පාතාල ක්‍රියා සහ සංවිධානාත්මක අපරාධ මර්දනය කිරීම සඳහා වඩාත් විධිමත් හා පුළුල් වැඩපිළිවෙළක් ක්‍රියාත්මක කරන බව පොලිස්පති ප්‍රියන්ත වීරසූරිය මහතා අද (17) ප්‍රකාශ කළේය.
මහනුවරට පැමිණි පොලිස්පතිවරයා මහනායක හිමිවරුන් බැහැදැකීමෙන් අනතුරුව මාධ්‍ය වෙත අදහස් දක්වමින් මේ බව කියා සිටියේය.
ඔහු පැවසුවේ, මෙම අපරාධ මැඩලීම සඳහා ත්‍රිවිධ හමුදාවේ සහ මහජනතාවගේ සහාය ලබා ගනිමින් සැලසුම් සහගත මෙහෙයුම් දියත් කරන බවයි. මීට පෙර ඇතැම් පාතාල ක්‍රියාවන්ට සහ මත්ද්‍රව්‍ය ජාවාරම් සඳහා දේශපාලන සහයෝගය මෙන්ම පොලිස් නිලධාරීන්ගේද සහාය ලැබී ඇති බව පොලිස්පතිවරයා මෙහිදී පිළිගත්තේය.
“යම් යම් දේශපාලන ආශිර්වාද ලැබිලා තිබුණා, පොලීසියේ නිලධාරීන්ගේ සහාය ලැබිලා තිබුණා, ත්‍රිවිධ හමුදාවේ පුද්ගලයින් ඒ සඳහා පාවිච්චි කරලා තිබුණා, මත්ද්‍රව්‍යවලට ඇබ්බැහි වූවන් මේකට පාවිච්චි කරලා තිබුණා.” ඔහු සඳහන් කළේය.
නීතිය ක්‍රියාත්මක කිරීමේදී කිසිදු දේශපාලන බලපෑමක් නොලැබෙන බවත්, පවතින දේශපාලන පරිසරය ඉතා යහපත් බවත් පොලිස්පතිවරයා අවධාරණය කළේය. කිසිදු අපරාධයක් සඟවා තැබීමට හෝ නොසලකා හැරීමට තමන් විසින් නියෝග ලබා නොදෙන බවද ඔහු පැවසීය.
මෑතකදී සිදු වූ වෙඩි තැබීම් සම්බන්ධයෙන් විමර්ශන කර සැකකරුවන් අත්අඩංගුවට ගෙන ඇති බවද පොලිස්පතිවරයා වැඩිදුරටත් කියා සිටියේය. විදේශගතව සිටින පාතාල කල්ලි නායකයන් සම්බන්ධයෙන් ජාත්‍යන්තරය සමඟ එක්ව කටයුතු කරන බවද ඔහු සඳහන් කළේය.
