කෘෂිකර්ම අමාත්‍යාංශය සඳහා රාජගිරිය ප්‍රදේශයේ පිහිටි මහල් ගොඩනැගිල්ලක් කුලී පදනම මත ලබාගැනීමේදී සිදුව ඇති මූල්‍ය අක්‍රමිකතා සම්බන්ධයෙන් සිදුකෙරෙන විමර්ශනයකට අදාළව හිටපු ජනාධිපති රනිල් වික්‍රමසිංහ මහතාව අත් අඩංගුවට ගැනීමේ සූදානමක් පවතින බව ආරංචිමාර්ග පවසයි.

ප්‍රවීණ සිනමා නිලි සබීතා පෙරේරා මහත්මියගේ සැමියාට අයත් මෙම ගොඩනැගිල්ල පසුගිය යහපාලන ආණ්ඩු සමයේදී කෘෂිකර්ම අමාත්‍යාංශය සඳහා කුලී පදනම මත ලබාගෙන තිබිණි. එහි මාසික කුලිය රුපියල් මිලියන 21ක් වූ බවත් මාධ්‍ය වාර්තා කර තිබිණි.

මෙහිදී සිදුව ඇති අක්‍රමිකතා සම්බන්ධයෙන් සිදුකෙරෙන විමර්ශනයට අදාළව හිටපු ජනාධිපති මෛත්‍රීපාල සිරිසේන මහතා ද පසුගිය දිනක අල්ලස් කොමිසම වෙත කැඳවා ප්‍රකාශයක් සටහන් කරගෙන ඇති බව සඳහන්.

මෙම ගොඩනැගිල්ල කුලී පදනම මත ලබාගැනීම සඳහා කැබිනට් පත්‍රිකාව ඉදිරිපත් කර ඇත්තේ එවකට අග්‍රාමාත්‍යවරයා වූ රනිල් වික්‍රමසිංහ මහතා විසින් බැවින් ඉදිරියේදී ඒ පිළිබඳව ඔහුගෙන් ප්‍රකාශයක් සටහන් කරගෙන, ඔහුව අත් අඩංගුවට ගැනෙනු ඇති බවයි ආරංචිමාර්ග වැඩිදුරටත් පැවසුවේ.

MI 17 හෙලිකොප්ටර් හතරක් අලුත්වැඩියා කිරීම සඳහා වූ ටෙන්ඩරය බොස්නියා සහ හර්සගොවිනා හි M/s Winsley Defense Group d.o. ආයතනයේ දේශීය නියෝජිතයා වන M/s SecuraTec Lanka (Pvt) Limited වෙත ලබාදීම සම්බන්ධයෙන් මේවනවිට ගැටලු මතුව ඇතැයි වාර්තා වේ.

ඒ අදාළ ටෙන්ඩරයේ කොන්දේසි ලේඛන සම්පූර්ණ නොකළ සමාගමකට එය ප්‍රදානය කර ඇති බවට වන චෝදනා නිසාය.

මේ කරුණු සම්බන්ධයෙන් ඉකුත් සතියේ රජයේ ප්‍රවෘත්ති දෙපාර්තමේන්තුවේ පැවැති කැබිනට් මාධ්‍ය හමුවේදී ද කැබිනට් ප්‍රකාශක, සෞඛ්‍ය හා ජනමාධ්‍ය ඇමැති වෛද්‍ය නලින්ද ජයතිස්ස මහතාගෙන් ප්‍රශ්න කෙරුණු අතර ඔහු එහිදී ඒ සඳහා පිළිතුරු ලබාදීමට සතියක කාලයක් ඉල්ලා සිටියේය.

ඔහු එහිදී කියා සිටියේ ආරක්ෂක අමාත්‍යාංශය සමඟ සාකච්ඡා කර ඊළඟ සතියේ ඒ සඳහා පිළිතුරු සපයන බවයි.

ටෙන්ඩරය සඳහා සමාගම් තුනක් ඉදිරිපත්ව ඇති අතර, ආරක්ෂක අමාත්‍යාංශය විසින් එය Winsley Defense Group හි දේශීය නියෝජිත SecuraTec Lanka (Pvt) Limited වෙත ලබාදී තිබිණි.

