ඊයේ (අගෝස්තු 22) දිනය තුළ වාර්තා වූ මරණ හයක් සම්බන්ධයෙන් පොලීසිය විසින් විමර්ශන ආරම්භ කර තිබේ. මෙම මරණ හයෙන් එකක් සැකකටයුතු ලෙස සිදුවූ ඝාතනයක් වන අතර, ඉතිරි මරණ පහ රිය අනතුරු සහ ස්වාභාවික හේතූන් මත සිදුවූ ඒවා බව පොලීසිය පවසයි.
මාන්කුලම් පොලිස් වසමේ, පාලප්පානි ප්‍රදේශයේ 70 හැවිරිදි කාන්තාවක් ඇයගේ නිවස තුළදී සැකකටයුතු ලෙස මියගොස් සිටියදී හමුවී ඇත. ඇයගේ ගෙල ප්‍රදේශයේ කැපුම් තුවාල ඇති අතර, ඇය පැළඳ සිටි රන් ආභරණ අතුරුදහන් වී ඇති බවට මූලික විමර්ශනවලදී අනාවරණය වී තිබේ. මෙය ඝාතනයක් බවට පොලීසිය සැක කරන අතර, මාන්කුලම් පොලීසිය මේ පිළිබඳව වැඩිදුර විමර්ශන සිදු කරයි.
කහටගස්දිගිලිය පොලිස් වසමේ, මැකිච්චාව වැව් පිටිය ප්‍රදේශයේදී 53 හැවිරිදි පුද්ගලයෙකු අකුණු සැර වැදීමෙන් මියගොස් ඇත. ඔහු වැව් පිටියේ සිටි ගවයින් රැගෙන ඒමට ගිය අවස්ථාවේදී මෙම අනතුරට ලක්ව ඇති බවට තොරතුරු වාර්තා වේ.
කටුගස්තොට, සියඹලාතැන්න හන්දිය අසලදී යතුරුපැදියක් විදුලි පහන් කණුවක ගැටීමෙන් සිදුවූ අනතුරකින් 18 හැවිරිදි යතුරුපැදිකරුවෙකු මියගොස් තිබේ. අනතුර සිදුවන අවස්ථාවේදී යතුරුපැදිය පාලනය කරගත නොහැකි වී ඇති බවට අනාවරණය වී ඇත.
දෙහිඕවිට, තැඹිලියාන ප්‍රදේශයේදී කොළඹ-හැටන් ප්‍රධාන මාර්ගයේ ධාවනය වෙමින් තිබූ බස් රථයක බැටරි කාමරයේ දොරක් විවෘත වී මාර්ගයේ රැඳී සිටි 59 හැවිරිදි පුද්ගලයෙකුගේ ගැටීමෙන් ඔහු මියගොස් ඇත. අනතුර සිදුකළ බස් රථයේ රියදුරු අත්අඩංගුවට ගෙන තිබේ.
පැල්මඩුල්ල, පාතකඩ හන්දිය ප්‍රදේශයේදී ත්‍රිරෝද රථයක් මාර්ගයේ ගමන් කළ ගවයෙකුගේ ගැටී පෙරළීමෙන් අනතුරුව ප්‍රතිවිරුද්ධ දිශාවෙන් පැමිණි මෝටර් රථයක ගැටීමෙන් සිදුවූ අනතුරකින් 63 හැවිරිදි පුද්ගලයෙකු මියගොස් ඇත. අනතුරට සම්බන්ධ මෝටර් රථයේ රියදුරු පොලීසිය විසින් අත්අඩංගුවට ගෙන තිබේ.
මහියංගනය, ගොනගල හන්දිය අසලදී කැබ් රථයක් යතුරුපැදියක ගැටීමෙන් 37 හැවිරිදි යතුරුපැදිකරුවෙකු මියගොස් ඇත. කැබ් රථයේ රියදුරුද අනතුරින් තුවාල ලබා රෝහල් ගත කර තිබේ.
මෙම මරණ සම්බන්ධයෙන් පොලිස් පරීක්ෂණ තවදුරටත් ක්‍රියාත්මක වේ.
