නිකිණි පුර පසලොස්වක පෝය දිනය අදට යෙදී තිබේ. සම්බුදු හිමිගේ උපස්ථායකත්වය දැරූ උතුම් ආනන්ද හිමි රහත් භාවයට පත්වීම ඇතුළු ශාසනික වශයෙන් ඓතිහාසික සිදුවීම් ගණනාවක් සිදුවීම නිසා නිකිණි පොහොය ලොව මහත් බෞද්ධ ජනතාව ඉතා උනන්දුවෙන් සමරනු ලැබේ.
ප්‍රථම ධර්ම සංගායනාව පැවැත්වීම, පෙර වස් මගහැරි භික්ෂූන් වහන්සේ පසුවස් එළඹීම මෙන්ම බුදුන්වහන්සේගේ ලලාට ධාතු තැන්පත් කරමින් සේරුවිල දා ගැබ තැනීම ආරම්භ කිරීම ඇතුළු සාසනික කරුණු ගණනාවක් මෙම පුන් පොහොය හා බැදී ඇත.
ඊයේ දිනයේදී ප්‍රංශයේ ඕඩ් කලාපයේ දරුණු ලැව්ගිනි තත්ත්වයක් හටගෙන තිබේ. විදෙස් වාර්තා පෙන්වා දෙන්නේ එරට තුළ වසර 80කට ආසන්න කාලයකට පසු ඇති වූ විශාලතම ලැව් ගින්න මෙය බවයි. ගින්න පාලනය කිරීම සඳහා ප්‍රංශ ගිනි නිවන භටයින් දැඩි සටනක් දුන්නද, ඒ වන විටත් දකුණුදිග ඕඩ් කලාපයේ විශාල ලෙස ගින්න පැතිරගොස් අවසන්ය. එම කලාපයේ වනාන්තර සහ ගම්මාන හරහා ගින්න ඉතා වේගයෙන් පැතිර ගොස් ඇති අතර, අවම වශයෙන් නිවාස 25ක් ගිනිබත් වන්නට ඇති බවටද ප්‍රංශ බලධාරින් විශ්වාසය පළකර තිබේ. මේ අතර Perpignan නගරයට කිලෝමීටර් 30ක් පමණ දුරින් පිහිටි ශාන්ත ලෝරන්ට් ඩි ලා කැබ්‍රෙරිස් ගම්මානයේ එක් පුද්ගලයෙකුද ලැව්ගිනි තත්ත්වය හේතුවෙන් ජීවතක්ෂයට පත්ව තිබෙන බව විදෙස් වාර්තා අනාවරණය කර ඇති බවත්, ප්‍රංශය මෙවැනි ලැව්ගිනි තත්ත්වයකට අවසන් වරට මුහුණදී ඇත්තේ 1949 වසරේදී පමණ බවත් එම වාර්තා වැඩිදුරටත් පවසා ඇත.
ප්‍රීම් සැට් චන්ද්‍රිකාව යොදා ගෙන ශ්‍රී ලංකාව අභ්‍යවකාශ යුගයට එළඹී බවට රාජපක්ෂවරු දියත් කළ මිත්‍යාව බැලුම් බෝලයක් සේ අගමැතිනි හරිනි අමරසූරිය අද පුපුරුවා හැරි බව මහාචාර්ය නිර්මාල් රංජිත් දේවසිරි පවසයි.
මෙම ව්‍යාපෘතිය සඳහා ශ්‍රී ලංකාවේ කිසිදු සම්බන්ධයක් නොමැති බවත් එය චීන සමාගමක කටයුත්තක් බවත් අගමැතිවරිය අනාවරණය කිරීමත් සමග එය රාජපක්ෂලාට පාරාවළල්ලක් වී ඇති බව ද ඔහු සඳහන් කරයි.
ඇතැමුන් පවසන පරිදි සිය ආණ්ඩු දෙවරක් පෙරළෙන තුරු රාජපක්ෂලා තමන්ට එල්ල කළ චෝදනා හමුවේ නිහඬව සිටියේ නම් ඔවුන් චිංචිමානවිකාව වැන්නන්ගේ චෝදනා හමුවේ උපේක්ෂාවෙන් කටයුතු කළ බුදුන් වහන්සේ වැනි බවත් මහාචාර්ය නිර්මාල් රංජිත් ප්‍රකාශ කරයි.