මේ ටෙන්ඩරය ලබාදීමේදී කොන්දේසි හතරක් සපුරාලීම අනිවාර්ය වන අතර, ඒ අතර ප්‍රධානම කොන්දේසිය වන්නේ හෙලිකොප්ටර් නිෂ්පාදක සමාගමේ අනුමැතිය ලබාගැනීමයි.

දෙවැනි කොන්දේසිය ලෙස ජෝර්ජියානු සිවිල් ගුවන් සේවා අධිකාරියේ අනුමැතිය අවශ්‍ය වුවද, ටෙන්ඩරය ලැබූ සමාගමට එම අධිකාරියෙන් අනුමැතියක් ලැබී නොමැති බව පැවසේ.

ඒ වෙනුවට අලුත්වැඩියාවට විරුද්ධ නොවන බවට දැනුම්දීමක් පමණක් ලැබී ඇති බව වාර්තා වේ.

එසේම, 2022 වසරේ සිට මෙම හෙලිකොප්ටර් යානා ජෝර්ජියානු අධිකාරියේ ලියාපදිංචි කර නොමැති බවද එම අධිකාරිය විසින් ටෙන්ඩර් සමාගමට යොමු කළ ලිපියේ සඳහන් වී තිබේ.

හෙලිකොප්ටර් හතර අලුත්වැඩියා කිරීම සහ ආයු කාලය දීර්ඝ කිරීම සඳහා වන සම්පූර්ණ පිරිවැය ඇමරිකානු ඩොලර් මිලියන 18 ක් (ආසන්න වශයෙන් රු. බිලියන 5.4 ක්) පමණ වන අතර, එක් එක් හෙලිකොප්ටරය සඳහා වන පිරිවැය ඇමරිකානු ඩොලර් මිලියන 4.5 ක් පමණ වේ.

හෙලිකොප්ටර් ප්‍රවාහනය සඳහා වන ගුවන් ගමන් සහ රක්ෂණ පිරිවැය ද පිරිවැයෙන් ආවරණය වේ.

SLAF විසින් කැඳවන ලද ලංසුවලින් පසුව වින්ස්ලි ආරක්ෂක කණ්ඩායම තෝරා ගන්නා ලදී.

අදාළ ටෙන්ඩරයට ලංසු කැඳවීම සිදු කර ඇත්තේ 2023 දී බවත්, මේ ටෙන්ඩරය මත මතුවූ විනිවිධභාය පිළිබඳ ගැටලු හේතුවෙන් එය මේ දක්වාම කල්ගොස් තිබේ.

මේවන විට මේවා අලුත්වැඩියා කළයුතු කාලය ඉක්මවා ගොස් ඇති බවද ගුවන් හමුදා මූලාශ්‍රයක් මගින් හෙළිකර ගැනීමට හැකි විය.

ගංවතුර ගලවා ගැනීමේ කටයුතු සහ ඒ ආශ්‍රිත අනෙකුත් කටයුතු වැනි දේශීය මෙහෙයුම් මෙන්ම ගුවන් හමුදා නිලධාරීන් විසින් සිදු කරන ලද එක්සත් ජාතීන්ගේ මෙහෙයුම් ද අලුත්වැඩියාව තවදුරටත් ප්‍රමාද වුවහොත් බාධා ඇති විය හැකි බව ද මේ අතර වාර්තා වේ.

MI -17 ප්‍රතිසංස්කරණය සහ සේවා කාලය දීර්ඝ කිරීමේ ටෙන්ඩරයට අදාළ සම්පූර්ණ වාර්තාවක් ඉදිරි කැබිනට් මණ්ඩලයට ලබාදීමට නියමිතව ඇතැයි ද පැවසේ.

මත්ද්‍රව්‍ය තොගයක් සමග අත්අඩංගුවට ගන්නා ලද විදුහල්පතිවරයාගේ බිරිඳ වන ජාතික ජන බලවේගය පෑලියගොඩ නාගරික මන්ත‍්‍රිනිය මෙවන විට එම ධුරයෙන් හා පක්ෂයේ සාමාජිකත්වයෙන් ඉල්ලා අස්වී ඇතැයි අමාත්‍ය උපාලි පන්නිලගේ මහතා සඳහන් කරයි.

