා අමතක කළ නොහැකි බවයි. අරගලය මගින් ඇති වූ තත්ත්වය පිළිබඳව අදහස් දක්වමින් ඔහු කණගාටුව පළ කළේය.
“ගෝඨාභය මහත්තයා එළවපු අයට දැන් දුකයි”
“ගෝඨාභය මහත්තයාව එලවපු අය දැන් අපිට වඩා දුක් වෙනවා” යැයි නාමල් රාජපක්ෂ සඳහන් කළේය. ඒ, “ජේ.වී.පී. ආණ්ඩුවක් ගෙනල්ලා රැවටුනා, අපිව රැවැට්ටුවා, අපිව ඇන්දුවා” කියා දුක්වන බොහෝ පිරිසක් සිටින බව පෙන්වා දෙමිනි.
එමෙන්ම, අවංකව අරගල කර රටට යහපතක් කිරීමට බලාපොරොත්තු වූ තරුණ පිරිසටත්, ජනතාවටත් වඩා “ගතානුගතික, පාරම්පරික 88-89 සිස්ටම් එකකට” ආණ්ඩුවක් ස්ථාපනය වී ඇති බවට ඔහු කණගාටුව පළ කළේය.
“ගෝඨාභය රාජපක්ෂ මහත්තයාව විධායක ධූරයෙන් අයින් කරාට වඩා, එතුමාව යවලා ගෙනාපු ක්‍රමවේදයෙන් වෙන හානිය වැඩියි.”
නාමල් රාජපක්ෂ වැඩිදුරටත් කියා සිටියේ, “ගෝඨාභය රාජපක්ෂ ජනාධිපතිවරයා කියන්නේ මේ රටේ විධායක ජනාධිපතිවරයෙක් විදිහට එක් සාධකයක් පමණයි. හැබැයි එතුමාව යවලා ගෙනාපු සිස්ටම් එකෙන් හදපු, යවලා ගෙනාපු ක්‍රමවේදයෙන් වෙන හානිය වැඩියි ගෝඨාභය රාජපක්ෂ මහත්තයාව විධායක ධූරයෙන් අයින් කරාට වඩා.”
“මේ කාරණය නිවැරදි කිරීමේ වගකීම අපිටමයි”
මෙම තත්ත්වය නිවැරදි කිරීමේ වගකීම තමන්ටම පැවරෙන බව අවධාරණය කළ නාමල් රාජපක්ෂ, ඉදිරි කාලසීමාව තුළ රටේ ආර්ථිකය යළි ගොඩනංවන බවට පොරොන්දු විය. “ගෝඨාභය මහත්තයා එළවන්න, ගෝඨාභය මහත්තයාට කියලා බෝඩ් උස්සන් හිටපු අයට දැනෙන විදියට අපි මේ රටේ ආර්ථිකය හදලා දෙන්නම්.”
තරුණයන්ට නව බලාපොරොත්තුවක්
තරුණයාට බලාපොරොත්තුවක් ලබා දීම පිළිබඳව අදහස් දක්වමින් ඔහු කියා සිටියේ, “ලෝකෙට ගැලපෙන විදියට, මේ බොරු කියලා, කයිවාරු ගහලා නිලධාරී ටික අරන් ගිහිල්ලා හිරගෙවල්වල දාන සිස්ටම් එක නෙවෙයි. ලෝකෙට ගැලපෙන විදියට අවංකව මේ රට ගොඩනගන්න පුළුවන් සිස්ටම් එකක් අපි ගේනවා” යනුවෙනි.
