2025 වසරේ අවසාන කාර්තුවේදී ගෝලීය වෙළඳ භාණ්ඩ පරිමාවේ දරුණු කඩාවැටීමක් සිදුවිය හැකිබව ලෝක වෙළඳ සංවිධානය පවසයි.නවතම දත්ත පිළිබඳ වාර්තාව ඉදිරිපත් කරමින් ලෝක වෙළඳ සංවිධානය මේ බව ප්‍රකාශ කර ඇත.

එම දත්තවලට අනුව මෙම වසරේ පළමු කාර්තුවේ දී ලෝක භාණ්ඩ වෙළඳාමේ පරිමාව පෙර කාර්තුවට වඩා සියයට 3.6කින් සහ පෙර වස‍රට සා‍පේක්ෂව සියයට 5.3කින් ඉහළ ගොස් තිබේ. එක්සත් ජනපදයේ ඉහළ තීරුබදු අපේක්ෂාවෙන් උතුරු ඇමරිකාවේ ආනයන වැඩිවීමක් ඊට ප්‍රධාන හේතුව වී ඇත.

කෙසේ වෙතත් වැඩි කළ තීරුබදු, ආනයන ඉල්ලුමට බලපාන බැවින් ඉදිරි මාසවලදී වර්ධන වේගය ලිහිල් වනු ඇතැයි ලෝක වෙළඳ සංවිධානයේ ආර්ථික විද්‍යඥයින් අපේක්ෂා කරයි.

අප්‍රේල් මාසයේ දී නිකුත් කරන ලද ගෝලීය වෙළඳ දැක්ම සහ සංඛ්‍යා ලේඛන වාර්තාවට අනුව ලෝක වෙළඳ සංවිධානය 2025 වසර සඳහා ගෝලීය වෙළඳ භාණ්ඩ පරිමාවේ සියයට 0.2ක පහත වැටීමක් පුරෝකථනය කර තිබිණ. ඒ සමගම එක්සත් ජනපදයේ “අන්‍යෝන්‍ය තීරුබදු” නැවත හඳුන්වා දීමෙන් පසු ගෝලීය වෙළඳාමේ අවිනිශ්තතාවක් මතුව ඇති අතර බරපතල අවාසි පිළිබඳ අවදානම් සම්බන්ධයෙන් අනතුරු අඟවා තිබේ.

පළමු කාර්තුවේදී එක්සත් ජනපද ආනයන වසරින් වසර සියයට 25 කින් ඉහළ ගිය අතර, දෙවන කාර්තුවේ මුල් මාස දෙක තුළ වර්ධනය සියයට 1 දක්වා අඩු වී ඇති බව ලෝක වෙළඳ සංවිධානයේ දත්ත පෙන්වා දෙයි.

නාමල් රාජපක්ෂ හා දයාසිරි ජයසේකරගේ එකතුවෙන් යුතු පුළුල් දේශපාලන සන්ධානයක් නුදුරු දිනේම බිහිවීමේ සම්භාවිතාවක් ඇතිවිය හැකි බව ශ්‍රී ලංකා පොදුජන පෙරමුණේ හිටපු පාර්ලිමේන්තු මන්ත්‍රී සංජීව එදිරිමාන්න මහතා පවසයි. ශ්‍රී ලංකා පොදුජන පෙරමුණු පක්ෂ මූලස්ථානයේ අද පැවැති මාධ්‍ය හමුවක් අමතමින් ඒ මහතා මෙම අදහස් පළ කළේය.

දයාසිරි ජයසේකර මහතා මෙයට පෙරද එක්සත් ජාතික පක්ෂයේ ප්‍රබල නිලයක් දරමින් සිටියදී පවා වයඹ පළාත් සභාවේ මහ ඇමති අපේක්ෂක වශයෙන් ඉදිරිපත්වීමට රාජපක්ෂවරුන් සමග එක්වූ බව සදහන් කල මන්ත්‍රීවරයා පාර්ලිමේන්තුව එළියේ ප්‍රබල විපක්ෂය ගොඩ නගා ඇති අනාගත රටේ නායකත්වය වන නාමල් රාජපක්ෂ හා දයාසිරි අතර එකගතාවයක් ඇතිවීම රටේ යහපතට උචිතම ක්‍රියාවක් බවද පැවසීය.

