මහ බැංකුවේ හිටපු අධිපතිවරයෙකු වන අජිත් නිවාඩ් කබ්රාල්ට එරෙහි අධිචෝදනාව ඉල්ලා අස් කරගත්තේ කොන්දේසියක් මත බව අල්ලස් කොමිසම පවසයි.

නිවේදනයක් නිකුත් කරමින් අල්ලස් හෝ දූෂණ විමර්ශන කොමිෂන් සභාව පවසන්නේ ශ්‍රී ලංකා මහ බැංකුවේ හිටපු අධිපති නිවාඩ් අජිත් ලෙස්ලි කබ්රාල් සහ තවත් හතර දෙනෙකුට එරෙහිව කොළඹ මහාධිකරණයේ පවරා තිබූ උක්ත නඩුවට අදාළ අධිචෝදනාවන්ගෙන් පළමු චූදිත වන, නිවාඩ් අජිත් ලෙස්ලි කබ්රාල් යන අයට එරෙහිව ඇති අධිචෝදනාවන් දූෂණ විරෝධී පනතේ 67 (1) වගන්තිය ප්‍රකාරව ඉවත් කරගැනීම සම්බන්ධව සලකා බලන ලෙසට පළමු චූදිත විසින් කර තිබූ ඉල්ලීමට අනුව, දූෂණ විරෝධී පනතේ 67 (2) වගන්තිය ප්‍රකාරව වන කරුණු සලකා බැලූ අධ්‍යක්ෂ ජනරාල්වරයා විසින් අල්ලස් හෝ දූෂණ චෝදනා විමර්ශන කොමිෂන් සභාවේ අනුමැතිය ඇතිව දූෂණ විරෝධී පනතේ 67 (3) වගන්තිය ප්‍රකාරව වන පහත සඳහන් කොන්දේසිය මත එම පළමු වුදිතට එරෙහිව වන අධිචෝදනාව අද දින (2025.12.10 දින) ඉල්ලා අස්කර ගත් බව ය.

එම කොන්දේසිය නම්,

“මෙම අධිචෝදනාවන් ඉල්ලා අස්කර ගන්නා දිනයේ සිට මාස 3 ක කාල සීමාවක් ඇතුළත පළමු චූදිත විසින් මෙම වරදට අදාළව සිදු වූ අලාභය ලෙස ගණනය කර ඇති රු.1,843,267,595.65 (රුපියල් එකසිය අසූහතර කෝටි තිස් දෙලක්ෂ හැට හත්දහස් පන්සිය අනූ පහයි ශත හැට පහක ) ක මුදලක් වන්දියක් ලෙස
ශ්‍රී ලංකා මහ බැංකුවේ පහත සඳහන් ගිණුමට බැර කළ යුතු ය”

එම ඉල්ලා අස්කර ගැනීමට මහාධිකරණය අවසර දුන් අතර, ඒ අනුව, මාස 3 ක කාලසීමාවක් ඇතුළත පළමු චූදිත විසින් රු.1,843,267,595.65 ක මුදල ශ්‍රී ලංකා මහ බැංකුවේ ලබා දී ඇති ගිණුමට බැර නොකළහොත් දූෂණ විරෝධී පනතේ 67 (5) වගන්තිය ප්‍රකාරව නැවත ඔහුට අධිචෝදනාවන් ගොණු කිරීමට පියවර ගනු
ලබන බව ද අල්ලස් කොමිසම පවසයි.

එම නඩුවේ අනෙක් චුදිතයන්ට එරෙහිව ඇති අධිචෝදනාවන් අපරාධ නඩු විධාන සංග්‍රහයේ 194 (3) වගන්තිය ප්‍රකාරව ඉල්ලා අස්කරගත් අතර, ඒ අනුව, මහාධිකරණය විසින් එම චූදිතයන් නිදහස් කර ඇති බවත්, මෙම නඩුවෙන් චූදිතයන් නිදොස් කොට ඇති බවට පළවන මාධ්‍ය වාර්තා නිවැරදි නොවන බව ද අල්ලස් කොමිසම තම නිවේදනය මගින් වැඩිදුරටත් දැනුම් දී තිබේ.

අල්ලස් කොමිසම විසින් නිකුත් කරන ලද නිවේදනය පහතින්..

