මාතර දිස්ත්‍රික්කයේ රෝගී තත්ත්වයන්ට ගොදුරු වී ඇති පොල් ගස් කපා දැමීමේ කටයුතුවල නිරත නිලධාරීන්ට ආරක්ෂාව සපයන ලෙස පොල් වගා කිරීමේ මණ්ඩලය ආරක්ෂක අමාත්‍යාංශයෙන් ඉල්ලා ඇත.පොල් වගා කිරීමේ මණ්ඩලයේ සභාපති සුනිමල් ජයකොඩි පැවැසුවේ ඇතැම් පොල් වගාකරුවන් නිලධාරීන් ඝාතනය කරන බවට හා පහර දෙන බවට තර්ජනය කර ඇති බවත් ඇතැමුන් නිලධාරීන් බිය ගැන්වීමට සුනඛයන් පවා යොදාගෙන ඇති බවත්ය.

මේ හේතුවෙන් නිලධාරීන්ට තම රාජකාරිය කිරීමට අපහසු වී ඇති හෙයින් නිලධාරීන්ට බාධා කිරීම සම්බන්ධයෙන් නීතිමය පියවර ගත හැකි වුවද ගොවීන් ද මූල්‍ය දුෂ්කරතාවන්ට මුහුණ දී ඇති බැවින් පවතින තත්ත්වය අනුකම්පාවෙන් යුතුව හැසිරවීමට මණ්ඩලයට අවශ්‍ය බව සභාපතිවරයා පැවැසීය.

ඒ අනුව පොල් වගාකිරීමේ මණ්ඩලය විසින් රාජ්‍ය ආරක්ෂක අමාත්‍යාංශය, ජනමාධ්‍ය අමාත්‍යාංශය, මාතර දිස්ත්‍රික් ලේකම් සහ ප්‍රාදේශීය ලේකම්වරුන් මෙම ගැටලුව පිළිබඳ දැනුවත් කර ඇත.

මෙවැනි තර්ජනය කිරීම් හමුවේ පොල් ගස් කපා ඉවත් කිරීමේ වැඩසටහන සඳහා පොල් වගා කිරීමේ මණ්ඩලයේ සහ ක්ෂේත්‍ර නිලධාරීන් හත් දෙනකු බැගින් කණ්ඩායම් 20ක් යොදවා ඇති අතර එම පිරිස සඳහා පොලිස් ආරක්ෂාව අපේක්ෂා කෙරේ.

මාතර දිස්ත්‍රික්කයේ පොල් ගස් පන්දහසක් කපා විනාශ කිරීමට පොල් වගා කිරීමේ මණ්ඩලය තීරණය කර ඇත්තේ ‘රේන්ද මකුණා’ යන නාමයෙන් හඳුන්වනු ලබන ආක්‍රමණික කෘමියකු හේතුවෙන් පැතිර යන ‘වැලිගම විල්ට්’ නමැති රෝගය හේතුවෙනි.

දැනට මාතර දිස්ත්‍රික්කයේ පමණක් පොල් ගස් 6,200ක් මෙම රෝගයට ගොදුරු වී ඇති අතර ඒ අනුව දිනකට පොල් ගස් 500ක් බැගින් සති දෙකකදී විනාශ කිරීම පසුගියදා (11 වැනිදා) සිට ආරම්භ කෙරිණි.

මෙම කෘමියා විසින් විනාශ කරන පොල් ගස වසර දෙකක් ඇතුළත නරක් වීමේ අවදානමක් පවතී.

තවද මේ වන විට මාතර, ගාල්ල, හම්බන්තොට ඇතුළු දිස්ත්‍රික් කිහිපයක අදාළ රෝගය ව්‍යාප්ත වෙමින් පවතින බව හඳුනාගෙන ඇත.

ආණ්ඩුවේ පිරිස් විසින් වතුකරයේ ජනතාවට පොල් අරන් දී පොල් ගසන්නැයි උපදෙස් දී ඇතැයි සමගි ජන බලවේග පාර්ලිමේන්තු මන්ත‍්‍රී පලනි දිගම්බරම් මහතා සඳහන් කරයි.

