ආණ්ඩුව විසින් තැපැල් සේවක වෘත්තිය ක්‍රියාමාර්ගයට ගන්නා මර්දනීය ක්‍රියාමාර්ග අත්හිටවූයේ නැතිනම් සියලු වෘත්තිය සමිති එක්ව තැපැල් සේවකයන්ගේ ආරක්ෂා වෙනුවෙන් පෙරට එන බව ලංකා ගුරු සංගමය සඳහන් කරයි.

එම සංගමවෙය් ලේකම් ජෝෂප් ස්ටාලින් මහතා පැවසුවේ වර්ජනයේ යෙදෙන තැපැල් සේවකයන්ගේ වැටුප් නතර කරන බවට ආණ්ඩුව ලිපියක් නිකුත් කර ඇති බවත් එය පැහැදිලිවම වෘත්තීය අයිතිවාසිකම් මර්ධනයක් බවත්ය.

මෙයාකාරයෙන් මර්ධනීය ක්‍රියා පිළිවෙත් අනුගමනය කළ නායකයන්ට ගෙදර යන්නට සිදුවූ ආකාරයද සිහිපත් කරගත යුතුව ඇති බවත් හෙතෙම සඳහන් කරයි.

තැපැල් සේවක වර්ජනය සම්බන්ධයෙන් කොළඹදී පැවති ඒකාබද්ධ වෘත්තීය සමයති මාධ්‍ය හමුවකදී ඔහු මේ බව කියා සිටියේය.

සූරියවැව වැවේගම කැළෑබද ප්‍රදේශයකදි පොලිස් විශේෂ කාර්ය බලකාය සමග ඇතිවු වෙඩි හුවමාරුවකදි එක් සැකකරුවෙකු මියගොස් තිබේ.

වෙඩි වැදිමෙන් තුවාල ලැබු මෙම පුද්ගලයා රෝහල් ගත කිරිමේදි මියගොස් තිබෙන අතර, මෙම වෙඩි හුමවාරුවෙන් පොලිස් විශේෂ කාර්ය බලකායේ නිලධාරියෙකුද තුවාල ලබා සූරියවැව රෝහලට ඇතුළත් කර ඇත.

සිද්ධිය සම්බන්ධයෙන් ඉදිරි විමර්ශන ක්‍රියාත්මක වෙයි.

නව අයෝජන කලාප 7 ක් මේ වසරේදී පිහිටුවීමට කටයුතු කරන බව ශ්‍රී ලංකා ආයෝජන මණ්ඩලය පවසයි.

එහි සභාපති අර්ජුන හේරත් මහතා සඳහන් කළේ, උතුරු පළාතේ ආයෝජන කලාප 03ක් මෙන්ම වයඹ, නැගෙනහිර හා දකුණු පළාත් වල එක් ආයෝජන කලාපය බැගින් පිහිටුවන බවයි.

මේ සමග ප්‍රාදේශීය වශයෙන් ආයෝජන ගලා යාම වේගවත් වී ඒ ආශ්‍රිතව නව රැකියා අවස්ථා රැසක් බිහිවනු ඇතැයි ද ඔහු වැඩිදුරටත් පැවසීය.
මේ අනුව, උතුරු පළාතේ කන්කසන්තුරෙයි හි අක්කර 300ක විශාලත්වයෙන් යුත් ආයෝජන කලාපයේ ඇගලුම් හා තොරතුරු තාක්ෂණ ක්ෂේත්‍රයේ ආයෝජන ව්‍යාපෘති ආරම්භ කිරීමට නියමිතය.

අක්කර 200 ක විශාලත්වයෙන් යුත් පරන්තන් ආයෝජන කලාපයේ රසායානික නිෂ්පාදන කම්හල් පිහිටුවීමට නියමිත වන අතර, අක්කර 200ක් විශාල මාන්කුලම් ආයෝජන කලාපයේ කෘෂිකාර්මික හා ධීවර නිෂ්පාදන එකතු කළ අගය මත අපනයනය කිරීමට සැලසුම් කර තිබේ.

අර්ජුන හේරත් මහතා වැඩිදුරටත් පවසා ඇත්තේ ඉරණවිල ආයෝජන කලාපයේ සංචාරක ක්ෂේත්‍රයට අදාළ ව්‍යාපෘති පිහිටුවන බවයි.
තවද, මඩලකපුව එරාවුර් හි පිහිටුවන ආයෝජන කලාප තුළ ඇගලුම් නිෂ්පාදනට අවශ්‍ය අමුද්‍රව්‍ය මෙරටදී නිෂ්පාදනය සඳහා කර්මාන්ත ශාලා පිහිටුවීමට නියමිතය.

මේ අතර, හම්බන්තොට ආයෝජන කලාපය තුළ ඖෂධ නිෂ්පාදන සමාගම් පිහිටුවීමට නියමිතයි.

බගවන්තලාව පොලිස් වසමේ මාඑළිය රක්ෂිතය තුළ බලපත්‍ර නොමැතිව මැණික් ගැරූ පුද්ගලයින් පස් දෙනෙකු ඊයේ (21) පොලිසිය
විසින් අත්අඩංගුවට ගෙන තිබේ.

ඒ නුවරඑළිය පොලිස් විශේෂ කාර්ය බලකා කඳවුරේ හා බගවන්තලාව පොලිස් ස්ථානයේ නිලධාරීන් විසින් ඒකාබද්ධව සිදුකළ වැටලීමකදී වෙයි.

අත්අඩංගුවට ගත් සැකකරුවන් සතුව තිබූ මැණික් ගැරීම සඳහා භාවිතා කළ උපකරණද පොලිසිය භාරයට ගෙන ඇත.

අත්අඩංගුවට ගත් පිරිස් වයස අවුරුදු 35 සිට 56 අතර පුද්ගලයින් වන අතර, ඔවුන් බගවන්තලාව සහ නෝර්වුඩ් ප්‍රදේශවල පදිංචිකරුවන් බව සොයාගෙන ඇත.

මෙම සිද්ධිය සම්බන්ධයෙන් බගවන්තලාව පොලිසිය වැඩිදුර විමර්ශන සිදු කරමින් සිටියි.

දෙමටගොඩ ප්‍රදේශයේ පුද්ගලයෙකු මත්ද්‍රව්‍ය ජාවාරමෙන් උපයාගෙන ඇති රුපියල් කෝටි 10කට ආසන්න වටිනාකමකින් යුත් දේපළ තහනම් කිරීමට නීති විරෝධී වත්කම් විමර්ශන කොට්ඨාසය විසින් කටයුතු කර තිබේ.

පොලිසිය සඳහන් කළේ ඊට අදාළ නියෝගය ඊයේ (21) කොළඹ ප්‍රධාන මහේස්ත්‍රාත් අධිකරණය විසින් නිකුත් කළ බවයි.