උඩ සිට පහළට සියලු ම රාජ්‍ය නිලධාරීන් මාරු කළ යුතු බව පාලක ජාතික ජන බලවේගය ප්‍රකාශ කරයි. එම පක්ෂයේ පාර්ලිමේන්තු මන්ත්‍රී පද්මසිරි බණ්ඩාර සඳහන් කළේ මේ මාසය ඇතුළත එම කටයුත්ත සිදු වන බවයි.
වැඩිදුරටත් අදහස් දක්වන මන්ත්‍රීවරයා;
“ආණ්ඩු බලය දේශපාලන බලය අපි ගත්තා. අපිට තේරෙනවා රාජ්‍ය බලය ඒ ලෙසින්ම අපිට ගන්න බැරි වෙලා තියෙනවා. මං ඔබට කියන්නේ සියලු රාජ්‍ය නිලධාරීන්, ඒ කියන්නේ උඩ සිට පහළටම සියලුම රාජ්‍ය නිලධාරීන් අපි මාරු කරන්න ඕන අය අනිවාර්යයෙන්ම මේ මාසය ඇතුළත දී මාරු කරනවා. දිසාපතිතුමා වෙන්න පුළුවන්, ප්‍රාදේශීය ලේකම්වරු වෙන්න පුළුවන්, සභා ලේකම්වරු වෙන්න පුළුවන්, සභාවේ කළමනාකාරීත්වය වෙන්න පුළුවන්, අපේ පොලිසියේ මහත්තුරු වෙන්න පුළුවන්, හමුදා නිලධාරීන් වෙන්න පුළුවන් මේ සියල්ලම මේ මාසයේ එකහමාර ඇතුළත දී රට සම්පූර්ණයෙන්ම වෙනත් තැනකට අපි ගෙනියන්න සූදානම් කරලා තියෙන්නේ.
අපි වෙන තැනකට මේක වෙනස් කරගත්තොත් තමයි අලුත් බිමක් අපි ගොඩනඟා ගත්තොත් තමයි අපිට පුළුවන් වෙන්නේ අලුත් ගමනක් යන්න. වංචාව, දූෂණය, නාස්තිය, අල්ලස. මේවා මුළු රාජ්‍ය ආයතන ඇතුලේ පිරිලා තියෙන්නේ. මෙන්න මේ පිරිච්ච එක සම්පූර්ණයෙන් සුද්ද කරන්න ඕනේ. මේක නොකළොත් මේ රට හදන්න බැහැ. ඒ නිසා මේ මාසය ඇතුළතදී රාජ්‍ය යාන්ත්‍රණය වෙනස් වෙනවා වගේම, රටේ දේශපාලනඥයෝ විශාල පිරිසක් අපි ඇතුළට යවනවා. ඒ යවන්න අවශ්‍ය කරන නීතිමය කටයුත්ත අපි අත නොගහ රාජකාරියට බාධා නොකර ඒ නීති නිලධාරීන්ට, අවශ්‍ය කරන ශ්‍රේෂ්ඨාධිකරණයට, ඒ අවශ්‍ය තත්ත්වය අපි රජයක් හැටියට, ආණ්ඩුවක් හැටියට සැලසුම් කරලා තියෙනවා. ඒ නිසා ඒ නිලධාරීන් අවංකව වැඩ කරනවා.
රාජ්‍ය යාන්ත්‍රණය පිළිබඳ නිශ්ච්ත අවබෝධයක් නොමැති මන්ත්‍රීවරුන් විසින් දේශපාලන ප්‍රචාරණවාදී උපක්‍රමයක් ලෙස සිදු කරන මෙවැනි ප්‍රකාශයන්ගේ බරපතලකම විමසා බැලිය යුතු ය. විශේෂයෙන් ම වෘත්තීය සමිති ව්‍යාපාරය හරහා රාජ්‍ය සේවයේ අකාර්යක්ෂමතාව සඳහා සෘජුව වග කිව යුතු ජනතා විමුක්ති පෙරමුණ වැනි පක්ෂ බලය ලබා ගැනීමෙන් පසුව ‘අහසින් වැටුනා සේ’ සිදු කරන මෙවැනි ප්‍රකාශ අතිශය හාස්‍යජනක ය.
