වර්ජනයේ නිරත තැපැල් සේවකයින් සහ තැපැල් හා විදුලි සංදේශ අමාත්‍ය නලින්ද ජයතිස්ස මහතා අතර විශේෂ සාකච්ඡාවක් අද (24) පෙරවරු 9ට පැවැත්වීමට නියමිතව තිබේ. මෙම සාකච්ඡාවට වර්ජනයේ නිරත සියලුම තැපැල් වෘත්තීය සමිති නියෝජිතයින් සහභාගී වීමට නියමිත බව වාර්තා වේ.
තැපැල් සේවකයින් ඉල්ලීම් 19ක් මුල් කර ගනිමින් පසුගිය 17 වන දා ආරම්භ කළ මෙම වර්ජනය අදට හත්වන දිනටත් ක්‍රියාත්මක වේ. වර්ජනය හේතුවෙන් දිවයින පුරා තැපැල් සේවා කටයුතු සම්පූර්ණයෙන්ම ඇනහිට ඇති අතර, මහජනතාව දැඩි අපහසුතාවයට පත්ව ඇත.
කෙසේ වෙතත්, මෙම සාකච්ඡාවෙන් වර්ජනයට විසඳුමක් ලැබෙනු ඇතැයි අපේක්ෂා කෙරේ. ඒකාබද්ධ තැපැල් වෘත්තීය සමිති පෙරමුණේ සම කැඳවුම්කරු චින්තක බණ්ඩාර මහතා ප්‍රකාශ කළේ, අද දිනයේ අමාත්‍යවරයා සමඟ සාකච්ඡා කිරීමට සූදානම් බවයි.
මේ අතර, ලංකා තැපැල් සේවා සංගමයේ සභාපති ජගත් මහින්ද මහතා පවසන්නේ, වර්ජනයට එක්ව සිටි සාමාජිකයින් රැසක් මේ වන විට නැවත සේවයට වාර්තා කර ඇති බැවින්, හෙට දිනය වන විට තැපැල් සේවා කටයුතු යථා තත්ත්වයට පත්වනු ඇති බවයි.