වතුකරයේ කම්කරු ප්‍රජාවගේ වැටුප් වැඩි කිරීම සම්බන්ධයෙන් විරෝධය පළ කරන අයට මෙසේ පොල් ගැසීමට උපදෙස් දී ඇති බවද හෙතෙම පැවසීය.

කෙසේ වෙතත් වතුකම්කරු වැටුප ජනවාරි මාසයේ වැඩි කලහොත් ගැටලුවක් නැති බවත් එසේ නොවුනහොත් ආණ්ඩුවට විරුද්ධ පොල් ගැසිල්ල ආරම්භ වනු ඇති බවද හෙතෙම පැවසීය.

හැටන් ප්‍රදේශයේදී මාධ්‍ය අමතමින් ඔහු මේ අදහස් පළ කළේය.

කොල්ලුපිටිය ප්‍රදේශයේ පිහිටි, කලකට පෙර මිය ගිය ජනප්‍රිය රූපවාහිනී ටෙලි නාට්‍ය නළුවෙකුගේ පුත්‍රයාට අයත් රාත්‍රී සමාජ ශාලාවක් ඉලක්ක කර ගනිමින්, පාතාල ක්‍රියාකාරකම් හා සම්බන්ධ බවට සැක කෙරෙන පුද්ගලයන් දස දෙනෙකුගෙන් යුත් කණ්ඩායමක් විසින් අසාමාන්‍ය දඬුවමක් ලබා දී පලා ගොස් ඇත. ඉහළ පෙළේ පොලිස් නිලධාරියෙකු මෙම සිදුවීම තහවුරු කළේය.

ඩුබායිහි සැඟවී සිටින බව කියන, මත්ද්‍රව්‍ය ජාවාරම්කරුවෙකු වන වැල්ලේ සාරංග නමැත්තාගේ ප්‍රධාන ගෝලයන් පිරිසක් පැමිණ මෙම ක්‍රියාව සිදුකර ඇති බවට වැඩිදුරටත් තොරතුරු ලැබී තිබේ.

අදාළ රාත්‍රී සමාජ ශාලාවේ සේවය කළ සේවකයන් තිදෙනෙකුට මෙම කණ්ඩායම විසින් මෙම අමුතු දඬුවම ලබා දී තිබේ. ප්‍රථමයෙන් ඔවුන්ගේ හිසකෙස් සම්පූර්ණයෙන්ම කපා බූ ගා දැමූ මැර කණ්ඩායම, අනතුරුව එම සේවකයන්ට කාන්තා ඇඳුම් අන්දවා, මල් මාලා දමා, බලහත්කාරයෙන් නටවා විනෝද වී ඇති බව පැවසේ.

මෙම අමානුෂික දඬුවම් ලබා දෙන අවස්ථාව, එම කණ්ඩායම විසින් වට්ස්ඇප් ඔස්සේ ඩුබායි හි සිටින බව කියන වැල්ලේ සාරංග නමැත්තාට සජීවීව නැරඹීමට අවස්ථාව සලසා දී ඇති බවටද වාර්තා වේ.

වාර්තා වන ආකාරයට, මීට පෙර අවස්ථාවකදී වැල්ලේ සාරංගගේ ගෝලයන් කිහිප දෙනෙක් එම සමාජ ශාලාවට පැමිණි විට ඇති වූ ගැටුමකට පලිගැනීමක් ලෙස මෙම සේවකයන් තිදෙනාට මෙලෙස දඬුවම් කර ඇත.

මෙවර ඉල්මහ විරු සමරු දිනයේදී ජනාධිපති අනුර දිසානායක මහතා සිදු කළේ දුර්වල මෝඩ චුන් කතාවක් බව බි‍්‍රතාන්‍යයේ සිටින මාධ්‍යවේදී උවිඳු කුරුකුළසූරිය මහතා සඳහන් කරයි.

ජනාධිපති අනුර දිසානායක මහතාගේ සමීප මිත්‍රයෙක් ලෙස සැලකෙන කුරුකුළසුරිය මහතා මේ බව සඳහන් කරමින් තම සමාජ ජාල ගිණුමේ සටහනක් තබා තිබේ.