සිය අන්තර්ජාල නාලිකාවට වීඩියෝවක් නිකුත් කරමින් හෙතෙම මේ බව කීය.
මෙම ශ්‍රී ලංකා පන්දුවාර විස්සයි – විස්ස ලීග් ක්‍රිකට් තරගාවලිය කොළඹ එස්. එස්. සී. ක්‍රීඩාංගණයේ දී අද (07) ආරම්භ වේ. තරගාවලිය නැරඹීම සඳහා ක්‍රීඩා ලෝලීන්ට නොමිලේ අවස්ථාව ලබා දීමට ශ්‍රී ලංකා ක්‍රිකට් ආයතනය පියවර ගෙන තිබේ.
ශ්‍රී ලංකා ක්‍රිකට් ආයතනය විසින් සිම්බාබ්වේ සංචාරය සඳහා ක්‍රීඩකයින් තෝරා ගැනීමේ අරමුණින් සංවිධාන කරන මෙම තරගාවලිය ජාතික මට්ටමේ ක්‍රීඩකයන්ගේ පමණක් නොව, නැගී එන ක්‍රීඩකයින්ගේ දක්ෂතා ද ක්‍රීඩා ලෝලීන්ට සජීවීව දැක බලා ගැනීමට අවස්ථාව උදා කර ඇත.
පස්වරු 1.30ට ආරම්භ වන මුලික තරගය නිල් කණ්ඩායම සහ කොළ කණ්ඩායම අතර පැවැත්වෙන අතර, එය කොළඹ එස්.එස්.සී. (SSC) ක්‍රීඩාංගණයේ දී පවත්වන ලදී. තරගය නැරඹීමට ක්‍රීඩා ලෝලීන් සඳහා එදින පස්වරු 12.30 සිට අවස්ථාව විවර වී තිබේ.
තරගාවලියේ මුලික වටය ලීග් ක්‍රමය මත පදනම්ව පැවැත්වෙන අතර, සෑම කණ්ඩායමක්ම තරග 4ක් වටා ක්‍රීඩා කරනු ඇත. ඒ තුළින් වැඩිම ප්‍රසාද ලකුණු රැස් කරන කණ්ඩායම් දෙකක් අගෝස්තු 16 වනදා පැවැත්වෙන අවසන් තරගයට සුදුසුකම් ලබන බව ක්‍රීඩා ආරංචි මාර්ග සදහන් කරයි.
හිටපු අමාත්‍ය රාජිත සේනාරත්න මහතා අල්ලස් චෝදනාවක් සම්බන්ධයෙන් අපේක්ෂිත ඇප ඉල්ලා ඉදිරිපත් කළ පෙත්සම විභාග කිරීම සැප්තැම්බර් 01 වන දින දක්වා කල් තැබීමට කොළඹ මහාධිකරණය අද (අගෝස්තු 7) නියෝග කළේය.
මෙම පෙත්සම අද දින කොළඹ මහාධිකරණ විනිසුරු ඉන්ද්‍රිකා කාලිංගවංශ මහත්මිය ඉදිරියේ කැඳවූ අවස්ථාවේදී, අල්ලස් කොමිසම වෙනුවෙන් පෙනී සිටි සහකාර අධ්‍යක්ෂිකා සුලෝචනා හෙට්ටිආරච්චි මහත්මිය ප්‍රකාශ කළේ නඩුකරයට අදාළ නොතීසි තම කොමිසමට නොලැබුණු බවයි. ඇය වැඩිදුරටත් සඳහන් කළේ ලැබුණු තොරතුරු මත පමණක් අද දින අධිකරණයට පැමිණි බවයි.
පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥ මෛත්‍රී ගුණරත්න මහතා කියා සිටියේ, නොතීසි නිසි පරිදි භාර දී තිබුණත් යම් අතපසුවීමක් සිදුවන්නට ඇති බවයි. කෙසේ වෙතත්, අල්ලස් කොමිසමේ නිලධාරීන් අධිකරණයට පැමිණ සිටින බැවින් පෙත්සම අද දින සලකා බැලිය හැකි බවට ඔහු කරුණු දැක්වීය.
නමුත් මහාධිකරණ විනිසුරුවරිය තීරණය කළේ, නොතීසි නිසියාකාරව නිකුත් කිරීමකින් තොරව පෙත්සම විභාග කළ නොහැකි බවයි. ඒ අනුව, ඇය පෙත්සම සැප්තැම්බර් 01 දිනට කල් තැබූ අතර, එදිනට පෙර අල්ලස් කොමිසම වෙත නොතීසි නිකුත් කරන ලෙස නියෝග කළාය.