මුදල් විශුද්ධිකරණය වැළැක්වීමේ පනත යටතේ චෝදනා ලබා සිටින හිටපු ජනාධිපති මහින්ද රාජපක්ෂගේ පුත්, යෝෂිත රාජපක්ෂගේ මිත්තණිය වන ඩේසි ෆොරස්ට්, නඩු කටයුත්තකට පෙනී සිටිමට තරම් සුදුසු මානසික තත්ත්වයක පසුවනවා දැයි හෙට දින කොළඹ අධිකරණ වෛද්‍ය නිලධාරියා මාර්ගයෙන් පරීක්ෂා කිරීමට නියමිත බව නීතිපතිවරයා අද කොළඹ මහාධිකරණයට දැනුම් දී තිබේ.

මෙම නඩුව අද කොළඹ මහාධිකරණ විනිසුරු රශ්මි සිංගප්පුලි ඉදිරියේ කැඳවූ අවස්ථාවේදී රජයේ නීතිඥ ඔක්ස්වල්ඩ් පෙරේරා විසින් මෙම දැනුම්දීම සිදු කර තිබේ.

මෙම නඩුව අද දින කැඳවනු ලැබුවේ යෝජිත පිළිගැනීම් පිළිබඳව සලකා බැලීමට වන අතර, එහෙත් රජයේ නීතිඥ ඔක්ස්වල්ඩ් පෙරේරා අධිකරණයට දන්වා සිටියේ විත්තිකරුවන්ට එරෙහිව මෙම නඩුව හා සම්බන්ධිත තවත් නඩුවක් අංක 08 මහාධිකරණය හමුවේ විභාග වන බව ය.

රජයේ අධිනීතිඥ ඔක්ස්වල්ඩ් පෙරේරා ප්‍රකාශ කළේ එම නඩුව විභාගයට ගත් අවස්ථාවේ දී විත්තිකාර ඩේසි ෆොරස්ට් හට නඩු විභාගයකට මුහුණ දීමට සුදුසු මානසික මට්ටමක් නොමැති බවට ඇයගේ නීතිඥවරයා අධිකරණයට දැනුම් දුන් බව රජයේ නීතිඥවරයා ප්‍රකාශ කළ අතර, ඒ අනුව අදාළ විත්තිකාරිය නඩු විභාගයකට මුහුණ දීමට සුදුසු මානසික තත්ත්වයකින් පසුවනවා දැයි නිගමනය කිරීම සඳහා කොළඹ අධිකරණ වෛද්‍ය නිලධාරියා මාර්ගයෙන් විශේෂඥ වෛද්‍ය වාර්තාවක් කැඳවීමට නියෝග කළ බව ය.

එම අධිකරණ නියෝගය පරිදි විත්තිකාරිය අදාළ පරීක්ෂණය සඳහා හෙට දින පෙනී සිටීමට නියමිත බව රජයේ නීතිඥවරයා කියා සිටි අතර, අදාළ පරීක්ෂණයේ වාර්තාව ඉදිරිපත් වූ පසු විත්තිකාරිය නඩු විභාගයකට පෙනී සිටීමට සුදුසු මානසික තත්ත්වයකින් පසුවනවා ද යන කාරණය පිළිබඳව පැමිණිල්ල සලකා බලන බව ද රජයේ නීතිඥවරයා අධිකරණයට දන්වා සිටියේ ය.

ඒ අනුව, අදාළ පරීක්ෂණ වාර්තාව ලැබෙන තෙක් නඩුව කල් තබන ලෙස රජයේ නීතිඥවරයා අධිකරණයෙන් ඉල්ලා සිටි අතර, ඉදිරිපත් වූ කරුණු සලකා බැලූ විනිසුරුවරයා නඩුව යළි පෙබරවාරි මස 09 වැනිදා කැඳවන ලෙස නියෝග කළේ ය.

අයහපත් කාලගුණික තත්ත්වයන්ගෙන් පීඩාවට පත් ප්‍රදේශ පිළිබඳ තොරතුරු රැස් කිරීම සඳහා විපක්ෂ නායක සජිත් ප්‍රේමදාස විසින් අද (දෙසැම්බර් 10) දින පෙරවරුවේ කොළඹ පිහිටි විපක්ෂ නායක කාර්යාලයේදී ආපදා තොරතුරු මධ්‍යස්ථානයක් විවෘත කරන ලදී.

විපක්ෂ නායක කාර්යාලය පවසන පරිදි, මෙම වැඩසටහනේ ප්‍රාථමික අරමුණ වන්නේ ආපදාවට පත් ප්‍රදේශවලින් ග්‍රාම නිලධාරි කොට්ඨාස මට්ටමින් තොරතුරු රැස් කිරීමයි.

