විදේශ කටයුතු අමාත්‍යාංශයේ අධ්‍යක්ෂ ජනරාල් සහ මාධ්‍ය ප්‍රකාශක තුෂාර රුද්‍රිගු සඳහන් කළේ, ශ්‍රී ලංකාවට සමුළුව සඳහා නිල ආරාධනාවක් නොලැබුණු හෙයින් සහභාගී නොවූ බවයි. ඔහු කියා සිටියේ, චීනය සහ ශ්‍රී ලංකාව අතර සබඳතාවල කිසිදු පළුදු වීමක් සිදු වී නොමැති බවත්, චීනය ඔවුන්ගේ උපායමාර්ගික සබඳතා යාවත්කාලීන කර ගැනීමට වෙනත් රටවලට ආරාධනා කරන්නට ඇති බවත්ය. ජනාධිපතිවරයා චීනයේ සංචාරය කළ අතර, ඉදිරියේදී අගමැතිනිය ද චීනයේ සංචාරයකට සූදානම් වන බව ඔහු වැඩිදුරටත් කියා සිටියේය.

කැබිනට් ප්‍රකාශක අමාත්‍ය නලින්ද ජයතිස්ස පෙන්වා දුන්නේ, ජනාධිපතිවරයාට වෙනත් විදෙස් සංචාර කිහිපයකට සහභාගී වීමට ඇති කාර්ය බහුලත්වය හේතුවෙන් මෙම සමුළුව මඟ හැරෙන්නට ඇති බවයි. කෙසේ වෙතත්, විදේශ කටයුතු අමාත්‍යාංශය විසින් ඉදිරිපත් කළ හේතුව ගැන විමසූ විට, තමන් ඒ පිළිබඳව නොදන්නා බව කැබිනට් ප්‍රකාශකවරයා සඳහන් කළේය.

සමුළුවට සහභාගී නොවීම පිළිබඳව විවිධ සමාජ මාධ්‍ය සහ දේශපාලන විශ්ලේෂකයන් අතර විවිධ අදහස් මතුවී තිබේ. සමහර ෆේස්බුක් පරිශීලකයන් එය ‘හොඳ තීරණයක්’ ලෙස හැඳින්වූ අතර, එවැනි සමුළුවකට සහභාගී වීමෙන් ඇමරිකාව වැනි රටවල් සමඟ සබඳතා පළුදු විය හැකි බවට අදහස් පළ විය.

කෙසේ වෙතත්, ජ්‍යෙෂ්ඨ රාජ්‍ය තාන්ත්‍රික නිලධාරියෙකු වන ආචාර්ය දයාන් ජයතිලක පවසන්නේ, ශ්‍රී ලංකාවට ලැබෙන සෑම අවස්ථාවකදීම වෙනත් රටවල් සමඟ සමීප සබඳතා ගොඩනගා ගත යුතු බවයි. ඉන්දියාව සහ පාකිස්තානය වැනි රටවල් පවා මෙම සමුළුවට සහභාගී වූ බැවින් ශ්‍රී ලංකාව ද නියෝජනයක් යැවිය යුතුව තිබුණ බව ඔහු අවධාරණය කළේය.

මේ අතර, විදේශ කටයුතු අමාත්‍ය විජිත හේරත්, ෂැංහයි සමුළුවේදී චීන ජනාධිපති ෂී ජින්පිං විසින් ඉදිරිපත් කරන ලද ‘ගෝලීය සංවර්ධන, ආරක්ෂාව සහ ශිෂ්ටාචාර මුලපිරීම්’ ධනාත්මකව සටහන් කර ගනිමින් X (ට්විටර්) පණිවිඩයක් පළ කර තිබුණි.

Shanghai Five ලෙස 1996 දී ආරම්භ වූ මෙම සංවිධානය, 2001 දී ෂැංහයි සහයෝගිතා සංවිධානය (SCO) බවට පත්විය. එය චීනය, රුසියාව, ඉන්දියාව, පාකිස්තානය ඇතුළු රටවල් 10 කින් සමන්විත ලොව විශාලතම කලාපීය සංවිධානයකි. ශ්‍රී ලංකාව එහි සංවාද හවුල්කාර රටවල් 14 අතරට අයත් වේ.

රජරට විශ්වවිද්‍යාල ශිෂ්‍ය සංගමය, ශ්‍රී ලංකා විශ්වවිද්‍යාල ක්‍රීඩා උළෙල (SLUG) සම්බන්ධයෙන් විශ්වවිද්‍යාල මට්ටමෙන් දැඩි විරෝධය පළ කරමින් මෙවර උළෙලට සහභාගී නොවන බව නිල වශයෙන් ප්‍රකාශ කර ඇත.