හිටපු ධීවර අමාත්‍යවරයා ලෙස කිරින්ද ධීවර වරායේ වැලි කැණීම් කටයුතු කොරියානු සමාගමකට පැවරීමෙන් රජයට රුපියල් ලක්ෂ 262කට අධික පාඩුවක් සිදුකළ බවට රාජිත සේනාරත්න මහතාට අල්ලස් කොමිසම විසින් චෝදනා එල්ල කර ඇත. මෙම චෝදනා සම්බන්ධයෙන් ඔහු අත්අඩංගුවට ගැනීමට පෙර අපේක්ෂිත ඇපයක් ඉල්ලා කොළඹ ප්‍රධාන මහෙස්ත්‍රාත් අධිකරණයට ඉදිරිපත් කළ පෙත්සම ප්‍රතික්ෂේප වීමෙන් අනතුරුව, මහෙස්ත්‍රාත් අධිකරණයේ තීන්දුව ප්‍රතිශෝධනය කර අපේක්ෂිත ඇප නියම කරන ලෙස ඉල්ලා ඔහු කොළඹ මහාධිකරණයට මෙම පෙත්සම ඉදිරිපත් කර තිබේ.
අභියාචනාධිකරණයේ නඩු ගොනුවක පිටු අනීතික ලෙස ඉරා ඉවත් කිරීමේ චෝදනාවට වරදකරු වූ නීතිඥ ඩබ්ලිව්.ඩී. ධර්මසිරි කරුණාරත්නගේ නීතිඥභාවය අහෝසි කිරීමට ශ්‍රේෂ්ඨාධිකරණය ඊයේ (6) නියෝග කළේය.
අගවිනිසුරු ප්‍රීති පද්මන් සූරසේන, කුමුදුනි වික්‍රමසිංහ සහ අචල වෙංගප්පුලි යන ශ්‍රේෂ්ඨාධිකරණ විනිසුරුවරුන්ගෙන් සමන්විත ත්‍රිපුද්ගල විනිසුරු මඬුල්ලක් විසින් මෙම තීන්දුව ප්‍රකාශයට පත් කරන ලදී.
අභියාචනාධිකරණයේ ලේඛකාධිකාරීවරයා විසින් මරදාන පොලිසියට කරන ලද පැමිණිල්ලකට අනුව, අදාළ නීතිඥවරයා අභියාචනාධිකරණයේ ලේඛනාගාරයට පිවිස නඩු ගොනුවකින් පිටු දෙකක් ඉරා ඉවත් කර ඇති බවට චෝදනා එල්ල විය.
මෙම චෝදනා සම්බන්ධයෙන් විභාගයක් පැවැත්වීමෙන් අනතුරුව තීන්දුව ප්‍රකාශයට පත් කළ අගවිනිසුරුවරයා, නීතිඥවරුන් ලෙස පිළිගෙන බඳවා ගන්නේ හොඳ කීර්තියක්, දක්ෂ දැනුමක් සහ හැකියාවක් ඇති පුද්ගලයන් පමණක් බව අවධාරණය කළේය. නීතිඥයෙකුට අපේක්ෂිත ප්‍රමිතීන් පවත්වා ගැනීමට නොහැකි නම්, ඔහුට තවදුරටත් එම තනතුරේ කටයුතු කිරීමට අවසර දිය නොහැකි බවත්, මෙම ක්‍රියාව සමස්ත නීති වෘත්තියේ කීර්ති නාමයට විශාල කැළලක් බවත් අගවිනිසුරුවරයා සිය තීන්දුවේ සඳහන් කර තිබිණි.
ඒ අනුව, අධිකරණ සංවිධාන පනතේ 42 වන වගන්තිය ප්‍රකාරව වගඋත්තරකාර නීතිඥවරයා වහාම නීතිඥභාවයෙන් ඉවත් කිරීමට ශ්‍රේෂ්ඨාධිකරණය නියෝග කළේය. මෙම තීන්දුව අනුව කටයුතු කර අවශ්‍ය ඉදිරි පියවර ගන්නා ලෙස ශ්‍රේෂ්ඨාධිකරණ විනිසුරු මඬුල්ල එහි රෙජිස්ට්‍රාර්වරයාට වැඩිදුරටත් නියෝග කළේය
ඩොනල්ඩ් ට්‍රම්ප්ගේ බදු ප්‍රතිපත්තිය යටතේ පැනවූ නව තීරුබදු අද (07) සිට ක්‍රියාත්මක වේ.ඒ අනුව මෙරටින් ආනයනය කරනු ලබන භාණ්ඩ සඳහා 20%ක තීරුබද්දක් අද සිට අයකරනු ඇති.