පසුගිය පළාත් පාලන මැතිවරණයේදී නාම යෝජනා ලබාදුන්නේ ඉදිරිපත් වූ පුද්ගලයාට මිස පවුලේ සාමාජිකයන්ට නොවන බවද ඔහු කියා සිටියේය.

පවුලේ විවිධ පුද්ගලයන් සිටිය හැකි නමුත් ඇයට කිසිම චෝදනාවක් නොතිබූ බවත් පෙර වැරදි කිසිවක් නොතිබූ ඇය හමුදාවේ සිටි හෙදියක් බවත් අමාත්‍යවරයා පැවසීය.

කෙසේ නමුත් පවුලේ සාමාජිකයෙක් හෝ මත්ද්‍රව්‍ය චෝදනාවකට හසුවූ නිසා අදාල ක්‍රියාමාර්ග ගෙන ඇති බවත් පක්ෂයක් ලෙස ගොස් චූදිතයා ගොස් බදාගෙන නැති බවත් අමාත්‍යවරයා තවදුරටත් කියා සිටියේය.

උත්සවයකින් අනතුරුව මාධ්‍යවේදීන් විසින් කළ විමසීමකට ප්‍රතිචාර දක්වමින් ඔහු මෙම අදහස් පළ කරන ලදී.

අල්ලස් හෝ දූෂණ විමර්ශන කොමිෂන් සභාව මගින් තවත් හිටපු ජ්‍යෙෂ්ඨ අමාත්‍යවරයෙකු එලඹෙන සතියේදී අත්අඩංගුවට ගැනීමට නියමිතව ඇතැයි දැනගන්නට තිබේ .

ගම්පහ දිස්ත්‍රික්කය නියෝජනය කරන මෙම හිටපු අමාත්‍යවරයා දැනට පාර්ලිමේන්තුවේ නොමැත.

ඔහු අමාත්‍ය ධුරය දරන ලද අමාත්‍යාංශයේ රක්ෂණයක් පිරිනැමීමට අදාළ දූෂණයක් සම්බන්ධව විමර්ශනය කිරීමෙන් පසුව ලබන බදාදා ඔහු කොමිසම හමුවට කැඳවා තිබේ.

කොමිෂන් සභා ආරංචි මාර්ග සඳහන් කරන්නේ එදින ඔහු අත්අඩංගුවට ගෙන අධිකරණයට ඉදිරිපත් කරනු ඇති බවයි.

මුලින් පොහොට්ටුව නියෝජනය කල මොහු පසුව නව ප්‍රජාතන්ත්‍රවාදී පෙරමුණ නියෝජනය කළේය.

ඩබල් කැබ් එකක් පාවිච්චි කරන බවට පින්තූර වීඩියෝ මුලින් දමන ලද අග්‍රාමාත්‍ය හරිනි අමරසූරිය මහත්මිය දැන් ගමන් කරන්නේ ‘මර්සිඩීස් බෙන්ස් මර්බැක්’ වර්ගයේ රථයක බව හිටපු අමාත්‍ය චන්දිම විරක්කොඩි මහතා සඳහන් කරයි.

එම වර්ගයේ රථයක් ආසන්න වශයෙන් රුපියල් බිලියනයක් පමණ වන බවද ඔහු සඳහන් කලේය.

එය බලා සිටින අනෙක් මන්ත්‍රීලාගේ කටවල් වැසීමට ඩබල් කැබ් ලබාදීමට සූදානම් වන බවද ඔහු පැවසීය.

සිය නිවසේදී පැවති මාධ්‍ය හමුවක් අමතමින් ඔහු මේ බව පැවසුවේය.

ලංකා කම්කරු කොංග්‍රසයේ මහ ලේකම් පාර්ලිමේන්තු මන්ත්‍රී ජීවන් තොණ්ඩමන් මහතා එන සතියේ දී විවාහ වීමට නියමිතව ඇත.
ඔහුගේ මංගල උත්සාහය ඉන්දියාවේ මදුරාසියේදී පැවැත්වීමට නියමිතය.

එම විවාහ උත්සවය සඳහා මෙරට දේශපාලඥයන් පිරිසක් ද සහභාගි වීමට එරට බලා පිටත් වේ. හිටපු ජනාධිපති රනිල් වික්‍රමසිංහ මහතාද ඊට සහභාගි වෙයි.