පීඩාවට පත් පුද්ගලයන්ට තම ගැටලු සහ අවශ්‍යතා දුරකථන සහ WhatsApp ඔස්සේ සෘජුවම මෙම තොරතුරු මධ්‍යස්ථානයට වාර්තා කිරීමට පහසුකම් සලසා ඇත.

ඒ සඳහා භාවිතා කළ හැකි දුරකථන අංක පහත දැක්වේ:

0759 570 570

0761 660 570

0705 699 110

වැදගත්: තොරතුරු මධ්‍යස්ථානය උදෑසන 9:00 සිට සවස 4:00 දක්වා ක්‍රියාත්මක වන අතර, ලැබෙන තොරතුරු අදාළ බලධාරීන් වෙත යොමු කිරීමට කටයුතු කරනු ඇත.

Rebuilding Sri Lanka වැඩසටහන සඳහා මෙරට පුරවැසියන්, විදේශගත ශ්‍රී ලාංකිකයන් සහ පෞද්ගලික සංවිධාන ගණනාවක් මඟින් රුපියල් මිලියන 1,893ක මූල්‍ය සහායක් ලැබී ඇති බව මුදල් අමාත්‍යාංශය නිවේදනය කර ඇත.

මුදල්, සැලසුම් සහ ආර්ථික සංවර්ධන අමාත්‍යාංශයේ ලේකම් ආචාර්ය හර්ෂණ සූරියප්පෙරුම පැවසුවේ, මෙම දායකත්වයන් ‘දිත්ව’ සුළි කුණාටුවෙන් පීඩාවට පත් ප්‍රජාවන් යළි නඟා සිටුවීම සඳහා යොමු කෙරෙන බවයි.

• නිවාස ප්‍රතිසංස්කරණය

• යටිතල පහසුකම් සංවර්ධනය

• ප්‍රධාන පොදු සේවා ප්‍රතිෂ්ඨාපනය

යනාදිය මෙයට ඇතුළත් වේ.

මෙම වැඩසටහන දියත් කර ඇත්තේ ආපදාවෙන් හානියට පත් නිවාස, ජීවනෝපාය මාර්ග, පාසල් ප්‍රතිසංස්කරණය, වාරිමාර්ග පද්ධති සහ පොදු යටිතල පහසුකම් කෙරෙහි අවධානය යොමු කරමින් දිගුකාලීන ප්‍රකෘතිමත් වීම සඳහා සහාය වීමටය.

දායක මුදල් තවදුරටත් භාර ගන්නා බවත්, ජාතික ප්‍රතිනිර්මාණ ප්‍රයත්නයට සහාය වීම සඳහා පුද්ගලයන්ට, ආයතනික ආයතනවලට සහ විදේශගත ශ්‍රී ලාංකිකයන්ට ආරාධනා කරන බවත් අමාත්‍යාංශය සඳහන් කරයි.

ඔබගේ දායකත්වය ලබා දීමට:

නිල රජයේ අරමුදල් රැස් කිරීමේ ද්වාරය: https://donate.gov.lk/

ජාතික ගොඩනැගිලි පර්යේෂණ සංවිධානය (NBRO) විසින් නිකුත් කර ඇති අඛණ්ඩ ‘රතු මට්ටමේ’ නාය යෑමේ අනතුරු ඇඟවීම් අනුව, මහනුවර දිස්ත්‍රික්කය “වෙනත් තැනකට ගෙන යාමට පවා සිදුවිය හැකි” බවට අමාත්‍ය කේ.ඩී. ලාල් කාන්ත අතිශය දැඩි කෝපයකින් යුතුව අනතුරු අඟවා තිබේ.

දිස්ත්‍රික්කය යථා තත්ත්වයට පත් කිරීමේ කටයුතු ඉදිරියට ගෙන යාමට බලධාරීන් අරගල කරමින් සිටින්නේ තත්ත්වය ආරක්ෂිත බව තහවුරු කරමින් එම ආයතනය වෙතින් පැහැදිලි ‘කොළ එළියක්’ ලැබී නොමැති බැවින් යැයි ද අමාත්‍යවරයා පැවසීය.