අමෙරිකාව භාණ්ඩ ආනයනය කරනු ලබන රටවල් සඳහා නව තීරුබදු හඳුන්වාදුන් අතර එහිදි ශ්‍රී ලංකාවට 44%ක තීරු බදු ප්‍රතිශතයක් පනවා තිබුණි.
එම බදු ප්‍රතිශතය ක්‍රියාත්මක වුවහොත් එය මෙරට ආර්ථිකයට දැඩි බලපෑමක් එල්ල විය හැකි බැවින් ඉන් සහනයක් ලබාගැනීම සඳහා ශ්‍රී ලංකා රජය අමෙරිකානු බලධාරීන් සමග සාකච්ඡා වට කිහිපයක් පවත්වනු ලැබීය.
එම සාකච්ඡාවලින් 24%ක ඉහළ තීරුබදු ප්‍රතිශතයක් අඩු කරගැනීමට මෙරට නියෝජිතයින් සමත් වීමත් සමග ශ්‍රී ලංකාව සඳහා පනවනු ලැබු තීරුබදු ප්‍රතිශතය 20%ක් වේ.
කෙසේවෙතත් මෙම නව බදු ප්‍රතිපත්තිය පසුගිය පළමු වැනිදා සිට ක්‍රියාත්මක වීමට නියමිතව තිබුණ ද අමෙරිකානු ජනාධිපතිවරයා විසින් එය අද දිනය දක්වා කල් දමනු ලැබීය.
මේ අතර අමෙරිකාව පනවා ඇති තීරුබදු ප්‍රතිශතය තවදුරටත් අඩුකර ගැනීම සඳහා සාකච්ඡා කිරීමට නියමිත බව ශ්‍රී ලංකා අපනයන සංවර්ධන මණ්ඩලයේ සභාපති මංගල විජේසිංහ මහතා පවසයි.
අමෙරිකාව පනවා ඇති තීරුබදු සඳහා මුහුණ දීමේදී ගත යුතු ඉදිරි ක්‍රියාමාර්ග සහ සැලසුම් සම්බන්ධයෙන් අපනයන සංවර්ධන මණ්ඩලයේ දී විශේෂ සාකච්ඡාවක් පැවැත්විය.
SupremeSAT සන්නිවේදන චන්ද්‍රිකා ව්‍යාපෘතිය සඳහා ශ්‍රී ලංකා රජය කිසිදු මුදලක් ආයෝජනය කර නොමැති බව අග්‍රාමාත්‍ය ආචාර්ය හරිනි අමරසූරිය මහත්මිය පාර්ලිමේන්තුවේදී පැවසුවාය. විපක්ෂය විසින් යොමුකළ ප්‍රශ්නයකට පිළිතුරු දෙමින් අගමැතිනිය මේ බව සඳහන් කළේය.
අග්‍රාමාත්‍යවරිය පැහැදිලි කළේ, SupremeSAT සමාගම 2012 වසරේදී ශ්‍රී ලංකා ආයෝජන මණ්ඩලය (BOI) සමඟ ගිවිසුමකට එළඹුණු බවයි. එම ගිවිසුම යටතේ, සමාගම විසින් 2013-2014 කාලය තුළ සන්නිවේදන චන්ද්‍රිකාව සඳහා රුපියල් මිලියන 12.1ක් ආයෝජනය කර ඇත. ආයෝජන අයදුම්පතට අනුව, මෙම ව්‍යාපෘතිය සඳහා රජයේ මුදල් ආයෝජනයක් සිදු වී නොමැත.
එමෙන්ම, මහනුවර කාර්මික උද්‍යානයේ චන්ද්‍රිකා පද්ධතියක් පිහිටුවීම සඳහා Supreme SHST පෞද්ගලික සමාගම රුපියල් මිලියන 1,828ක ආයෝජනයක් සිදු කර ඇති බවත්, ඒ සඳහා ද BOI සමඟ ගිවිසුමක් ඇති බවත් අගමැතිනිය ප්‍රකාශ කළාය.