ඇමරිකාව පැනවූ 30% වෙළඳ බද්ධ අඩුකර ගැනීමට කටයුතු කරන ගමන් ආණ්ඩුව ලෝකයේ ජනප්‍රියත්වයට පත්වන නව වෙළෙඳ පොළක් සොයා යෑම ආරම්භ කල යුතුබව දෙවන පරපුර නායක උවිඳු විජේවීර පවසයි. අද කොළඹ පැවැති මාධ්‍ය හමුවක් අමතමින් උවිඳු විජේවීර මේ අදහස් පලකරන ලදි.

සුජීව සේනසිංහ මහතා ඇප මත මුදා හැරීමට කොටුව මහේස්ත්‍රාත් අධිකරණය අද(16දා) නියෝගය කෙරිණි.

රුපියල් කෝටි දහයක් පමණ වටිනා සුඛෝපභෝගී මෝටර් රථයක් නීති විරෝධීව එකලස් කිරීමේ සිදුවීමට අදාළ නඩුව සම්බන්ධයෙන් අද දිනයේ අධිකරණයේ පෙනී සිටින ලෙස ලැබුණු නියෝගයක් අනුව ඒ මහතා අද අධිකරණය හමුවේ පෙනී සිටි අවස්ථාවේ මෙම නියෝගය දෙනු ලැබිණි.

දේශීය ආයුර්වේදයේ අශ්වගන්ධ තෛලය, මහා නාරායන තෛලය හා නිර්නිර්ගූන්ඩි තෛලය සැලකෙනුයේ ඉතා වටිනා මෙන්ම දුර්ලබ ඖෂධ වර්ගයන් ලෙසිනි. මේ අතරින් ලිංගික බෙලහීනතාවය නැතිකිරීම සදහා අශ්වගන්ධාරිශ්‍ට තෛලය ඉතා ප්‍රසිද්ධියක් උසුලයි.

උතුරු මැද පළාත් ආයුර්වේද රෝහලේ ඖෂධ හිඟයක් තිබියදී, හිටපු අධ්‍යක්ෂකවරිය නිත්‍යානුකූල නොවන ආකාරයට උතුරු මැද පළාතේ හිටපු ආණ්ඩුකාරවරයෙකුට අශ්වගන්ධාරිශ්‍ට හිතුමනාපේ නිකුත්කර ඇතැයි ආයුර්වේද රෝහලේ කාර්ය මණ්ඩලය චෝදනා කරයි.

දැනට විමර්ෂණ මට්ටමේ පවතින ලිඛිත සාක්ෂිවලට අනුව උතුරු මැද පළාත් හිටපු ආණ්ඩුකාරවරයාගේ ඉල්ලීම මත උතුරු මැද පළාතේ විහාරාධිපති හිමි නමකගේ නමට එම ඖෂධ ලබා දෙන ලෙසත් නියෝග කොට ඇත. අනුරාධපුර පිහිටි පළාත් ආයුර්වේද රෝහලින් ප්‍රතිකාර ගැනීම සඳහා පැමිණෙන රෝගියකු වෙනුවෙන් එක් මාත්‍රාවක් හැටියට කියවෙන තෙල් අවුන්ස එකක් ලබාදීම වෛද්‍යවරයා තීරණය කළහොත්, එක් බෝතලයකින් රෝගීන් විසි හතර දෙනකුට එය ලබා දිය හැකිබවයි රෝහල් කාර්ය මණ්ඩලය පවසන්නේ.

මහීපාල හේරත් මහතා උතුරු මැද පළාත් ආණ්ඩුකාරවරයා ලෙස ඉකුත් ආණ්ඩු සමයේදී කටයුතුකර ඇත.

මූලාශ්‍රය : ලංකාදීප

මෙරට නිෂ්පාදනය කරණු ලබන එතනෝල් ලීටරය මිල රුපියල් 300කින් ඉහල දැමීමට දේශීය සීනි නිෂ්පාදන සමාගම් තීරණය කිරීමත් සමග මෙරට නිෂ්පාදනය කරනු ලබන අරක්කු බෝතලය මිල රුපියල් 120කින් පමණ ඉහළ යනු ඇතැයි වෙළද පොළ ආරංචි මාර්ග අනාවරණය කරයි.

මෙරට නිෂ්පාදනය කරනු ලබන සීනි සදහා එකතුකල අගය මත පනවා ඇති 18% බද්ධ හේතුවෙන් ආනයනික සීනි සමග වෙළදපොළ මිල සමාන කිරීම සදහා එතනෝල් ලීටරයක මිල ඉහළ දැමීමට සිදුව ඇත. එතනෝල් යනු සීනි නිෂ්පාදනයේ අතුරු ප්‍රතිඵලයක් බවත් මසකට මත්පැන් නිෂ්පාදනය සඳහා එතනෝල් ලීටර් ලක්ෂ 16 ක් පමණ අවශ්‍යවේ.එතනෝල් පිටරටින් ආනයනය කිරීම නීති විරෝධී බවත් මත්පැන් සමාගම් එතනෝල් මිලදීගත යුත්තේ දේශීය සීනි නිෂ්පාදන සමාගම් වලිනි.