2025 සැප්තැම්බර් 04 වන දින නිකුත් කළ නිල ප්‍රකාශනයේදී, ශිෂ්‍ය සංගමය පෙන්වා දුන්නේ, රටේ දේශපාලන හා ආර්ථික තත්ත්වය මත ජනතාව දැඩි වශයෙන් අර්බුද‍යකට පත් වී සිටින අතර, අධ්‍යාපන ක්ෂේත්‍රය ද බරපතල බලපෑම් අත්විඳිමින් සිටින බවය.

ඉන් අතරතුර, කාන්තාවන්ට සහ දුප්පත් ජනතාවට දැඩි බලපෑම් සිදුකරන IMF මගින් ගෙන එන ආර්ථික වැඩසටහන් මගින් රටේ අනාගතය තවදුරටත් අවදානමට පත්ව ඇති බවත් සංගමය සඳහන් කර ඇත.

මේ ආර්ථික අර්බුදය තුළ විශ්වවිද්‍යාල ශිෂ්‍යයන් පවා පාඩු විඳින අතර, රජය උදාසීනව ක්‍රියා කරමින් සිසුන්ගේ මූලික අයිතිවාසිකම් කඩාකප්පල් කරන බවත් ප්‍රකාශනයේ දැක්වේ.

එසේම, SLUG ක්‍රීඩා උළෙල මෙවන් තත්ත්වයකදී පවත්වා ගැනීම අසාධාරණ බව පෙන්වා දෙමින්, සමාජය හා විශ්වවිද්‍යාල සිසුන්ගේ අයිතිවාසිකම් ආරක්ෂා කිරීම සඳහා රජරට විශ්වවිද්‍යාල ශිෂ්‍ය සංගමය මෙම විරෝධය පළ කළේ ය.

”ක්‍රීඩා උළෙල පැවැත්වෙන රජරට විශ්වවිද්‍යාල භූමියට පවතින මජර, දූෂිත දේශපාලන ක්‍රමය නියෝජනය කරන පාර්ශවය පැමිණීමෙන් රජරට විශ්වවිද්‍යාල මහා ශිෂ්‍ය සංගමය දැඩි පිළිකුලෙන් යුතුව ප්‍රතික්ෂේප කරන අතර ඊට තරයේ විරුද්ධ වන්නෙමු” ලෙස එම ලිපියේ අවසානයේ රජරට විශ්ව විද්‍යාලයේ මහා ශිෂ්‍ය සංගමයේ සභාපති යොහාන් කවිශ්ක විසින් සදහන් කර ඇත.

නැගෙනහිර විශ්වවිද්‍යාලයේ තාක්ෂණ පීඨයේ සිසුන් 15 දෙනෙක් ඊයේ (03) රාත්‍රියේ නවක වදය සම්බන්ධයෙන් අපරාධ පරීක්ෂණ දෙපාර්තමේන්තුවේ විමර්ශන ඒකකය මගින් අත්අඩංගුවට ගෙන තිබේ.

අත්අඩංගුවට ගෙන ඇත්තේ සිසුවියන් 06 දෙනෙකුත්, සිසුන් 09 දෙනෙකුත් වන අතර, ඔවුන් 21/22 අධ්‍යයන වර්ෂයේ ශිෂ්‍යාවන්ට අසභ්‍ය වචන භාවිතා කර බැන තර්ජනය කිරීම හා නවක වදය සිදුකිරීමේ අදාළ චෝදනා යටතේය.

අත්අඩංගුවට ගත් සිසුන් හා සිසුවියන් බණ්ඩාරවෙල, අතුරුගිරිය, ඇටම්පිටිය, කෝට්ටේ, ගල්අමුණ, ලුණුගම්වෙහෙර, අලහේනේගම, කන්තලේ, ගම්පොල, වතුරුගම, අඟුරුවාතොට, මීවනපලාන, පන්නිපිටිය, හුගස්තලාව සහ බණ්ඩාරගම යන ප්‍රදේශවල පදිංචි අය ලෙස හඳුනාගෙන ඇත.

දැදුරඔය ජලාශයේ “දැදුරු නයා” හෙවත් “ජයන්ට් ස්නේක් හෙඩ්” මත්ස්‍යයන් ආරක්ෂිතව ඉවත් කිරීමේ අරමුණින් විශේෂ මසුන් අල්ලා ගැනීමේ තරගයක් පැවැත්වීමට සූදානම් විය.

ජාතික ජල ජීවී වගා සංවර්ධන අධිකාරිය, ධීවර හා ජලජ සම්පත් දෙපාර්තමේන්තුව සහ වයඹ පළාත් ධීවර අමාත්‍යාංශය එක්ව සංවිධානය කරන මෙම තරගය ලබන 20 වැනිදා අලුයම 5.00 සිට දහවල් 1.00 දක්වා, දැදුරඔය ජලාශයේ නාටියා පාලම ආසන්නයේදී පැවැත්වීමට කටයුතු කර ඇත.