“පාසල් විවෘත කරන්න පුළුවන් කිව්වට, අපිට වෙන්නේ පාසල් විවෘත නොකර, තවත් මිනිස්සුන්ව පාසල්වලට  ගෙනල්ලා දාන්න” – දැඩි සේ කෝපයට පත්ව සිටි ලාල් කාන්ත මාධ්‍යවේදීන් හමුවේ පැවසීය.

අමාත්‍යවරයාගේ මෙම ආන්දෝලනාත්මක ප්‍රකාශය නිකුත් වන්නේ මහනුවර, කෑගල්ල, කුරුණෑගල සහ මාතලේ යන දිස්ත්‍රික්ක හරහා නාය යෑමේ අවදානම හේතුවෙන් ජනතාව ඉවත් කිරීමේ අනතුරු ඇඟවීම් තවදුරටත් ක්‍රියාත්මක වෙමින් පවතින පසුබිමකය.

NBRO වාර්තා අනුව, මහනුවර දිස්ත්‍රික්කයේ පමණක් ප්‍රදේශ 20කට වැඩි ප්‍රමාණයක් ඉහළම අවදානම් මට්ටම වන ‘ 3 වෙනි මට්ටමේ රතු ඇඟවීම්’ යටතේ පවතී.

තත්ත්වය පිරිහී යාම හමුවේ ක්ෂේත්‍රයේ යොදවා ඇති කණ්ඩායම් සංඛ්‍යාව වැඩි කිරීමට සිදුවන බවත්, ජාත්‍යන්තර සහාය ලබා ගැනීම සඳහා සළකා බලන බවත් ලාල් කාන්ත වැඩිදුරටත් ප්‍රකාශ කළේය.

මිනිසුන් කොතැනට ගෙන යන්නේද?

පාසල් දිගටම රැඳවුම් ස්ථාන ලෙස තබන්නේද?

සාමාන්‍ය කටයුතු නැවත ආරම්භ කරන්නේ කවදාද?

යන කිසිදු ස්ථිර තීරණයක් NBRO වෙතින් පැහැදිලි මාර්ගෝපදේශ නොමැතිව ගත නොහැකි බවට ඔහු චෝදනා කළේය.

“අපිට හැම කොට්ඨාස ලේකම් කාර්යාලයක්ම මාරු කරන්න බැහැ. නමුත් අපි ඇතැම් ප්‍රදේශවලට ප්‍රමුඛත්වය දෙන්න කියලා ඉල්ලුවා,” යැයි ඔහු අවධාරණය කළේය.

අමාත්‍යවරයා අවසාන වශයෙන් අවධාරණය කළේ, ව්‍යසනයෙන් පසු සාමාන්‍ය තත්ත්වයට පත් කිරීමේ පුළුල් වූ වගකීම් හේතුවෙන්, දිස්ත්‍රික් මට්ටමේ කමිටු සමඟින් කොට්ඨාස සම්බන්ධීකරණ කමිටු ද දැන් අනිවාර්යයෙන්ම නිතිපතා රැස්විය යුතු බවයි.

ශ්‍රේෂ්ඨාධිකරණ විනිසුරු යසන්ත කෝදාගොඩ වැඩබලන අගවිනිසුරු ලෙස පත්කර ඇත.

අගවිනිසුරු ප්‍රීති පද්මන් සූරසේනගේ නායකත්වයෙන් යුත් විනිසුරුවරුන් 9 දෙනෙකුගෙන් යුත් කණ්ඩායමක් සතියක නිල අධ්‍යයන චාරිකාවක් සඳහා ඉන්දියාව බලා පිටත්ව යන බැවින් මෙම පත්වීම සිදුකර ඇත.

ඔහු වැඩබලන අගවිනිසුරු ලෙස පත්කරන ලද පළමු අවස්ථාව මෙයයි.

විනිසුරු කෝදාගොඩ නීතිපති දෙපාර්තමේන්තුවේ රජයේ නීතිඥවරයකු ලෙස නීතිපති දෙපාර්තමේන්තුවේ සිය නීති වෘත්තිය ආරම්භ කළේය.

නීතිපති දෙපාර්තමේන්තුවේ ජ්‍යෙෂ්ඨ අතිරේක සොලිසිටර් ජෙනරාල්වරයෙකු ලෙස සේවය කරන අතරතුර අභියාචනාධිකරණයේ සභාපති ලෙස අධිකරණයට සේවයට පත්කරන ලදී.

පසුව ඔහු ශ්‍රේෂ්ඨාධිකරණයට උසස් කරන ලදී.