බෙලිඅත්ත, ගලගම ප්‍රදේශයේ තරුණයන් දෙදෙනෙක්, මත්කුඩු පැකට් දෙකක් ළඟ තබා ගැනීම හේතුවෙන් පසුගිය 4 වැනිදා දික්වැල්ල පොලිසිය විසින් අත්අඩංගුවට ගෙන තිබෙනවා.

මෙලෙස අත්අඩංගුවට පත්ව ඇත්තේ විශ්වවිද්‍යාල අධ්‍යාපනය ලබන තරුණයෙක් සහ තවත් තරුණයෙක් වන අතර, පොලිසිය අහම්බෙන් කළ පරීක්ෂාවකදී ඔවුන් ළඟ මත්කුඩු ඇති බවට සොයාගෙන තිබේ.

පසුව පොලිසිය එක් තරුණයෙක්ගේ නිවසක් පරීක්ෂා කිරීමේදී තවත් කුඩු පැකට් තොගයක් හමුවී ඇති බවයි වාර්තා වන්නෙ.

එම මත්ද්‍රව්‍ය තොගය සමඟ හසුවූ තරුණයා, කුමාර හේවගේ තිළිණ මධුමාල් නැමැත්තෙක් වන අතර, ඔහුගේ පියා ජනතා විමුක්ති පෙරමුණේ කොට්ඨාශ සංවිධායකවරයෙක් බවයි වාර්තා වන්නෙ.

කුමාර ගමගේ හේමසිරි නැමති පුද්ගලයා ජවිපෙ බෙලිඅත්ත, ගලගම කොට්ඨාශයේ සංවිධායකයා වන අතර, ඔහු 2018 පළාත් පාලන මැතිවරණයට ජාතික ජන බලවේගයෙන් ඉදිරිපත් වී ඇති අතර 2022 පළාත් පාලන මැතිවරණයට ද ඉදිරිපත් වීමට බලාපොරොත්තුවෙන් සිටි අයෙකි.

අත්අඩංගුවට පත් වූ ඔහුගේ පුත්‍රයා සහ අනෙක් තරුණයා උසාවියට ඉදිරිපත් කිරීමෙන් පසු රක්ෂිත බන්ධනාගාර ගත කර තිබෙනවා.

එම පුද්ගලයා පසුගිය දා තංගල්ල නගරයේ පැවති මත්ද්‍රව්‍ය විරෝධී උද්ඝෝෂණයට සහභාගී වී ඇති බවයි වාර්තා වන්නෙ.

ඉදිරියේදී කටුපොල් වගා කිරීමට අනුමැතිය ලබාදීම සම්බන්ධව රජයේ අවධානය යොමුවී ඇතැයි වාර්තා වේ.

ගෝඨාභය රාජපක්ෂ ජනාධිපතිවරයා ලෙස කටයුතු කරන සමයේදී මෙරට කටුපොල් වගාව තහනම් කෙරුණු අතර දැනට වගාකර තිබෙන කටුපොල් වගාව වසරකට සියයට දහය (10%) බැගින් ඉවත් කිරීමට ද ගැසට් නිවේදනයක් නිකුත් කළේය.

එය සිදු කරනු ලැබුවේ මෙරට පරිසර වේදීන් හා භූ විශේෂඥයින්ගේ දැඩි ඉල්ලීමකට ප්‍රතිචාර දක්වමිනි.

වැවිලි සමාගම් විසින් අදාළ ගැසට් නිවේදනයට එරෙහිව අධිකරණයේ නඩුවක්ද ගොනුකර තිබේ.

කටුපොල් මෙරට වගා කිරීම සුදුසුද නැතිද යන්න පිළිබඳව සොයා බැලීම සඳහා වැවිලි සහ ප්‍රජා යටිතල පහසුකම් අමාත්‍යාංශය විසින් පසුගිය කාලයේදී විද්වත් කමිටුවක් පත් කරන ලදි.

එම කමිටුව පත් කරනු ලැබුවේ කැබිනට් මණ්ඩලයේ අනුමැතිය අනුවය.