අදාළ සම්පූර්ණ සටහන මෙසේය.

“අයවැය කතාව වගේමයි කට්ටිය අත්පුඩි ගැහැව්වට. වේගවත් කතාවක්. විජේවීර සහ 71 පරපුර, එදා තිබ්බ දේශපාලනය, ඒදා එක්සත් ජාතික පක්ෂය, ශ්‍රී ලංකා නිදහස් පක්ෂය සහ සමසමාජ/කොමියුනිස්ට්ස් පක්ෂ දරපු මතවලින් විජේවීර හදපු ජවිපෙ ඒ ඵෙතිහාසික සන්දර්භයේ තියල විග්‍රහ කලෙත් නැහැ.

හිරෙන් නිදහස් වෙලා ඇවිත් 78 සිට 88/89 දක්වා ජවිපෙ කරපු දේශපාලනය ගැන අද හැරිල බලනකොට තත්ත්වය හරියට නූතන පරපුරට කියා දුන්නෙත් නැහැ.

GEN Z පරපුරට කිසිම ආමන්ත්‍රණයක් කළේත් නැහැ. ක්‍රිස්තියානිකාරයො ක්‍රිස්තියානි කරනව වගේ, ඉන්න ජවිපෙ පාක්ෂිකයින්ටම චූන් කතාවක් උඩින් පල්ලෙන් දුන්නෙ.

පාක්ෂිකයින්ට කතා කරන්න ඕනම නම් දොර වහගෙන කැමර නැතුව කතාකරන්න ඕන! තව ඉස්සරහට දේශපාලනය කරන්න හිතනව නම් ඊයෙ ලස්සන කතාවක් කරන්න තිබ්බ. පක්ෂ නායකය හැටියට සහ රටේම නායකය හැටියටනෙ කතාව දෙන්න ඕන.

2023 අනුර ඊයෙ වගේ දවසෙ රාජ්‍ය බලය නැතුව කරපු කතාව කොච්චර ලස්සනද! අද එකයි, ඒකයි සසදල බලන්න. මේව පාක්ෂිකයින්ට අමතන කතා උනත් දැන් හැමෝම ඒව අහනව/අහන්න පුලුවන් කියන එකවත් ඔලුවෙ නැහැ අනුරගෙ. දුර්වල මෝඩ චූන් කතාවක්. අවස්ථාව ප්‍රයෝජනයට අරගත්තෙ නැහැ. ටිල්වින්ගෙ කතාව තාම අහන්න බැරි උනා. ඒකත් අද අහන්න ඕන”

පාතාලයේ පිරිසක් රජයට භාර වීමට කැමති බවට ප්‍රකාශ කළ මහජන ආරක්ෂක අමාත්‍ය ආනන්ද විජේපාල එම කතාව නැවත හරවාගෙන තිබේ. ඔහු එවැනි ප්‍රකාශයක් නොකළ බව කියා ඇත.

පාර්ලිමේන්තුවේදී මාධ්‍යවේදීන් කිහිපදෙනෙකු 11 වැනිදා කළ ප්‍රශ්න කිරීමකදී ඔහු තමාගේම ප්‍රකාශය නැවත හරවාගෙන තිබේ.

‘මේ වෙනකොට පාතාලයේ පිරිසක් ලංකාවට එන්න කැමතියි කිව්වා. ඒකේ තියෙන අලුත්ම තත්වය?‘ යනුවෙන් මාධ්‍යවේදියෙකු විමසූ අවස්ථාවේදී ඔහු ප්‍රකාශ කළේ මෙසේය.

“නෑ එහෙම එකක් නෙවෙයි තිබ්බේ. මත්ද්‍රව්‍ය ජාවාරම් කරන සමහර පිරිස් එහෙන් ඉවත් වෙන්න කැමතියි කියලා ප්‍රකාශ කරලා තියෙනවා කියන ප්‍රකාශය තමයි කළේ. ජාවාරම්වල ඉන්න අය එයින් ඉවත් වෙන්න උත්සාහ කරනවා නම් ඒක යහපත් තත්ත්වයක්.”