“සියලුම රාජ්‍ය නිලධාරීන්, ඒ කියන්නේ උඩ සිට පහළටම සියලුම රාජ්‍ය නිලධාරීන් අපි මාරු කරන්න ඕන අය අනිවාර්යයෙන්ම මේ මාසය ඇතුළතදී මාරු කරනවා” යන ප්‍රකාශය මගින් රජයේ සේවයේ අස්ථාවරත්වයක් සහ අනවශ්‍ය කැළඹීමක් ඇති කළ හැකිය. නිලධාරීන්ගේ සේවා කාලය, පළපුරුද්ද හෝ කාර්ය සාධනය නොසලකා මෙවැනි මහා පරිමාණ මාරු කිරීම් සිදුකිරීමෙන් රාජ්‍ය යාන්ත්‍රණයේ අඛණ්ඩතාවට හා කාර්යක්ෂමතාවට බාධා එල්ල විය හැක. අනෙක් අතට රජය මගින් මෙලෙස නිලධාරීන් අත්තනෝමතිකව මාරු කරනු ලැබීම, රාජ්‍ය සේවයේ විශ්වාසය බිඳවැටීමට හා දේශපාලන බලපෑම් වලට යටත් වීමක් ලෙස අර්ථකථනය කිරීමට ඉඩ ඇත. මන්ද මොහුගේ මෙම ප්‍රකාශය මගින් පැහැදිලි වන්නේ ආණ්ඩුව කරන පාර්ශවයේ උවමනා එපාකම් සිදු කිරීමට රාජ්‍ය සේවය බැඳී සිටින බවකි. දිසාපතිවරුන්, ප්‍රාදේශීය ලේකම්වරුන්, පොලිස් සහ හමුදා නිලධාරීන් වැනි ඉහළ පෙළේ නිලධාරීන් මාරු කිරීමෙන් අදාළ ආයතනවලට ඔවුන්ගේ පළපුරුද්ද සහ ආයතනික දැනුම අහිමි විය හැක. මෙය නව නිලධාරීන්ට අභියෝගාත්මක තත්වයක් නිර්මාණය කරන අතර, සේවාවන් සැපයීමේදී ප්‍රමාදයන් හා අකාර්යක්ෂමතාවන් ඇති කළ හැකිය.
දේශපාලනඥයන්ට එරෙහිව නීතිය ක්‍රියාත්මක කිරීම “රජයක් හැටියට, ආණ්ඩුවක් හැටියට සැලසුම් කරලා තියෙනවා” යැයි පැවසුවද, “නීතිමය කටයුත්ත අපි අත නොගහා රාජකාරියට බාධා නොකර ඒ නීති නිලධාරීන්ට, අවශ්‍ය කරන ශ්‍රේෂ්ඨාධිකරණයට, ඒ අවශ්‍ය තත්වය අපි රජයක් හැටියට, ආණ්ඩුවක් හැටියට සැලසුම් කරලා තියෙනවා” යන ප්‍රකාශය අපැහැදිලිය. දේශපාලන බලය භාවිත කරමින් නීතිමය ක්‍රියා පටිපාටි වලට බලපෑම් කිරීමට ඇති ඉඩකඩ පිළිබඳව මෙයින් සැකයක් මතු වේ. නීතිය ස්වාධීනව ක්‍රියාත්මක විය යුතු අතර, රජය විසින් ඊට බලපෑම් නොකළ යුතුය. මෙවන් ප්‍රකාශ මගින් පෙන්නුම් කරන්නේ ආණ්ඩුව විසින් කල් තියාම වරදකරුවන් තීරණය කර ඇති බවකි.
“වංචාව, දූෂණය, නාස්තිය, අල්ලස. මේවා මුළු රාජ්‍ය ආයතන ඇතුලේ පිරිලා තියෙන්නේ. මෙන්න මේ පිරිච්ච එක සම්පූර්ණයෙන් සුද්ද කරන්න ඕනේ” යනුවෙන් දූෂණය පිළිබඳ පොදු ප්‍රකාශයක් සිදු කළ ද, එයට එරෙහිව ගනු ලබන නිශ්චිත ක්‍රියාමාර්ග හෝ යාන්ත්‍රණ පිළිබඳව පැහැදිලි සඳහනක් මාලිමා මන්ත්‍රීවරයාගේ ප්‍රකාශය තුළ නැත.
“මේ මාසයේ එකහමාර ඇතුළතදී රට සම්පූර්ණයෙන්ම වෙනත් තැනකට අපි ගෙනියන්න සූදානම් කරලා තියෙන්නේ” යනුවෙන් කෙටි කාලයක් තුළ මෙවැනි විශාල වෙනසක් සිදුකිරීම අතාත්විකය. රාජ්‍ය යාන්ත්‍රණයක් වෙනස් කිරීම, දූෂණය පිටුදැකීම සහ රටේ මූලික වෙනස්කම් සිදුකිරීමට සැලකිය යුතු කාලයක් සහ දීර්ඝකාලීන සැලසුම් අවශ්‍ය වේ. මෙම ප්‍රකාශය මගින් පැහැදිලි වන්නේ මොවුන් තුළ රාජ්‍ය යාන්ත්‍රණය ක්‍රියාත්මක කිරීම පිළිබඳ පැහැදිලි අවබෝධයක් නොමැති බව ය.
ප්‍රකාශයේ සමස්ත ස්වරූපය තරමක් ඒකාධිපති වන අතර, විවේචනයට හෝ සාකච්ඡාවට ඉඩක් නොතබයි. “අපි මාරු කරන්න ඕන අය අනිවාර්යයෙන්ම මේ මාසය ඇතුළතදී මාරු කරනවා” වැනි ප්‍රකාශ මගින් පාලනයේ ඒකාධිපති ස්වභාවයක් පිළිබිඹු වේ. විශේෂයෙන් ම ජනතා විමුක්ති පෙරමුණේ නායකයින්ගේ මේ උද්ධච්ඡ ස්වරූපය, ස්වයං නිර්වචන සහ ඒකාධිපති ස්වරූපය රාජ්‍ය යාන්ත්‍රණය අවුලෙන් අවුලට පත් වීමේ තත්ත්වයක් නිර්මාණය නොකරනු ඇතැයි කිසිවකුට කිව නොහැකි ය.