ආයෝජන මණ්ඩලයේ වාර්තා අනුව, SupremeSAT සමාගම විසින් ශ්‍රී ලංකාවට ලබාදුන් මූල්‍ය ප්‍රතිලාභ පහත පරිදි බවද අගමැතිනිය පෙන්වා දුන්නාය:
2015-2016: රුපියල් මිලියන 19,617
2016-2017: රුපියල් මිලියන 28,133
2017-2018: රුපියල් මිලියන 29,106
2018-2019: රුපියල් මිලියන 34,169
2019-2020: රුපියල් මිලියන 42,960
2020-2021: රුපියල් මිලියන 62,545
2021-2022: රුපියල් මිලියන 87,789
2023 පළමු මාස හය: රුපියල් මිලියන 39,590
නීති විරෝධී ලෙස එකලස් කරන ලද රුපියල් කෝටි 3කට ආසන්න වටිනාකමකින් යුත් සුඛෝපභෝගී වාහනයක් ගරාජයක තිබී වලානේ මධ්‍යම දූෂණ මර්දන ප්‍රහාරක බලකාය විසින් අත්අඩංගුවට ගෙන තිබේ.
වලානේ මධ්‍යම දූෂණ මර්දන ප්‍රහාරක බලකායේ ස්ථානාධිපති ප්‍රධාන පොලිස් පරීක්ෂක ඉන්දික වීරසිංහ මහතාට ලැබුණු තොරතුරක් මත, පොලිස් අධිකාරී කේ.ඒ. උදය කුමාර මහතාගේ සැලසුමක් අනුව මෙම වැටලීම සිදු කර ඇත.
අත්අඩංගුවට ගත් මෙම ව්‍යාජ ලෙස සකස් කරන ලද ටොයෝටා ලෑන්ඩ් කෲසර් ප්‍රාඩෝ වර්ගයේ ජීප් රථය, වැඩිදුර විමර්ශන කටයුතු සඳහා ගනේමුල්ල පොලිසිය වෙත භාර දී තිබේ.
2015 ජනාධිපතිවරණ සමයේ කැරම් බෝඩ් සහ දාම් ලෑලි බෙදා හැරීම සම්බන්ධයෙන් සිර දඬුවම් ලබන හිටපු අමාත්‍යවරුන් වන මහින්දානන්ද අලුත්ගමගේ සහ නලින් ප්‍රනාන්දුට එරෙහි නඩුවට අදාළ ලේඛන අධිකරණයට ඉදිරිපත් කරන ලෙස කොළඹ මහාධිකරණය අද (06) අපරාධ පරීක්ෂණ දෙපාර්තමේන්තුවට (CID) නියෝග කළේය.
මෙම නඩුව අද කැඳවූ අවස්ථාවේදී, නීතිපතිවරයා විසින් ගොනු කරන ලද චෝදනා සලකා බලමින්, අධිකරණය විසින් මෙම නියෝගය නිකුත් කරන ලදී. සතොස ආයතනය හරහා කැරම් බෝඩ් 14,000ක් සහ දාම් ලෑලි 11,000ක් ආනයනය කර එවක ජනාධිපති අපේක්ෂක මහින්ද රාජපක්ෂ මහතාගේ දේශපාලන කාර්යාලවලට බෙදා හැරීමෙන් රජයට පාඩුවක් සිදු කළ බවට ඔවුන්ට චෝදනා එල්ල වී තිබේ.
අද දින නඩුවට අදාළව මහින්දානන්ද අලුත්ගමගේ සහ නලින් ප්‍රනාන්දු මෙන්ම, මෙම සිද්ධියට සම්බන්ධ බවට චෝදනා ලැබ ඇප මත මුදාහැර සිටින ක්‍රීඩා අමාත්‍යාංශයේ හිටපු ලේකම් විශ්‍රාමික මේජර් ජෙනරාල් නන්ද මල්ලවාරච්චි ද අධිකරණයේ පෙනී සිටියේය.
ලැයිස්තුගත කර ඇති ලේඛන හෝ ඒවායේ මුල් පිටපත් CID සතුව තිබේ නම්, ඒවා අද සිට සතියක් ඇතුළත අධිකරණයේ රෙජිස්ට්‍රාර් වෙත ඉදිරිපත් කරන ලෙස කොළඹ මහාධිකරණය නියෝග කළ බව සඳහන් වේ.