භාරවීමට කැමති බව ප්‍රකාශ කළේ තමන්ට ලැබෙන ආදායම අඩුවීම නිසාදැයි විමසූ විට ඇමතිවරයා මෙසේ පැවසීය.

‘ඒක ඉතින් ඒ පිරිස්වලින් තමා විමසන්න ඕනෑ. අපි මේ අරන් යන ව්‍යාපාරයට සියලුදෙනාගේ අවධානයට යොමුවෙලා තියෙනවා. ඔවුනුත් ඉවත් වෙන්න උත්සාහ කරනවා නම් ඒක යහපත් තත්වයක්‘

එහෙත් ඊට පෙර ඔහු කළ ප්‍රකාශයේදී ඔහු පැහැදිලි ලෙස මෙසේ කියා තිබුණි.

‘මැදපෙරදිග පුද්ගලයෝ හත්දෙනෙක් මත්ද්‍රව්‍ය ජාවාරම් කරන අය සදහන් කළා. ඔවුන් කැමතියි කිව්වා රජයට යටත් වෙන්න. භාර වෙන්න. ඔවුන්ට සමාව දීලා ඒකෙන් ඉවත් වෙන්න ඔවුන් කැමතියි කිව්වා.‘

පොලිස් විශේෂ කාර්ය බලකා‍ය බූස්ස කඳවුරේ නිළධාරින්,බන්ධනාගාර හදිසි ප්‍රතිචාර උපක්‍රමික ඒකකයේ සහ බූස්ස බන්ධනාගාර නිලධාරින් එක්ව බූස්ස අධීආරක්ෂක බන්ධනාගාරයේ සිදු කළ සෝදිසි මෙහෙයුමකදී දෙමටගොඩ චමින්ද නමැති විශේෂ ගණයේ සිරකරු රඳවා සිටින අංක 10 සිරමැදිරිය තුළින් ස්මාර්ට් ජංගම දුරකතනයක් සොයා ගෙන තිබේ.

මරණ දණ්ඩනය නියමව සිටින දෙමටගොඩ චමින්දගේ සිරකුටිය පරික්ෂා කිරීමට පොලිස් විශේෂ කාර්ය බලකා‍ය බූස්ස කඳවුරේ නිළධාරින් සහ බන්ධනාගාර හදිසි ප්‍රතිචාර උපක්‍රමික ඒකකයේ නිළදාරින් ඇතුළු වීමත් සමගම ඔහු විසින් අදාල ජංගම දුරකතනය පොලොවේ ගසා විනාශ කිරීමට තැත්කළ බව එම බන්ධනාගාර ආරංචි මාර්ග සඳහන් කරයි.

එමෙන්ම බූස්ස බන්ධනාගාරයේම අංක 11 සිරමැදිරියෙහි ක සෝදිසියකදී එහි රඳවා සිටින සිරකරුවකුවූ අබ්දුල් රහමන් නැමැති ,මහාපරිමාණ මත්ද්‍රව්‍ය ජාවාරම්කරු සතුව තිබී ස්මාර්ට් ජංගම දුරකතනයක්ද සොයාගැනීමට පොලිස් විශේෂ කාර්ය බලකා‍ය බූස්ස කඳවුරේ නිළධාරින් සහ බන්ධනාගාර හදිසි ප්‍රතිචාර උපක්‍රමික ඒකකයේ නිළදාරින් සමත්වී ඇත.

මෙම ජංගම දුරකතන ඉදිරි විමර්ශන කටයුතු සදහා පොලිස් අපරාධ විමර්ශන අංශයට භාරදීමට නියමිතය.

දෙමටගොඩ චමින්ද යනු ශ්‍රී ලංකාවේ ප්‍රසිද්ධ පාතාල කල්ලි නායකයෙකු සහ මත්ද්‍රව්‍ය ජාවාරම්කරුවෙකු ලෙස සැලකෙන චමින්ද රවී ජයනාත්ගේ අන්වර්ථ නාමයයි. ඔහුට මරණ දණ්ඩනය නියම වී ඇත්තේ 2011 වසරේ ඔක්තෝබර් 08 වනදා කොළොන්නාව ප්‍රදේශයේදී සිදු වූ හිටපු පාර්ලිමේන්තු මන්ත්‍රී භාරත ලක්ෂ්මන් ප්‍රේමචන්ද්‍ර මහතා ඇතුළු සිව් දෙනෙකු ඝාතනය කිරීමේ සිද්ධියට වරදකරු වීම හේතුවෙනි.