තරගකරුවන්ට භාවිතා කළ හැක්කේ බිලී පිති පමණක් වන අතර, දැල් හෝ වෙනත් ධීවර උපකරණ භාවිතා කිරීමට ඉඩ නොමැත. වෙනත් මසුන් අසුවුහොත්, ආරක්ෂිතව මුදා හැරීම තරගකරුවන්ගේ වගකීම යටතේ සිදු කළ යුතු අතර, අල්ලා ගන්නා මසුන් බෙදා ගැනීමට හැකියාවක් නොමැත.

දහවල් 1.00 වන විට, වැඩිම මසුන් අල්ලාගත් තරගකරුවන්ට මුදල් ත්‍යාග සහ සම්මාන ප්‍රදාන කෙරේ. ප්‍රථම ස්ථානය සඳහා රු. 25,000, දෙවන ස්ථානයට රු. 15,000, තෙවැනි ස්ථානයට රු. 10,000 යි. එයට අමතරව සම්මාන 10 ක් ද ප්‍රදානය කෙරේ. ජයග්‍රාහකයන් තෝරා ගැනීම අල්ලාගත් මසුන් ප්‍රමාණය අනුව වන අතර, බර අනුව නොවේ.

සංවිධායකයන් සදහන් කළේ, දැදුරු නයා මත්ස්‍යයා ස්වදේශීය ජලජ සත්වයන්ට තර්ජනයක් විය හැකි බැවින්, එය ආරක්ෂිතව ඉවත් කිරීම සහ ජනතාවට මෙම ආක්‍රමණශීලී මසුන් පිළිබඳ අවධාරණය ලබා දීම මෙම තරගයේ ප්‍රධාන අරමුණ බවයි.

තරතරගයට සහභාගි වන අය 076 3834369 අංකයට ඇමතීමෙන් වැඩි විස්තර ලබාගැනීමට හැකි බවද සංවිධායකයන් සඳහන් කරයි.

මහජන මුදල් අවභාවිත කිරීම සම්බන්ධයෙන් චෝදනා විමර්ශන කොමිෂන් සභාව හමුවට සමගි ජන බලවේගයේ නායක සහ විපක්ෂ නායක සජිත් ප්‍රේමදාස මහතා කැඳවීමට නියමිත බවට වාර්තා පළ වේ.

මෙම කැඳවීම සිදු කෙරෙන්නේ, ඔහුට එරෙහිව ලැබී ඇති පැමිණිල්ලක් සම්බන්ධයෙන් සිදු කරන විමර්ශනයකට අදාළව ප්‍රකාශයක් සටහන් කර ගැනීම සඳහාය.

එක්සත් ජාතික පක්ෂයේ සිරිකොත මූලස්ථානය රජයේ මුදල් යොදවා සංවර්ධනය කළ බවට එම පැමිණිල්ලෙන් චෝදනා එල්ල වී තිබේ.

අමාත්‍ය ධුරයක් දරන සමයේදී මෙම සිදුවීම සිදුව ඇති බවට වාර්තා වේ.

වන සතුන් පළවා හැරීම සඳහා ශබ්ද තරංග භාවිතා කිරීම සම්බන්ධයෙන් පොල් පර්යේෂණ ආයතනය විසින් සිදුකළ පර්යේෂණය අවසන් අදියරේ පවතින බව පොල් පර්යේෂණ ආයතනයේ නියෝජ්‍ය අධ්‍යක්ෂ නයනි ආරච්චිගේ පවසයි.

මෙම ශබ්ද තරංග යන්ත්‍ර වගාවන්ට හානි සිදුකරන වන අලින් ,වදුරන් රිලවුන් වැනි සතුන් ඉලක්ක කර ගනිමින් සකසා ඇත.

පර්යේෂණ වලට අනුව මෙම ශබ්ද තරංග යන්ත්‍ර ඔස්සේ වනසතුන් පළවා හැරීම මේ වන විට නිර්දේශ කළ හැකි මට්ටමේ පවතින බව ඇය ප්‍රකාශ කළාය.

ඒ අනුව වගා භූමියන් තුළ මෙම යන්ත්‍රවල ක්‍රියාකාරීත්වය පරීක්ෂා කර බැලීමට නියමිතව ඇති බවත් එලෙස පරීක්ෂා කිරීමේ වට කිහිපයකින් පසුව වනජීවී දෙපාර්තමෙන්තුව සමඟ එක්ව වගාකරුවන් වෙත ශබ්ද තරංග යන්ත්‍ර ලබාදිය හැකි බව නියෝජ්‍ය අධ්‍යක්ෂවරිය වැඩිදුරටත් පැවසුවාය.