මෙතෙක් එතනෝල් ලීටරයක් මිලදී ගනු ලැබුවේ රුපියල් 475 ත් 500 ත් අතර මිලකට බවත් දැන් ලීටරයක මිල සීනි නිෂ්පාදන සමාගම් රුපියල් 800 දක්වා ඉහළ දමා තිබෙන බවත් සැලවේ. එහෙයින් මත්පැන් නිෂ්පාදන පිරිවැය මසකට කෝටි 48 කින් වැඩිවනු ඇති බවද ආරංචි මාර්ග කරයි.

අඩුමිල මත්පැන් නිෂ්පාදනවල වැඩි ප්‍රතිශතය තිබෙන්නේ එතනෝල් බවත් ඒ හේතුවෙන් අති විශේෂ අරක්කු බෝතලයක මිල රුපියල් 120 කින් වැඩි කිරීමට සිදුවනු ඇති බවත් ආරංචි මාර්ග අනාවරණය කරයි.

මහනුවර ඇසළ පෙරහැරේ නැරඹුම් ටිකට් පතක් මේ වනවිට රුපියල් පනස් දහසේ සිට හැටපන්දහස දක්වා මුදලකට අලෙවි කෙරෙමින් පවතින බව මහනුවර නගරාධිපති චන්ද්‍රසිරි විජේනායක මහතා අනාවරණය කරයි. පෙරහැර සමයේ ටිකට් පතක මිල නියාමනය නොකලහොත් අනිවාර්යෙන්ම ටිකට් පතක් රුපියල් ලක්ෂයක මුදලට අළෙවි වීම වැලැක්විය නොහැකි යැයිද නගරාධිපතිවරයා පවසයි.

ඔහු මෙම අනාවරණය සිදුකලේ මහනුවර නගර සංචාරක ප්‍රවර්ධනය පිළිබඳ මධ්‍යම පළාත් ආණ්ඩුකාර කාර්යාලයේ පැවැති සාකච්ඡාවකදීයි.

“මහනුවර රැජින හෝටලය කොරිඩෝවේ පෙරහර නැරඹුම් ආසන කොටසක් පමණක් මහ නගර සභාවෙන් අලෙවි කරනවා. ඒ රුපියල් 12000, 15000 හා 18000ක් වැනි මුදලකට. අපි මේවා අලෙවි කරන්නේ අන්තර්ජාලය හරහා. මේ ටිකට් අලෙවිය අන්තර්ජාලය හරහා ආරම්භ කළ අවස්ථාවේම ඇතැම් පුද්ගලයෝ ටිකට්පත් 100ක් හෝ ඊට වැඩි ප්‍රමාණයක් මිලදී ගන්නවා. මේ මිලදී ගැනීම් අපි සීමා කරලා නෑ. එහෙම කරන්නත් බෑ. ඉන්පසු මේ අය පෙරහර සමයේදී මේ ටිකට් ඉතා අධික මිලකට විකුණනවා. මේ ටිකට් අලෙවි කිරීම සම්බන්ධයෙන් මිල තීරණයක් නෑ. මිල පාලනයක් නෑ. නියාමනයක් නෑ. පෙරහර සමයේ මහනුවර නගරයේ ව්‍යාපාරික ආයතනවල බොහෝ ස්ථාන මේ ආසන පනවන්නන් හට යම් මුදලකට බදු දීම පෙර සිටම සිදුවෙනවා. ඇතැම් අය මේ ව්‍යාපාර ස්ථානවල අදාළ පරිශ්‍ර ලබාගන්නේ රුපියල් ලක්ෂ 50ත් 100 අතර මුදලකට බව අපිට තොරතුරු ලැබී තිබෙනවා. ඉන්පසු ඒ අය පෙරහර නැරඹීමේ ටිකට් තමන්ට සිතූ සිතු ගණන්වලට අලෙවි කරනවා. වැඩි මිලට විකුණලා තැරැව්කරුවන් කීපදෙනෙක් අතරේ ඉතිරි මුදල බෙදිලා යනවා. කීපදෙනෙක් මේ පෙරහර ආසන මාෆියාව හැමදාම ක්‍රියාත්මක කරනවා” යැයිද ඔහු කීය.