මෙම ඝාතනය සිදුවූයේ 2011 පළාත් පාලන මැතිවරණ සමයේදීය. දිගු නඩු විභාගයකින් අනතුරුව 2016 වසරේදී ඔහුට ඇතුළු තවත් විත්තිකරුවන් කිහිප දෙනෙකුට මරණ දණ්ඩනය නියම විය. ඔහු මත්ද්‍රව්‍ය ජාවාරම් ඇතුළු තවත් අපරාධ රැසකට සම්බන්ධ බවට චෝදනා එල්ල වී ඇති අතර, අධිකරණයේ විභාග වන තවත් නඩු කිහිපයකද විත්තිකරුවෙකි.

විපක්ෂ නායක සජිත් ප්‍රේමදාස මහතාගේ ඉන්දීය සංචාරය පිළිබඳ තමන් හෝ පක්ෂයේ මන්ත්‍රීවරුන් කිසිවකු දැන සිටියේ නොමැති බව සමගි ජන බලවේගයේ පාර්ලිමේන්තු මන්ත්‍රී හර්ෂ ද සිල්වා මහතා පවසයි.

එය ඉන්දීය රජයේ ආරාධනයක් අනුව සිදුවූ නිල සංචාරයක් යැයි තමන් දැනගත්තේ ද පුවත්පත්වලින් බවයි හර්ෂ ද සිල්වා මහතා සඳහන් කළේ.

එම සංචාරය සඳහා පක්ෂයේ ජ්‍යේෂ්ඨයින් සම්බන්ධ කර නොගත්තේ ඇයිද යන ප්‍රශ්නයට පිළිතුරු දීමට තමන්ට හැකියාවක් නොමැති බව පැවසූ ඒ මහතා කෙසේවෙතත් මෙය පක්ෂ අභ්‍යන්තරයේ බරපතළ අර්බුදයක් යැයි පැවසීමට නොහැකි බවත් ප්‍රකාශ කළේය.

හර්ෂ ද සිල්වා මහතා මේ බව පැවසුවේ හිරු රූපවාහිනී නාලිකාවේ විකාශය වූ සජීවී දේශපාලන සංවාදයකදී ය.

ආණ්ඩුවට එරෙහිව ලබන 21දා විපක්ෂය සංවිධානය කරන නුගේගොඩ විරෝධතා රැළියට තමා සහභාගි නොවන්නේ හේතු දෙකක් මත යැයි හිටපු ජනාධිපති මහින්ද රාජපක්ෂ මහතා පවසයි.

ඒ තමාගේ සුවදුක් බැලීමට රටවටෙන්ම දිනපතා තංගල්ලට එන ජනතාව හමුනොවී සිටීමට බැරි නිසාත් තංගල්ලේ සිට නුගේගොඩට පැමිණීමට අමතර කාලයක් යෙදවීමට සිදුවන නිසාත් යැයි ද හිටපු ජනපතිවරයා කීය.

මහින්ද රාජපක්ෂ මහතා වැඩිදුරටත් මෙසේ ද පැවසීය.

ආණ්ඩුවට එරෙහිව විපක්‍ෂය මගින් සංවිධානය කරන විරෝධතා රැලිය ගැන මගේ කිසිම අකැමැත්තක් නැහැ. ඊට අපි උඩින්ම කැමැතියි. මෙම අවස්ථාවට මම සහභාගි නොවීම සමහරු වරදවා තේරුම් ගන්න පුළුවන්. මෙදා අයවැය ඇල්වතුර වගෙයි. මත්ද්‍රව්‍ය වැටලීම් සිදුකරද්දී ආණ්ඩුව අපිට ඇඟිල්ල දික්කෙරුවාට ඒත් අපි නිවැරදියි කියලා දැන් ජනතාවට තේරිලා.

මූලාශ්‍රය : දිවයින