ඊට අදාළ සියලුම පාර්ශ්ව නියෝජනය වන පරිදි මෙම කමිටුව සඳහා නියෝජිතයන් පත්කර ඇත.

වැවිලි සහ ප්‍රජා යටිතල පහසුකම් අමාත්‍යාංශය, මධ්‍යම පරිසර අධිකාරිය, පරිසර අමාත්‍යාංශය, විශ්වවිද්‍යාල ආචාර්යවරු සහ විද්වතුන්ගෙන් මෙම කමිටුව සමන්විතය.

වැවිලි අමාත්‍යාංශය විසින් අධිකරණයට දැනුම්දී ඇත්තේ කටුපොල් වගාව සම්බන්ධව සොයා බැලීමට කමිටුවක් පත්කර තිබෙන බවත් කමිටුවේ තීරණය පරිදි ඉදිරි කටයුතු සිදු කරන බවත්ය.

ඒ අනුව අදාළ කමිටුවේ තීරණය ලැබී ඇතැයිද වැවිලි සහ ප්‍රජා යටිතල පහසුකම් අමාත්‍යාංශයේ ආරංචි මාර්ග සඳහන් කළේය.

තවද යම් යම් කොන්දේසි මත කටුපොල් වගා කිරීම සුදුසු බවට එම කමිටුව විසින් නිර්දේශ කර ඇති බවද එම ආරංචි මාර්ග තවදුරටත් අනාවරණය කළේය.

මෙම කමිටු වාර්තාව ඉදිරියේදී කැබිනට් මණ්ඩලයට ඉදිරිපත් කිරීමට නියමිත බව පැවසේ.

බේරුවල විවිධ සේවා සමුපකාර සමිතියේ අධ්‍යක්ෂකවරයෙකු ලෙස කටයුතු කළ ජාතික ජන බලවේගය හිතවාදියෙකු කලහකාරී දෙස හැසිරී තිබේ.

ඒ ඔහුව එහි අධ්‍යක්ෂ ධුරයෙන් ඉවත් කිරීම සම්බන්ධයෙන් විරෝධය පළ කරමිනි.

ඔහු එම සමූපකාර සමිතියේ අධ්‍යක්ෂ ධූරය දැරීමට නුසුදුසු බව සමුපකාර කොමසාරිස්වරයක් දැනුම් දී ඇත්තේ අදාල පුද්ගලයාගේ බිරිඳ එම සමූපකාර සමිතියේ ගණකාධිකවරියක් ලෙස සේවය කිරීම හේතුවෙනි.

මේ සම්බන්ධයෙන් බේරුවල පොලිසියට පැමිණිල්ලක් ද සිදුකර ඇත.

හිටපු අමාත්‍ය මහාචාර්ය ජී.ඵල්. පීරිස්ගේ නිවසට අද සවස 6.00ට විපක්ෂයේ පක්ෂ නායකයින් ඇතුළු විපක්ෂයේ පක්ෂ නියෝජිතයින් රැසක්ම කැඳවා ඇති බව වාර්තා වේ.

නාරාහේන්පිට කිරුළ පාරේ පිහිටි ජී. එල් .පීරිස් මහාචාර්යවරයාගේ නිවසට විශේෂ සාකච්ඡාවක් සඳහා මෙම කැඳවීම සිදුකර ඇත.

විශේෂයෙන්ම වර්තමාන දේශපාලන තත්ත්වය සහ අළුතින් පැන ඇති දේශපාලන කාරණා පිළිබඳව මෙහිදී දීර්ඝ ලෙස සාකච්ඡා කිරීමට නියමිත බව මෙම රැස්වීමට සහභාගිවීමට නියමිත විපක්ෂයේ ප්‍රබලයෙකු අනාවරණය කරයි.

ඔහු පවසන්නේ නොවැම්බර් 21 වෙනි දින නුගේගොඩදී පැවැත්වෙන ඒකාබද්ධ විපක්ෂයේ “මහා ජනහඬ” රැළිය සඳහා සහභාගිවීම සම්බන්ධයෙන් ද අද පැවැත්වෙන සාකච්ඡාවේදී දීර්ඝ වශයෙන් සාකච්ඡා කිරීමට නියමිත බවකි.